ISAI 37 - Bawm Common Language Bible Version

Lalchem Nih Isai Sinah Thu A Deih

¹ Lalchem Hezekiah nih an thusim a theih kâ hen a ngaihsia tukah a nipuan a thlêk le, salâpuan â aih le, LALPA in ah a va kal.

² Eliakim lal in ah mi hotu, Sebna, lâirêlnâk in ah lasuirîntu leh bâwlpu theihthiam dauh mi tla chu Amoz fapa Isai sinah a fial na. Annih khawm nih salâpuan anna aih bâk.

³ Isai sinah sim ding hen thuchah chu hi hi asi: “Tusûn chu tuarnâk ni asi; rêp hen leh ningzak saih hen kan um asi. Nunau nih fa a ring awt le, sikhawmsele tha rerêng a nei lo rawh mi hâwi kan si.

⁴ Asiria lal lianchem nih a milian chu Pathian nung simsiat ding hen a hawng fial. LALPA na Pathian nih hi bang simsiatnâk hi theih sele, chu hâwi hen thusimtu tla chu rêp na seh. Churuangah a thibang kan mi le tla rangah Pathian sinah thlacham rawh,” an ti.

⁵ Isai nih lalchem Hezekiah thuchah a theih rawh chun,

⁶ hi sângnâk thu hi a thanh: “Anih nih an hum na kho lai loh ti hen Asiria nih an ṭhih na mi thu ah lâu lo ding hen LALPA nih an simh na.

⁷ LALPA nih lal lianchem chu a ram leiah kîr ding hen thunawk a theihtir lai le, chunah chun LALPA nih amah chu a thah lai,” a ti.

Asiria Mi Tla Nih Ṭhihnâk Dang An Thanh Nawlh

⁸ Asiria milian nih lal lianchem nih Lakis a kaltâk le, Libnah khuapi kiangkam mi a do ti a theih le; churawhchun a sinah thu deih ding hen chunah chun a va kal rawh.

⁹ Aigupta kawrsen tla chu Sudan mi lalchem Tirhakah nih anmah do ding hen a hawng kalpi na mi thu Asiria mi tla nih an theih rawh. Chu chu lal lianchem nih a theih rawh chun,

¹⁰ Juda lalchem Hezekiah sinah theihtir ding hen lasui a kuat rawh: “Na lung mi pathian nih ka kut ah na tlû lo ding hen a nan simh le, sikhawmsele chu thu nih a nan perpet lah seh.

¹¹ Asiria lal lianchem nih râwk a tum rawh mi chu zei ram tal a râwk ti na theih. Chu lakah âwl ding hen na ruat ma?

¹² Hawng ka thlâktu tla nih Gozan, Haran, leh Rezep khuapi tla an râwk le, Betheden mi tla, Talasar ah um mi tla an thah na le, an pathian tla nih pakhat khawm a hum na kho lo.

¹³ Hamat, Arpad, Sepharvaim, Hena leh Ivah khuapi lalchem tla zeiah an um rawh?” a ti.

¹⁴ Lalchem Hezekiah nih mifial tla kut ah mi lasuikuat chu a lâk le, a rêl.

¹⁵ Churawhchun, Biakin ah a kalpi le, lalsuikuat chu LALPA mâika ah a siah le, thla a cham,

¹⁶ “LALPA, Zeizawng tikho, thilnung thla tlûnah totu Pathian chu nangmah cho na si le, nangnih chun laikulh lalram zawzawngah lâi na rêl. Nangnih tual leh vân na siam.

¹⁷ Tuah LALPA, hawng kan ngâi le, kan lakah thil a tlung mi tla hi zauhnik. Senakerib nih nang Pathian nung zauhnawmh hen thu a sim mi zawng hi ngâi rawh.

¹⁸ LALPA, Asiria lal lianchem nih phun tam tak leh an ram tam tak a râwk rawh mi khawm kan theih, an pathian tla, pathian tatak silo mi tla,

¹⁹ thing leh lung hen an kut hen an siam mi pathian lem tla chu a duah piak ti khawm kan theih.

