ISAI 40 - Bawm Common Language Bible Version

Thu Lungumkâi

¹ Kan Pathian nih, “Ka mi le tla, thlangamh na u, thlangamh na u!

² Jerusalem mi tla chu fawrh na u. An tuar khawm a sâwt tâwk rawh, tu chun an sual khawm ngaihdam asi rawh ti simh na u. An sualnâk ruangah tling zat hen ka rep na rawh,” a ti.

³ Âu hâu a hawng suak le, “Ramkaro ah LALPA rangah lampi siam u! Kan Pathian rangah ramkaro ah lampi sial u!

⁴ Tiva hawr tla khah ule, tlâng kip rualtir u. Tlâng chu phâi a hawng si lai le, ram siakhâ chu râwn dap hen siam asi lai.

⁵ Churawhchun, LALPA rokualnâk a hawng lang lai le, mi zawzawng nih an muh lai. LALPA amah tak nih hi hi a tiamh mi asi,” a ti.

⁶ Âu hâu a hawng suak le, “Thuchah sim!” ti hen. Kei nih, “Zei thuchah ka sim lai?” ti hen ka deih. Anih nih, “Minung tla chu belh hâwi an si; mâng ah mi chawmpâr ngâk hen an sân a sâu dauh lêm lo.

⁷ LALPA nih anmah sêm ding hen thli a hawng lêngtir le, belh chu a uai le, chawmpâr chu a chuai. Minung tla khawm belh ngâk hen an tlo lêm lo.

⁸ Asi, belh chu a uai le, chawmpâr chu a chuai le, sikhawmsele kan Pathian thu chu zungzâl a um kumza lai,” a ti.

⁹ Jerusalem, tlâng sâng tak ah kâi le, thâwngthâng ṭha sim rawh. Zion, hâu fâk tak hen âu le, thâwngthâng ṭha chu sim rawh. Thu sim le ṭih lah. Juda khuapi tla chu nan Pathian a hawng ti hen simh na!

¹⁰ LALPA zahkâi chu a thiltikhonâk hen lâirêl ding hen a hawng kal le, ruang a suah na mi minung tla a sinah a hawngpi na.

¹¹ A ranrual tla chu dawrâpu hâwi hen a zauhkhenh na lai le, dawrâ fa tla chu a pumh na lai le, a bân hen a put na lai; an pinu tla chu thiamthih tê hen a rui na lai.

Israel Pathian Hen Tahṭhimh Kho Lo Mi

¹² Âunih tisumsumriat kutza kuar hen tah kho lai? Mawh âunih vân khi a kut hen tah kho lai? Âunih hâi lakah tual put kho hen mawh tlâng sâng leh tlâng tla khîng lakah khingh kho lai?

¹³ Âunih LALPA thilti ding mi simh khotu um? Âunih amah chu sîntir kho hen thu simh khotu um?

¹⁴ Âu sinah Pathian nih theih ding leh theihthiam ding hen thu a deih hen thilti ding mi tla a deih tâwn?

¹⁵ Phun tla chu LALPA lakah zeikhawm an si lo, tî a zut mi tluk khawm an si lo le, tlâwn lât tak tla khawm phildip hâwi hen a zâng.

¹⁶ Lebanon tumun ah mi ramsa zawzawng khawm kan Pathian sinah bâwlnâk rang chun a tâwk lo, A thing tla khawm tih ding ah a tâwm tuk.

¹⁷ Phun tla khawm a sinah zeikhawm an si lo.

¹⁸ Pathian chu âu hen me kan tahṭhimh kho lai? Zei hâwi asi na sim kho lai ma?

¹⁹ Milem siamtu nih thîr ngûn hen an luanh mi a tohnâk ah tangkasa an siam mi khawm nih a bangh lo.

²⁰ Tangka leh ngûn mang kholotu nih chun a ngêt kho lo ding mi thing an thîm. Tlû lo ding hen milem thiam tak hen siamtu ding mi an hâwl.

²¹ Na theih lo na maw? A lân thawk hen an simh lo ma? Zei hâwi hen laikulh a hawng a dawmh ti na theih lo ma?

²² Mi pakhat tual tlûn vândum pîn leiah a laltophah tlûnah to mi nih a siam mi asi, a tanglei ah minung tla chu zauh hen ngerhtê a metê mi tla hâwi an si. Vân chu puanzâr hâwi hen a pharh le, umnâk puanin hâwi hen.

²³ Lâirêltu thiltikho tla chu a niamh na le, zeikhawm silo hen a siam na.

²⁴ Thil keuh phun hen ram a thlâk mi hâwi asi. LALPA nih thli a hawng lêngtir le, An châr le, fapawn hâwi hen thli nih a sêm phin.

²⁵ Pathian thenhlimh hi âu hen me tahṭhimh kho asi lai? Amah hâwi mi midang an um rerêng ma?

²⁶ Vândum khi zauhnik! Ârfi na muh mi khi âunih a siam? Kawrsen rual hâwi hen ruitu asi le, zeizat an si a theih hep na, an min chiau hen a auh na. A thiltikhonâk chu thungâi a rokual le, pakhat khawm a relh dahlo.

²⁷ Israel, chu hâwi mi lakah zei rangah LALPA nih na lawksawngnâk a theih lo mi hâwi hen leh na tuar liauah an zauhkhenh lo mi hâwi hen na vûirâm.

²⁸ Na theih lo ma? Na nâ nih a theih lo ma? LALPA chu zungzâl Pathian asi; laikulh zawzawng amah tuah mi asi. Anih chu a dî hen a uai dahlo. A thinlung ah a dawn mi khawm âukhawm nih an theih lo.

²⁹ Mi chaklo leh mi dî tla chu chaknâk a pêk na.

³⁰ Ngâksia a ṭhang kho lo mi leh tlangvâl a dî mi rang khawm ah.

³¹ Sikhawmsele, ṭangpitu ding ah LALPA lakah â ngauh mi nih chun chaknâk thar a tawng lai. Mupi hâwi hen thla hen an zuang lai le; an tek lai le, an dî lai lo; an kal lai le, an uai lai lo.