ISAI 33 - Bawm Common Language Bible Version

Ṭangpi Ding Hen Ngiarnâk

¹ Kan mêlma tla chu an vânduai rawh! Âukhawm nih anmah rangah tleih na hen rawk na lo khawmsele, mi rangah an rawk na. Mi an rawknâk leh an tleihnâk chu a dawng lai le, anmah ngelchel chu mi rawkmang leh mi zumhkâilo an si lai.

² LALPA, kan lakah khua ruat. Nangmah lakah lungumnâk kan nei. Nisiar hen hawng kan vêng le, lawksawng ni ah hawng kan hum.

³ Kan rangah na kan do piak liauah phun tla chu râltuk hâu ah an tek.

⁴ An neih tla chu anna thuam le, an lâk piak na.

⁵ LALPA chu a rokual a! Thil zeizawng tlûnah lâi a rêl. Jerusalem chu diknâk leh rangtlingnâk hen a khattir lai le,

⁶ Phun tla sinah birhnâk a pêk lai. A mi tla chu a hum kumza na le, finghnâk leh theihnâk a pêk na. An ro rokual chem chu LALPA an zahnâk chu asi.

⁷ Mi râlṭha tla chu ṭangpi ding hen an ṭap. Ram ruangrûl ah ruat mi tla chu lungfâk tak hen an ṭap.

⁸ Lam lian tla chu ṭihnung a kâi thlo ruangah âukhawm anna vel lo. Remnâk tla chu â râwk le, thutiamnâk tla khawm â râwk rawh. Âukhawm zah an si lo rawh.

⁹ Ram chu thlawrhthlâu leh mâk hen a um. Lebanon mi tumun tla chu a uai le, Saron vakuam ningno tla chu ramkaro hâwi asi rawh, Basan leh Karmel Tlângah mi thing nah tla chu a tlawng.

LALPA Nih A Mêlma Tla A Simhkanh Na Mi

¹⁰ LALPA nih phun tla sinah, “Tuah thil ka ti awt. Thil ka ti kho zia ka langhtir awt.

¹¹ Thil ṭangkâilo thilti ding na tum le, na thilti zawzawng zeikhawm asi lo. Ka thlarau mei hâwi mi nih a nan râwk lai.

¹² Lung hawldap siam ding hen a kâng leh a mân mi hâwi leh bua a kâng le, vachâm asi mi hâwi na si lai.

¹³ Thil ka ti mi leh ka thiltikhonâk ka langh mi hi mikip a nâinâk ah mi leh a lâtnâk ah mi nih theih seh.

¹⁴ Zion ah mi misual tla chu lâu hen an thir. “Pathian lâirêlnâk chu mei a alh kumza mi hâwi asi. Chu hâwi mei lakah chun âu kan him kho lai?” an ti.

¹⁵ Thu dik na sim hen thil dik na ti chun na him lai. Mipâm perpetnâk ah na thiltikhonâk mang lah le, nawhnâk lâk lah. Mi thah tumtu mawh thilsual ding ti tumtu tla sinah a bawp lah.

¹⁶ Churawhchun, na him lai le, kulh bir tak sungah um mi hâwi na si lai. Buh ei ding leh tî din ding khawm na tawng lai.

Mâilei Rokualnâk

¹⁷ Veikhat chu lalchem rokual tak hen ram lakah lâirêl hen munkip ah thuneitu na muh teh lai.

¹⁸ Ramdang mi siah khawlhtu leh thlingthlâktu a lânah ṭihnungkâi tla chu thinlung ah theih mi cho an si lai rawh.

¹⁹ Ramdang minung na theih lo mi hawlh hen hawlhtu leh zauhnawmhtu chu na muh lai lo rawh.

²⁰ Kan phung kûtnâk Zion khuapi chu zauhnik. Jerusalem chu zauhnik! A sungah him tak hen umnâk mun ding tak asi a! Puanin ṭhial dahlo mi leh a rêngnâk tung phâwi dahlo mi leh a thuamhnâk khawm siat dahlo mi hâwi asi lai.

²¹ LALPA nih a rokualnâk hawng kan zauhtir lai. Tivapi tla leh tivatê kapah kan um lai le, sikhawmsele mêlma meilawng nih an zawh lai lo.

^22-23 Chubang meilawng tla lakah ri rêngnâk tung chu zeikhawm asi lai lo; a zawhtu tla khawm nih puanzâr an pharh kho lai lo! Mêlma kawrsen neihnâk zawzawng chu kan tleih lai le, a tam dân chu mi khêng tla men nih tingvo an nei kho lai. LALPA amah tak chu kan lalchem asi lai le; kan tlûnah lâi a rêl lai le, hawng kan hum lai,

²⁴ Kan ram lakah um mi minung âukhawm damlo ruangah chipchiarnâk an nei lai lo le, sualnâk zawzawng chu ngaihdam asi lai rawh.