ISAI 16 - Bawm Common Language Bible Version

Moab Dîrmun Lungdawng A Kâinâk

¹ Ramkaro ah mi Sela khuapi thawk hen Moab mi tla nih Jerusalem ah lâirêltu sinah pêk ding hen dawrâ fa an kuat.

² Arnon Tiva kap ah an ngâk ko le, tumnâk lêm nei lo hen khatlei khatlei ah va nih a bû a kaltâk mi hâwi hen sawk hen an um.

³ Juda mi tla sinah, “Ti ding mi hawng kan simh u. Thing sûn nî sa lakah mi dâidul a kîknâk ah an siah mi hâwi hen hawng kan hum ule, nan thlaliah ah kanna dîn bâk lai. Kannih chu ramdang minung hawng tek mi kan si le; âukhawm nih hawng kan muh lo ding hen hawng kan thuh u.

⁴ Nan ram ah kan um lai. Thah ding hen hawng kan tumtu lakah mi hawng kan hum u,” an ti. (Nâunehnâk leh siatnâk chu a dawng lai le, ram râwktu khawm an kal lai rawh.

⁵ Churawhchun, David thlâk lakah mi lal ah a um lai le, mi zapi lakah dâwtnâk leh zumhkâinâk hen lâi a rêl lai. Thil dik chu a ti sawm lai le, repnâk hen thilti asi mi tla chu a zauh lai.)

⁶ Juda mi tla nih, “Moab mi tla anna zûm zia chu kan theih. Anna zûm zia leh anna sung-û tir zia khawm kan theih le, sikhawmsele anna khâwngnâk tla chu a karo asi,” an ti.

⁷ Moab mi tla chu lawksawngnâk an tuar mi ruangah an ṭap lai. Kir Heres khuapi ah buh thaw an ei mi tla an theih lai le, an ṭap lai. Lungdawng kâi tak hen nar an si lai.

⁸ Hesbon kiangah mi phâisen leh Sibmah mi grep dûm chu veih hen an um. Chubang lakah mi uain chu phun lakah lâirêltu tla nih an din tâwn. Veikhat chu grep zûn chu Jazer khuapi tiang a zâm le, saklei kângah chun ramkaro tiang, thlanglei kângah chun Tipi Thi varâl tiang a zâm.

⁹ Tuah Jazer ruangah ka ṭap mi hâwi hen Sibmah mi grep zûn ruang khawm ah ka ṭap. Mi fângzûn ding a um lo thlo ruangah lawmhtir ding hen Hesbon leh Elealeh ruangah ka mitthli a tlâ.

¹⁰ Tu chun phâisen ningno tak mun ah chun pakhat khawm anna lâwm lo. Chu grep dûm ah chun lasak leh âu mi pakhat khawm an um lo. Uain siam ding hen âukhawm nih grep an chîl lo le; lâwm hen an âu mi chu a dawng rawh.

¹¹ Moab ruangah ngaihsia hen ka rûm le, Kir Heres ruangah ka ngaih a sia.

¹² Moab mi tla chu an tlâng thenhlimh leiah leh an biakin leiah thlacham ding hen neng rê hen an kal le, sikhawmsele, chu nih chun zeikhawm a ṭhattir na lêm lo.

¹³ Chu chu Moab thu ah LALPA thuchah masa asi.

¹⁴ Tu lam chun LALPA nih, “Kum thum kar ko ah Moab tla neih rokual tak chu muh asi lai lo rawh. Mi tam tak lakah mi a thibang tâwmtê cho an um lai le, chak lo tak an si lai,” a ti.