ISAI 19 - Bawm Common Language Bible Version

Pathian Nih Aigupta A Rêp Awt

¹ Hi hi Aigupta thu ah thuchah asi. LALPA chu sûm tlûnah chuan hen Aigupta ah a hawng kal. Aigupta ram ah milem tla chu a mâika ah an thir le, Aigupta minung tla chu an zer rawh.

² LALPA nih, “Aigupta ram sungah donâk ka siam lai le, u leh nau karah donâk leh zâwlbâwm leh zâwlbâwm kar lakah donâk ka lêngtir lai. Helnâk khuapi tla chu anmah leh anmah anna do lai, lalchem hel tla khawm thiltikhonâk ah zuam hen anna do lai.

³ Aigupta thiltum chu ka râwk lai le, an thinlung ah an dawn mi khawm ka râwk lai. Ṭangpi ding hen an milem tla an ngiar lai le, an va kal lai le, mithi thlarau kawhtu an simh lai le, mithi thlarau rangah thu an deih lai.

⁴ Aigupta mi tla chu lal sual tak leh ṭhalo tak an tlûnah lâirêltu sinah ka pêk na lai. Kei, LALPA Zeizawng tikhotu nih chu chu ka sim asi.”

⁵ Nile tiva mi tî tla chu â zûk lai le, chu tiva chu tâwm tâwm hen a hawng kang vima lai.

⁶ Tî luangnâk tla chu a kang dadauh lai le, a rim a nam lai. Lâiluang leh bua tla khawm a uai lai le,

⁷ Nile tiva kapah thil an chîng mi tla chu a châr lai le, sêm phin hen a um lai.

⁸ Mikip Nile tiva ah ei hâwl hen ngarâltu tla chu rûm hen an ṭap lai le; an lên leh an siau tla chu zei rua khawm asi lai lo rawh.

⁹ Puan mangṭhia tahtu tla khawm an lung a dawng lai le;

¹⁰ puan tahtu leh mi zungthiam tla khawm an ṭiak lai le, an thinlung a dawng lai.

¹¹ Zoan khuapi mi ruitu tla chu an â rawh! Aigupta ram ah mifing chem tla khawm nih krai ṭhalo tak an pêk! A lânah mithiam leh lalchem tla ruangrûl ah um, an si mi zeitin lalchem rangah an simh ngam zia?

¹² Aigupta lalchem, na mi fâifîm simhtu tla kha zeiah an um rawh? LALPA Zeizawng tikho nih Aigupta lakah thilti a tum mi chu an simh kho lai dahmawh.

¹³ Zoan leh Memphis ah mi ruitu tla chu an â rawh. Phun ruitu ding hen an si, sikhawmsele amah lo leiah an rui na.

¹⁴ LALPA nih nawknâk thu simhtu ah a siam na. Aigupta nih thil diklo kip ti hen zû rî hâwi hen a hâwr le, amah luak lakah a bah mi hâwi hen.

¹⁵ Aigupta ram ah minei leh mipâm, mi herh leh theih lo mi âukhawm nih an ṭangpi kho lo.

Aigupta Nih LALPA A Sawnh Lai Rawh

¹⁶ Aigupta mi tla chu nunau hâwi hen an zer tik ni ding a hawng tlung awt rawh. LALPA Zeizawng tikho nih anmah rêp ding hen a kut a lirh mi an muh tik chun lâu hen an thir lai.

¹⁷ Aigupta mi tla chu zei liau zawng ah Juda mi tla nih LALPA Zeizawng tikho nih anmah thah na ding hen a timhtuah mi thu theihtir na hen an lauh na lai.

¹⁸ Chu tik chun, Hebrai hawlh chu Aigupta khuapi panga ah mang asi lai. Chunah mi tla nih LALPA Zeizawng tikho min hen siat an tleih lai. Chu khuapi tla lakah pakhat chu “Nî khuapi” an ti lai.

¹⁹ Chu tik chun, Aigupta ram ah LALPA mâichâm a um lai le, LALPA sinah ap mi lungphun Aigupta ramri ah a um lai.

²⁰ Chu chu Aigupta ram ah LALPA Zeizawng tikho a um ti theihnâk asi lai. Chunah um mi zapi tla nih nehsawh an tuar tikah LALPA sinah ṭangpi an ngiar lai le, anmah ruangsuah ding hen âumawh pakhat a fial lai.

²¹ LALPA chu amah tak Aigupta mi tla sinah â langh lai le, amah sinah anna theihtir hen amah an sawnh lai le, bâwlnâk an hawng put lai le, an ap lai. A sinah thutiam bir tak an nei lai le, an thutiam zia hen an ti lai.

²² LALPA nih Aigupta mi tla chu a rêp na lai le, sikhawmsele a damh na lai. Amah leiah anna her lai le, an thlachamnâk a ngâi lai le, a damh na lai.

²³ Chu tik chun, Aigupta leh Asiria karah lam lian a um lai. Chu ram panih tla chu khatlei khatlei ah anna vel tawnh lai le, an phun nih hen munkhat hen Pathian an sawnh lai.

²⁴ Chu tik chun, Israel chu Aigupta leh Asiria mi tla hen bang cho hen an um lai. Chu phun thum tla chu laikulh zawzawng rangah malsâwmnâk an si lai.

²⁵ LALPA Zeizawng tikho nih mal a sâwm na lai le, “Ka mi Aigupta ram mi tla; nannih ka nan siam na mi Asiria mi tla; nannih ka mi thîm Israel tla, mal ka nan sâwm na lai,” a ti lai.