ISAI 22 - Bawm Common Language Bible Version

Jerusalem Thu Ah Thuchah

¹ Hi hi Tivakuam ah Muhnâk thu ah thuchah asi. Zei a hawng tlung? Zei rangah khuapi minung tla nih in tlûnah zei lâwmnâk me an mang?

² Khuapi sung mi minung tla zawzawng nih an hâu an suah le, lâwmnâk rihâu hen a khat. Na minung hi tuknâk ah thi mi tla chu râltuknâk ah an thi mi asi lo.

³ A nan rui natu zawzawng chu an tek le, chanhtiang thalzum pakhat khawm an kah na lânah an tleih hep na.

⁴ Ka mi le thi mi zawzawng tla ngaihsia tak hen ṭappi na ding hen tuah keimah lâwng hen hawngka kaltâk ko. Thla hawng ka ngamh ding a tum lah.

⁵ Tu hi ningṭih tik, neh tik leh tivakuam ah langhnâk lakah nawknâk LALPA Zeizawng tikho nih kan lakah a hawng fial mi tik chu asi. Kan khuapi kulh tla chu chim rel hen an dêng le, ṭangpi duh hen âu hâu nih tlâng tla a râwng.

⁶ Elam ram ah mi kawrsen tla chu rang tlûnah chuan hen an hawng le, chanhtiang leh a thalzum tla anna put. Kir ram ah mi kawrsen tla chu an phaw tla hen tîm chia zet hen an um.

⁷ Juda ram tivakuam ningno tak tla chu kari hen a khat; rang tlûnah to mi kawrsen tla chu Jerusalem kulh kawtkâ tla ah an dîr.

⁸ Juda vêngtu tla zawzawng chu anna rek phin rawh. Chu a hawng tlung liauah chun, râlthuam siahnâk in ah mi râlthuam chu na hawng put rawh.

^9-10 Jerusalem kulh remh ding hen a herhnâk mun chu na muh. Jerusalem sungah mi in zawzawng chu na zauhdik ver le, khuapi kulh remhnâk ding hen lung lâk ding hen in zeimaw mi chu na siat.

¹¹ Tî khawng ding hen khuapi sungah tî pang na siam le, tili a li mi thawk hen tî chu na luangtir. Sikhawmsele, Pathian a lân thawk hen hi hâwi hawng um ding hen ruattu thu chu na ngâi duh lo.

¹² LAPA zahkâi, Zeizawng tikho nih chun, ṭap ding leh ulh ding hen nan lû mêt ding leh salâpuan aih ding hen a nan kawh na.

¹³ Chu hâwi um ding ngangâk hen nan ni le, lâwmnâk nan tuah. Dawrâ leh ran ei ding hen nan thah le, uain tla nan din. “Ṭha tak hen kan din hen kan ei kho! Thâituan ah chun kan thi lai rawh,” nan ti.

¹⁴ LALPA zahkâi Zeizawng tikho amah ngelchel nih ka sinah, “Hi misual tla hi an dam kar vial chu ngaihdam an si rêng lai lo. Kei, LALPA zahkâi, Zeizawng tikho nih ka sim asi,” a ti.

Shebna Thu Ah Simhkannâk

¹⁵ LALPA zahkâi Zeizawng tikhotu nih Shebna mi lal dâwngsungkhur lakah hotu sinah kal ding hen hawng ka simh le,

¹⁶ “Âu ah me na ruat? Tlângah mi lungruk mun ah na thlân ker ding hen zei thu neihnâk me na nei?

¹⁷ Mi pawiherh tak khawm na si dahmawh, sikhawmsele LALPA nih a nan sar lai le, a nan lawnh ving lai.

¹⁸ Bâwl lûm hâwi hen a nan sar lai le, ram kâu dauh sungah a nan lawnh ving lai. Na zumhnâk kari kiangah chunah chun na thi lai. Na hotupa dâwngsungkhur ningzak saihtu na si.

¹⁹ LALPA nih na rianṭuannâk mun ah mi a nan ṭhial lai le, na mun sâng takah mi a nan niamh lai,” ti hen a sinah va sim, hawng ka ti.

²⁰ LALPA nih Shebna sinah, “Chu chu a hawng tlung tikah ka to-aw Hilkiah fapa Eliakim ka fial lai.

²¹ Na rianṭuannâk thuam leh tâisâwm leh na thuneihnâk zawzawng a sinah ka pêk lai. Jerusalem ah mi leh Juda mi tla lakah pa hâwi hen a um lai.

²² David thlâk lalchem tangah thuneihnâk rangtling ka pêk lai. Rianṭuannâk in renh a nei lai le; â awng rawh mi chu âukhawm nih a khâr lai lo rawh le, â khâr rawh mi chu âukhawm nih a awng lai lo rawh.

²³ Bir tak hen khenh mi hâwi hen a mun ah ka siam lai le, a dâwngsungkhur zawzawng lakah zahkâinâk bulpi asi lai.

²⁴ Sikhawmsele a rualsia tla leh a dang hen a thlei mi tla chu a rangah thilrit an si lai. Bêl leh khêng thîrling khenh lakah an thlâi mi hâwi hen an thlâi lai!

²⁵ Chu chu a hawng um tik chun, chu thîr khenh bir tak a khenh mi chu a hawng tlawng lai le, a tlâ lai. Chu chu thil zeizawng thlâi mi dawnghnâk asi lai rawh. LALPA nih a sim mi asi,” a ti.