ISAI 13 - Bawm Common Language Bible Version

Pathian Nih Babulon A Rêp Awt

¹ Hi hi Babulon thu Amoz fapa Isai nih Pathian sin thawk hen a theih mi chu asi.

² Tlâng karo tlûnah râltuknâk puanzâr thlâi hen a um! Kawrsen tla sinah chun khuapi zûm kulh kawtkâ do ding hen theihtirnâk ding ah nan bân zangh u, ti hen auh na u.

³ LALPA nih a zumh na mi leh a rinhsanh na mi kawrsen tla chu râltuk thenhlimh do ding leh an lakah a thinthawk mi minung tla rangah rêp na ding hen a kawh na.

⁴ Tlângah mi zapi minung rokual tak âu hâu, phun tla leh lalram tla anna pûm mi hâu chu ngâi u. Kawrsen tla, LALPA chu râltuk ding hen a kawrsen rual a timhtuah liau asi.

⁵ Tual dawnghnâk ah mi ram lât tak thawk hen an hawng kal. LALPA chu ram pumpi râwk dep ding hen thinthawk bû hen a hawng kal.

⁶ Nganfâk ruangah râk u! Zeizawng tikho nih siat leh râwknâk a hawng tlungtir awt mi ni LALPA ni chu a nâi rawh.

⁷ Mikip kut chu a uai lai le, mikip râlṭhatnâk khawm a vei lai.

⁸ An ektê hen an lâu lai le, nganfâknâk nih a neh na lai le, nunau nganfâk mi hâwi asi lai. Ningṭih hen anmah leh anmah anna zauh lai le, an mêl chu ningzaknâk hen a mûi lai.

⁹ LALPA thinthawknâk ṭihnungkâi tak leh a thinrunhnâk ni chu a nâi rawh. Tual chu ramkaro hâwi hen siam asi lai le, misual zawzawng chu veih an si lai.

¹⁰ Ârfi zawzawng leh firuk tla khawm an chêu lai lo le; nî khawm a hawng suak tikah a mûi lai le, thlâ khawm a chêu lai lo.

¹¹ LALPA nih, “Tual tlûnah siatnâk ka hawng tlungtir lai le, an sual ruangah mi sual tla zawzawng ka rêp na awt. Mi zûm tla chu ka nâutir lai le, zauhnawmh mang tla leh mi ṭhalo tla chu ka rêp na lai.

¹² A thibang tla chu ngûn ngâk hen tawng an har awt.

¹³ Kei, LALPA Zeizawng tikho nih ka thinthawknâk ka langh ni ah chun, vân ka thirtir lai le, tual chu a um mun ah mi chu ṭhial rê ka ninh lai.

¹⁴ “Ramdang minung Babulon ah um mi tla chu an ram leiah an tek lai le, sa kahtu lakah mi sazuk a tek hâwi hen leh dawrâ rual vêngtu nei lo mi hâwi an si lai.

¹⁵ Tleih hen an um mi tla chu thi thlo hen sunh an si lai.

¹⁶ Âukhawm ṭangpitu um lo liauah, an fasêm tla chu thi thlo an vuak na lai le, an in tla an rawk lai le, an nupi tla an tleihrêm na lai,” a ti.

¹⁷ LALPA nih, “Babulon do ding hen Medes tla chu ka fawrh na. Chu tla nih chun tangka zeikhawm an siar lai lo, ngûn hen lêm kho khawm an si lo.

¹⁸ An chanhtiang leh thalzum hen tlangvâl tla an thah na lai. An fasêm tla lakah khua an ruat lai lo le, ngâksia tla lak khawm ah pawi tinâk an nei lai lo.

¹⁹ Babulon chu lalram zawzawng lakah â dawh chem mi asi; a minung tla khawm anna zûm phah. Sikhawmsele Kei, LALPA nih Sodom leh Gomorah tlûnah ka ti mi hâwi hen Babulon chu ka nautir lai.

²⁰ Chunah chun âukhawm an um lai lo rawh. Arab velva tla khawm nih chunah an puanin an zâr lai lo rawh le, dawrâpu khawm nih chunah chun a ranrual a tlawngtir lai lo rawh.

²¹ Ramsa umnâk ramkaro mun asi lai le, sûmbuh bû khuarnâk asi lai. Chunah chun tivarak ngâwngsâu a um lai le, sazâ tla chu â râwk mi mun ah an pang lai.

²² Insâng leh lal in tla chu chingngia leh kâwlui âu hâu a thang khâwk lai. Babulon tik chu a hawng tlung rawh! A ni tla a dawng dêng rawh,” a ti.