ISAI 20 - Bawm Common Language Bible Version

Takkaro Mi Khuavâng Singsiahnâk

¹ Asiria lal lianchem Sargon thupêk hen Asiria kawrsen hotu nih Philistia khuapi Asdod a do.

² Kum thum lântê ah LALPA nih Amoz fapa Isai chu a pheikawk leh salâpuan â aih mi lît ding hen a simh. A êt le, takkaro leh kê karo hen a kal rawh.

³ Asdod chu lâk asi rawh chun LALPA nih, “Ka to-aw Isai chu takkaro leh kê karo hen kum thum kar a kal rawh. Chu chu Aigupta leh Sudan lakah thil a hawng tlung ding mi singsiahnâk asi.

⁴ Asiria lal lianchem nih chun, chu ram panih thawk hen a mi tleih tla chu takkaro leh kê karo hen a kalpi na awt asi. Upa, ngâksia takkaro leh kê karo hen an kal lai le, an taw lang bû hen Aigupta rangah an mualphoh lai.

⁵ Sudan rinhsanhtu leh Aigupta zumhtu chu an lung a fiang lai rawh le, an lungumnâk chu a vei lai rawh.

⁶ Chu tik chun, Philistia ram ah um mi tla nih, Asiria lal lianchem thawk hen kan ngauhsan chem mi tla lakah thil a hawng tlung zia hi zauhnik u! Zeitin kan him kho lai rawh?’ a ti.”