ISAI 27 - Bawm Common Language Bible Version

¹ Chu ni ah chun LALPA nih Leviathan, rûlpi kual nuai leh ngerh tul hen um mi rêp ding leh tipi ah um mi sarâng thah ding hen a thiltikhonâk leh thihnâk nâmsâu a mang awt.

² Chu ni ah chun LALPA nih a grep dûm nuam tak thu a sim lai,

³ “Ka vêng le, tî ka tawih kumza. A sûn a zân hen âukhawm nih râwk lo ding hen ka vêng.

⁴ Grep zûn thu ah ka thin a thawk lai lo rawh. Ling leh bua lâwng do ding um mi sele ka duah hep lai rawh.

⁵ Sikhawmsele ka mi tla mêlma tla nih ka kilkâwi na mi an duh chun ka lakah remnâk siam na seh. Asi, keimah hen remnâk siam hen um na seh,” a ti.

⁶ Ni a hawng tlung ding mi lakah Jakob thlâk Israel mi tla nih thing hâwi hen ram an thlâk lai le, a pâr a ên hen a kukulul a tuah lai. An rah suah nih tual a khattir lai.

⁷ LALPA nih a mêlma hâwi tluk rak hen chun Israel mi tla chu a rêp na lo, a minung khawm chu tluk rak hen an vei lo.

⁸ LALPA nih a mi tla chu sal ah kaltir na hen a rêp na. Saklei mi thli ṭhalo hen a put ving na.

⁹ Sikhawmsele Israel sualnâk chu lunglo tla mâichâm sangvut hâwi hen rial dip asi tik leh rimthâw mâichâm mawh pathiannu Aserah lem pakhat khawm zuah lo asi tikah ngaihdam asi lai.

¹⁰ Kulhnei khuapi chu râwk hen a um rawh. Ramkaro hâwi hen a karo hen siah hen a um. Ranrual dînnâk leh tlawngnâk rang ding ah belh ningno mun lam asi rawh.

¹¹ Thing ṭeng tla chu a uai hen a kiak le, nunau tla nih tih ding ah an khawmh. Mi le tla nih theihthiamnâk zeikhawm an nei lo ruangah, Pathian an siamtu nih an lakah siherhnâk leh khuaruatnâk zeikhawm a langh lo.

¹² Chu ni ah chun, LALPA nih a mi tla chu Eufretis tiva thawk hen Aigupta ramri tiang hen, pakhat khat hen a pumh na lai le, âunih mawh a fâng leh a hî a thlei mi hâwi hen.

¹³ Chu ni chu a hawng tlung tik chun, Asiria leh Aigupta ah Israel mi tla sal ah tâng hen um mi ruangah kîr ding hen kawhnâk tâwtawrâwt an tum lai. An hawng lai le, LALPA chu Jerusalem ah mi a tlâng thenhlimh ah an sawnh lai rawh.