²⁰ Tuah LALPA, kan Pathian, laikulh phun zawzawng nih nangmah lâwng Pathian na si ti an theih khonâk ding hen Asiria lakah mi hawng kan hum rawh,” a ti.

Lalchem Sinah Isai Thuchah

²¹ Chun Isai nih lalchem Hezekiah thlachamnâk sângnâk thu simh hen a sinah thu a thanh,

²² LALPA nih, “Senakerib, Jerusalem khuapi nih a nan nihsanh le, a nan zauhnawmh rawh.

²³ Na zauhnawmh leh na nihsanh mi hi âu si hen na ruat? Kei Israel Pathian thenhlimh na hawng ka zah lo mi asi.

²⁴ Na to-aw chu Lebanon tlâng sâng chem na nehnâk kari zawzawng hen keimah khâwng nawh ding hen na hawng fial. Sidar thing sâng chem leh theipi kûng ṭha chem tla ka hâu, tumun sung tla ka tleng ver ti hen na khâwng.

²⁵ Ramdang ah tikhur tla ka chawh le, ka din, ka kawrsen tla nih Nile tiva tla kang tep hen an lamh ti hen na khâwng.

²⁶ “Hi bang tla hi keimah nih a lân thawk hen ka ruat mi asi ti na theih dahlo ma? Tuah chun ka langh rawh. Kulhnei khua tla chu nâwmtâm pawng ah siam ding hen thiltikhonâk kan pêk rawh.

²⁷ Chunah mi zapi um tla chu thiltikholo hen an um le; an lâu le, an â thlo. Phâisen ah mi belh hâwi mawh, in tlûnah mi belh saklei mi thli lum mawh uai tep hen a sêm na mi hâwi an si.

²⁸ “Sikhawmsele nang lam chu na thilti leh na kalnâk zeizawng ka theih hep. Ka lakah na rothawk mi khawm ka theih.

²⁹ Na thinthawknâk thu leh na khâwngnâk thu an sim mi tla ka theih le, tulam chun na nâr ah siau kan banh lai le, na kâ ah thirbarh kan barh lai le, na hawngnâk lampi lîlâ ah kan kîrtir nawlh awt,” a ti.

³⁰ Churawhchun, Isai nih lalchem Hezekiah sinah, “Hi hi a hawng tlung ding mi singsiahnâk asi. Tukum leh kum vei lam chu mâng ah mi buh cho na ei lai, sikhawmsele chu zûl ah mi kum lam chu buh nan tuh lai le, nan ât lai le, grep nan phun lai le, nan ei lai.

³¹ Juda mi a thibang tla chu thlâi phun hen châwm mi a ram tual thûk takah a thlâk le, a rah a suah mi hâwi asi lai.

³² LALPA Zeizawng tikho nih hi bang hi hawng tlung ding hen a tum mi asi ruangah a thibang zapi tla chu Jerusalem ah leh Zion Tlângah an um lai.

³³ “Hi hi Asiria lal lianchem thu a sim mi chu asi: ‘Hi khuapi ah a hawng lût hen chanhtiang thalzum pakhat khawm kahnâk ah a mang lai lo. Zei kawrsen khawm a phaw hen khuapi kiangah a hawng lai lo le, a kiangkam ah hêl dak hen tual pawng an siam lai lo.

³⁴ Hi khuapi ah hin lût lo hen a hawngnâk lampi tê ah a kîr nawlh lai. Kei, LALPA nih ka sim asi.

³⁵ Hi khuapi hi keimah zahnâk ding leh ka to-aw David sinah thu ka tiamh mi ruangah ka vêng hen ka hum awt asi,” a ti.

³⁶ LALPA vânmifial chu Asiria kawrsen riakmun ah a va kal le, kawrsen 185,000 a thah na. Thâizing khua a dei rawh chun an ektê hen an thi hep!

³⁷ Churawhchun, Asiria lal lianchem Senakerib chu â lêt le, Ninevi leiah a kîr rawh.

³⁸ Ni khat chu a pathian Nisrok a sawnh liauah a fapa Adramelek leh Sharezer nih an nâmsâu hen an thah le, Ararat ram ah an tek ving. A fapa dang Esarhadon chu a ruangrûl ah a lal.