ISAI 14 - Bawm Common Language Bible Version

¹ LALPA nih a mi Israel tla lakah khua a ruat nawlh lai le, amah mi ah a thîm na lai. Anmah ram ah a umtir nawlh na lai le, ramdang mi tla khawm an hawng lai le, chunah chun an sinah an um lai.

² Phun tam tak nih Israel mi tla LALPA nih a pêk na mi ram leiah kîr ding hen an ṭangpi na lai le, chunah chun phundang tla nih sal hâwi hen Israel tla chu an rian an ṭuan piak na lai. Israel rangah nehtu tla chu, Israel nih an neh rûl bâk lai rawh le, anmah nehsawhtu tlûnah Israel tla nih lâi an rêl bâk lai rawh.

Babulon Lal Chu Laikulh Thihnâk Ah A Um

³ LALPA nih chun Israel mi tla chu an nganfâk leh tuarnâk leh zângran ko hen rian fâk tak an ṭuantir na nâk lakah mi chu a âwltir na lai rawh.

⁴ Chu hâwi hen a ti tikah chun, Babulon lal chu an zauhnawmh lai rawh le: “Lalchem sual chu a tlû rawh! Âukhawm a nehsawh na lai lo rawh!

⁵ LALPA nih chun lâirêltu sual,

⁶ thinthawk tak hen mi tla nehsawhtu, a neh na mi phun tla nehsawh bâng duh lo mi thiltikhonâk chu a dawngtir rawh.

⁷ Tu lam chun a dawnghnâk ah laikulh pumpi lâwmnâk leh lungngamnâk a um le, mikip lâwm hen la an sak.

⁸ Theipi thing leh Lebanon ah mi sidar thing tla chu lal a tlû mi ruangah anna lâwm rawh, tu chun anmah hâutu âukhawm umlo rawh hen a kal ving rawh ruangah!

⁹ “Laikulh thihnâk chu Babulon lalchem lawmh ding hen â tîm ko. Tual tlûnah mi thiltikho tak thlarau tla an hawng châng rawh. Laltophah tlûnah to mi lal tla thlarau khawm an hawng thawk rawh.

¹⁰ An ektê hen Babulon lal sinah ‘Nang khawm tuah kanmah hâwi hen na chak bâk lo rawh! Kan lakah mi pakhat na si bâk!

¹¹ Ṭingṭang tum hen zahkâi tak hen na um le, sikhawmsele tu lam chu laikulh thihnâk ah na um rawh. Tholung nâwngah na it le, changchêl chu puan hâwi na vurh,’ an ti.

¹² “Nang Babulon lalchem, deirêl ârfi chêu tak, vân ah mi chu na tlâ rawh! A lân chun phun tla na neh le, tu lam chun tual ah lawnh hen na um rawh.

¹³ Vân ah kâi hen, ârfi a sâng chem mi tlûnah na laltophah siah na tum. Pathian tla pûmnâk marlei kâng tlâng tlûnah lalchem hâwi hen to ding na tum.

¹⁴ Sûm tlûnah kâi hen Zeizawng tikho hâwi hen ka um lai na ti.

¹⁵ Sikhawmsele, chu hâwi ding ngâk hen, laikulh thihnâk thûk chemnâk ah put hen na um.

¹⁶ “Thihnâk nih an zauh lai le, a kâ an âng nawh lai. “Hi minung hi ma tual ninh hen lalram tla thirtirtu chu?

¹⁷ Hi minung hi ma khuapi tla râwk hen ramkaro ah siamtu chu? Hi minung hi ma rêngtlâ mi suah duh lo hen in leiah tlungtir na lotu chu?’ an ti lai.

¹⁸ Lalchem zawzawng tla chu tual tlûnah an thlân rokual ah an zâu.

¹⁹ Sikhawmsele nang lam chu thlân nei lo hen na ruak chu thu ding hen lawnh asi. Râltuknâk ah kawrsen a thi mi tla ruak nih an khuh dep le, an sinah lungkhur sungah lawnh hen na um le, pil ving hen na um.

²⁰ Na ram na râwk le, mi tla na thah na ruangah lalchem dang tla hâwi hen vûi na si lai lo. Na dâwngsungkhur sual chu pakhat khawm zuah asi lai lo.

²¹ Thahnâk chu a dawmh rawh seh! Hi lalchem fapa tla hi an thlâktu tla sual ruangah an thi lai. An lakah pakhat khawm lâi an rêl hen, khuapi an tuah lai lo rawh,” a ti.

Pathian Nih Babulon A Râwk Awt

²² LALPA Zeizawng tikho nih, “Babulon ka do lai le, ka râwk hep lai. Ngâksia leh a thibang zeikhawm ka siah awtlo. Kei, LALPA nih chu chu ka sim asi.

²³ Babulon chu nêngthû ah ka siam lai le, chunah chun sûmbuh tla an um lai. Zeizawng phiat pengnâk munphiah hen Babulon chu ka phiat awt. Kei, LALPA Zeizawng tikhotu nih ka sim asi,” a ti.

Pathian Nih Asiria A Râwk Awt

²⁴ LALPA Zeizawng tikho nih, “Ka thiltum chu a hawng tlung lai. Ti ding ka tum mi chu ti asi lai.

²⁵ Israel ram ah mi Asiria chu ka veih lai le, keimah tlâng tlûnah ka lamhbêk na lai. Ka mi tla Asiria liangbat leh an thilrit phurh lakah mi chu ka suah na lai.

²⁶ Hi hi laikulh rangah ka thiltum leh phun tla rêp ding hen ka bân ka phar,” ti hen siat a sirh.

²⁷ LALPA, Zeizawng tikhotu nih hi hi ti a tum asi; rêp ding hen a bân a phar mi chu âukhawm nih an khap kho lo.

Pathian Nih Philistia A Veih Na Ding Mi

²⁸ Hi hi lalchem Ahaz thih kum ah thuchah phuang mi chu asi:

²⁹ Philistia mi tla, an vuak na mi nan vuakfung chu a kiak rawh le, sikhawmsele, lâwm ding asi khawm nan theih loh. Rûl pakhat a thi le, a ruangrûl ah rûl ṭhalo dauh a hawng suak. Rûl tî chu dragon zuang kho mi ah a keuh.

³⁰ LALPA chu a mipâm tak tla rangah dawrâpu asi lai le, him tak hen a umtir na lai. Sikhawmsele, nannih Philistia mi tlûnah pâm fâk tak a hawng tlungtir lai le, pakhat khawm dam hen an mâk na lai loh.

³¹ Nannih Philistia khuapi zawzawng tla, ṭangpi ngiar hen âu u! Ningṭih tak hen nan ektê hen um u! Marlei thawk hen valeidip khû a hawng, an sinâk chiauah kawrsen râlṭha an si.

³² Philistia ram thawk hen mifial a hawng mi chu zeitin kan sâng na lai? LALPA nih Zion chu a birhtir le, tuartu a mi le tla nih chun chunah chun himnâk an tawng lai ti hen kan simh na lai.