ISAI 4 - Bawm Common Language Bible Version

¹ Chu ni a hawng tlung tik chun nunau pasarih nih mipa pakhat an tleih lai le, a sinah, “Mah a châwm kho hen nipuan khawm kanna vurh kho le, sikhawmsele, zângfahtê hen kan pasal kan ti lai le, churawhchun pasal nei lo hen ningzakkâi tak hen kan um lai lo rawh,” an ti.

Jerusalem Chu Tharh Nawlh Asi Lai

² LALPA nih thil phun tla ram lakah tam tak a kho hen dawh tak hen a siam ni ding a hawng tlung awt. Israel mi a thibang tla chu ram lakah an chîng mi thlâi an tawng mi lakah anna lâwm lai le, an rinhsan lai.

³ Jerusalem ah a thibang an um mi tla LALPA nih a thîm na mi chu, thenhlimh an ti na lai.

⁴ LALPA nih a thiltikhonâk hen phun tla chu lâi a rêl piak hen a thiangtir na lai le, Jerusalem ah sualnâk tla leh thisen suah mi tla chu a ṭâwl peng lai.

⁵ Churawhchun, Zion Tlâng leh chunah anna pûm mi zawzawng tlûnah chun LALPA nih sûn nî tangah sûm leh zân ah meikhû leh meialh chêu tak a hawng fial lai. Chu khuapi chu Pathian rokualnâk nih a tuam hen a hum lai.

⁶ A rokualnâk nih khuapi chu sûn nî linh lakah mi a dulh lai le, thli leh ruah lakah mun him leh dawrnâk ah a siam lai.