ISAI 25 - Bawm Common Language Bible Version

Sawrnâk La

¹ LALPA, nang chu ka Pathian na si; ka nan zah hen na min ka sawr lai. Thilchê tla na ti le; a lân thawk hen na thiltum chu zumhkâi tak hen na ti vima.

² Khuapi tla chu râwk dep hen na tuah le, an kulh tla khawm na râwk ver. Kan mêlma tla nih lal in an sak mi chu a vei pawt rawh.

³ Phun thiltikho tak tla nih nang chu an sawr lai le; phun sual tla khuapi mi nih a nan ṭih lai.

⁴ Mipâm leh ṭangpitu nei lo chu na sinah an hawng tek le, lawksawng liauah him tak hen an um. Thli leh ruah lakah dawrnâk na pêk le, nî sâ lîn lakah mi chu dâidul ah na umtir na. Misual tla nih busik liauah thli leh ruah hâwi hen leh, ram châr lakah nikhua kheu hâwi hen an do.

⁵ Sikhawmsele, LALPA, nangnih kan mêlma tla na dâisiptir na le, misual an âu mi tla khawm sûm nih nî sensâ a kîktir mi hâwi hen na bângtir dep na.

Pathian Nih Puai A Timhtuah

⁶ LALPA Zeizawng tikho nih hi Zion Tlâng tlûnah hin laikulh phun zawzawng rangah puai, buh ei ding mi ṭha chem leh uain ṭha chem mi hen puai a tuah awt.

⁷ Hinah hin phun zawzawng tlûnah ngaihsiatnâk sûmpi a um mi chu zeikarlo ah a kiangtir ving awt.

⁸ LALPA zahkâi nih thihnâk chu a veih pawt awt rawh! Mikip mitthli chu a nâwt piak ver na lai le, laikulh pumpi ah a mi le ningzakkâi tak hen tuarnâk chu a lâk piak ving na lai. LALPA amah ngelchel nih a sim mi asi.

⁹ Chu chu a hawng tlung tik chun, mikip nih, “Kan Pathian asi! Amah chu kan rinhsan le, ruang hawng kan suah rawh. Amah chu LALPA asi! Amah chu kan rinhsan le, tu chun ruang hawng kan suah ruangah kan lâwptlo hen kanna lâwm rawh,” an ti.

Pathian Nih Moab A Rêp Awt

¹⁰ LALPA nih Zion Tlâng chu a hum lai le, sikhawmsele Moab mi tla lam chu tual ṭha lakah mi fapawn hâwi hen lamh dep an si lai.

¹¹ Liau ding anna tum mi hâwi hen an bân an zangh lai le, sikhawmsele Pathian nih a nâutir na lai le, ṭangpitu nei lo hen an pil lai.

¹² Moab kulh tla leh a kulh vâm, sâng tak tla chu a râwk lai le, nek dip hen a tlûtir lai.