ISAI 39 - Bawm Common Language Bible Version

Babulon Thawk Hen Mifial Tla

¹ Chu liau chun Babulon lalchem Baladan fapa, Merodak Baladan nih lalchem Hezekiah a dam lo ti a theih le, a sinah lasui a kuat le, thil tla khawm a pêk.

² Hezekiah nih chu mifial tla chu a lawmh na le, a neih tangka leh ngûn, thing rimthâw leh rimthâw tla, kawrsen thuamthil tla a muh na. A ram sungah thil zeikhawm a thilsiahnâk mun a zauhtir na lo mi a um lo.

³ Churawhchun, khuavâng Isai chu lalchem Hezekiah sinah a va kal le, “Hi bang minung tla hi zei thawk hen hawng me an si, zei thu me na sinah an sim?” ti hen a deih. Hezekiah nih a sâng le, “Ram lât tak Babulon thawk hen hawng mi an si,” a ti.

⁴ “Lal in ah zei an muh?” ti hen a deih. Hezekiah nih, “Thil ka siahnâk mun lakah mi ka zauhtir na lo mi a um lo,” ti hen a sâng.

⁵ Churawhchun, Isai nih lalchem sinah, “LALPA, Zeizawng tikho nih chun,

⁶ na lal in ah mi thil zawzawng, a nan thlâktu tla nih an siah mi thil zawzawng tusûn ni tiang an khawng mi chu Babulon leiah an put hep ding mi tik a tlung awt rawh. Zei thil khawm mâk asi lai lo.

⁷ Nangmah thlâk lakah mi tak tla chu an kalpi ving na lai le, Babulon lalchem in ah rianṭuantu ding hen tilkhei ah siam an si lai,” a ti.

⁸ Lalchem Hezekiah nih a damsung kar vial chu thlangamnâk a um awt ti a theih le, churawhchun a sâng le, “LALPA thawk hen thuchah na hawng ka put mi chu a ṭha asi,” a ti.