ISAI 38 - Bawm Common Language Bible Version

Lalchem Hezekiah Damlonâk Leh Damnawlhnâk

¹ Hi liauah hin lalchem Hezekiah chu thi dêng hen a damlo. Amoz fapa khuavâng Isai chu amah zauh ding hen a kal le, a sinah, “LALPA nih chun, na dam ding asi lo rawh ruangah thil zeizawng a sang sang hen na siah ding hen a nan simh. Thi ding hen a râlring rawh,” a ti.

² Hezekiah chu vâm lei â hawi le, thla a cham:

³ “LALPA, zumhkâi tak leh rep tak hen na nâwl ka zulh le, ti ding na ka duh mi chu ti ka tum kumza mi theihkumza rawh,” a ti. Churawhchun, ngaihsia tak hen a ṭap rawh.

⁴ LALPA nih Isai chu Hezekiah sinah thu va simh ding hen a kîrtir nawlh le,

⁵ “Kei, LALPA a nan thlâktu David Pathian nih thla na cham mi ka theih hen na mitthli a tlâ mi ka muh; kum leinga tiang na san ka sâutir nawlh lai.

⁶ Nang leh Jerusalem chu Asiria lal lianchem kut ah mi ka nan hum lai le, khuapi chu ka zauhkhenh vima lai,” a ti.

⁷ Isai nih a sâng le, “LALPA nih a thutiam hâwi hen thil a ti ti theihnâk ding hen singsiahnâk a nan pêk lai.

⁸ Lalchem Ahaz nih a siam mi kâinâk leilâk lakah mi dâidul chu LALPA nih bak râ a kîrtir lai,” a ti. Chun dâidul chu dunglei ah bak râ â ṭhial.

⁹ Hezekiah chu a dam nawlh rawh chun hi sawrnâk la hi a rîn:

¹⁰ Ka dam liau ni ṭha hi laikulh thihnâk ah kal hen, Dam lo rawh ding hen ka ruat.

¹¹ Hi laikulh ah dam hen LALPA muh nawlh lo hen leh minung tla khawm muh lo rawh ding hen ka ruat.

¹² Ka nungâk chu puanin an lâwm mi hâwi leh, Puan tah mi thiam an tan phak mi hâwi hen a dawng rawh. Pathian nih ka nungnâk hi a dawngtir rawh hen ka ruat.

¹³ Chakeibaknei nih ka ruh a ṭam mi hâwi hen, Zân khuadei hen nganfâk tuar hen ka râk. Pathian nih ka nungnâk hi a dawngtir rawh hen ka ruat.

¹⁴ Ka hâu khawm a dal hen a chak lo. Vaṭhu hâwi hen ka râm. Ka mit hen vânlei zauh ding khawm ka iam lo rawh. LALPA, hi lawksawngnâk lakah mi hi ruang hawng ka suah rawh.

¹⁵ LALPA nih a ti rawh mi chu, kei nih zei ka sim kho? Ka lung a fâk tuk le, it khawm ka it kho lo.

¹⁶ LALPA, na rangah ka nung lai le, nangmah rang cho ah; Hawng ka damh le, hawng ka nunh rawh.

¹⁷ Ka ngaihsiatnâk chu thlangamnâk ah â chang lai. Ṭihnungkâi lakah mi ka nungnâk chu na hum le; Ka sualnâk zawzawng na ngaihdam rawh.

¹⁸ Laikulh thihnâk lakah mi pakhat khawm nih a nan sawr kho lo; A thi mi tla chu zumh na kâinâk lakah anna ngauh kho lo.

¹⁹ A nan sawrtu tla chu a nung mi tla an si, Tuah ka nan sawr mi hâwi hen. Pa tla nih an fa tla rangah zumh na kâi zia an simh na.

²⁰ LALPA, na ka damh rawh. Ṭingṭang tum hen nangmah sawrnâk la kan sak lai. Kan dam kar zawzawng na Biakin ah sawrnâk la kan sak lai.

²¹ Isai nih lalchem chu theipi rah nêng a khuailumâ lakah bêk hen a dam lai ti hen a simh.

²² Churawhchun, lalchem Hezekiah nih, “Biakin ka kal khonâk ding singsiahnâk zei asi lai,” a ti..