ISAI 21 - Bawm Common Language Bible Version

Babulon Tlû Ding Mi Muhtirnâk

¹ Hi hi Babulon thu ah thuchah asi. Thlihêl hâwi hen ramkaro chu a phiat le, siatnâk chu ram ningṭihkâi thawk hen a hawng lai.

² Thil ṭhalo tak a hawng tlung ding mi langhnâk ka muh le, tleihnâk leh siat leh râwknâk ding mi asi. Elam kawrsen tla, do u! Media kawrsen tla, khuapi tla chu hual u! Babulon nih tuarnâk a tlungtir mi chu Pathian nih a dawnghnâk a siam awt rawh.

³ Langhnâk ka muh mi leh theih mi nih nunau a nganfâk mi hâwi hen, nganfâknâk leh ningṭihnâk ka lakah a khattir.

⁴ Ka lû a hâi le, lâunâk hen ka thir. Zânlei siding mi ka mawhlah le, sikhawmsele, ningṭih cholo chu zeikhawm a um lo.

⁵ Langhnâk ah chun, puai chu timhtuah zet hen a um le, pher chu mi sâwm tla rangah phah asi rawh. Chunah chun an ei hen an din. Mawhsareh hen thupêk hâu a hawng um chawlh: “Hotu tla! Nan phaw tla timhtuah u!” ti hen.

⁶ Churawhchun, LALPA nih ka sinah, “Va kal le, râl vêngtu tla dîrtir na, a muh mi hawng sim ding hen simh.

⁷ Rang kêng tlûnah â chuan mi panih vima hawng mi a muh hen leh sanatung tlûnah leh sangâwngsâu tlûnah â chuan mi a muh chun thiamthih tak hen a thlingthlâk na ding asi,” a ti.

⁸ Churawhchun, râl vêngtu chu a hawng âu le, “Pu, ka rianṭuannâk mun ah a sûn a zân hen ka dîr,” a ti.

⁹ Mawhsareh hen hinah rang tlûnah chuan hen minung panih vima hen an hawng. Râl vêngtu nih, “Babulon chu a tlû rawh! Milem an sawnh mi zawzawng tla chu tual ah an tlû ver rawh,” ti hen thâwng a hawng thanh.

¹⁰ Ka mi Israel tla, fâng hâwi hen khâwng hen nan um le, sikhawmsele tuah thâwng ṭha tak nan sinah ka hawng sim asi, chu chu LALPA Zeizawng tikho Israel Pathian thawk hen mi asi.

Edom Thu Ah Thuchah

¹¹ Hi hi Edom thu ah thuchah asi. Mi zeimaw mi nih Edom thawk hen an hawng ka auh le, “Râl vêngtu, zei tikah khua a dei awt? Zei hâwi hen a dawng tuan awt, hawng ka simh,” a ti.

¹² Kei nih ka sâng le, “Zînglei a nâi rawh, sikhawmsele zân a hawng um awt nawlh. Deih nawlh ding na duh chun, hawng kîr le, deih,” ka ti.

Arabia Thu Ah Thuchah

¹³ Hi hi Arabia thu ah thuchah asi. Nannih Dedan mi, Arabia ramkaro ah

¹⁴ khualtlâwng kaltu tla umnâk mun a mi tla, nan sinah hawng mi tla, a tîhâl mi tla chu tî pêk u. Nannih Tema ram ah mi tla, ramdang thawk hen a hawng tek mi tla buh pêk na u.

¹⁵ Chu tla chu riamnâm lakah thah ding mi tla, chanhtiang hen kah ding mi tla, râltuknâk ṭihnungkâi mun thawk hen tek mi tla an si.

¹⁶ Churawhchun, Lalpa nih ka sinah, “Kedar phun tla rokualnâk chu kum khat lak ko ah a dawng lai.

¹⁷ Chanhtiang kahtu tla chu Kedar ram ah mi râlṭha chem an si, sikhawmsele tâwmtê cho a thibang an um lai. Kei, LALPA Israel Pathian nih ka sim asi,” a ti.