ISAI 18 - Bawm Common Language Bible Version

Pathian Nih Sudan A Rêp Awt

¹ Sudan ram tiva pîn leiah thla zâp hâu theihnâk ram a um.

² Chu ram thawk hen ram ruangrûl ah fial mi tla chu Nile va ah lailuang pûm ah an hawng a lawngh. Mifial chak tak tla, in leiah kîr u! Nan ram tiva nih a ṭhen mi leiah, nan phun chak tak leh thiltikho tak, mi taksa sâng tak leh tlawr tak tla, laikulh pumpi nih an ṭih mi sinah thuchah kîrpi u.

³ Tual tlûnah um mi zawzawng, ngâi u! Tlâng sâng tak tlûnah puanzâr thlâi ding mi chu zauh u! Tâwtawrâwt tum hâu ngâi u!

⁴ LALPA nih ka sinah, “Fângzûn nî sa lum liauah zân ah mi dâmtî hâwi hen leh sûn nî linh liauah nî chêu hâwi hen vân thawk hen ka hawng chuanh lai.

⁵ Grep rah kawih lânah, a pâr a tlawng liauah, grep min liau chirah Sudan tla chu grep zûn ṭeng nâmtê hen awldek hen an tan mi hâwi hen mêlma tla nih an veih na lai.

⁶ Kawrsen ruak tla chu va leh ramsa tla rangah mâk hen a um lai. ṭhâlpini ah va tla nih râwl rangah an tlanh lai le, busik ah ramsa tla nih an tlanh na lai,” a ti.

⁷ LALPA Zeizawng tikho nih hi bang tiva tla nih a ṭhen mi ram, phun chak tak leh thiltikho tak, mi sâng leh taksa tlawr tla, laikulh pumpi nih an ṭih na mi thawk hen thil ap a tawng ding mi tik chu a tlung awt rawh. LALPA Zeizawng tikho sawnhnâk, Zion Tlângah an hawng lai.