ISAI 11 - Bawm Common Language Bible Version

Thlangamnâk Lalram

¹ David thlâk lal chi chu thing hâu mi hâwi asi le; sikhawmsele a kûng bul lakah ṭeng thar tla a chawrh mi hâwi hen David thlâk tla thawk hen lal thar a hawng suak lai.

² LALPA thlarau nih finghnâk a pêk lai le, a mi tla lâirêl ding hen theihnâk leh thiamnâk a pêk lai. LALPA duhzia a theih hen a zah lai,

³ amah ê-aw ngâi hen lâwmnâk a tawng lai. A langh dân leh mi thusim ko hen lâi a rêl lai lo,

⁴ mipâm tla chu ṭha tak hen lâi a rêl piak lai le, ṭangpitu nei lo tla diknâk chu a ṭanh lai. A thupêk hen mi zapi rêp an si lai le, misual tla chu an thi lai.

⁵ Rep tak leh rangtling tak hen a mi tla lâi a rêl lai.

⁶ Dawrâ leh chingngia tla chu rem tak hen munkhat an um lai le, keitê tla chu kêlfa hen an bawk lai. Chawla leh chakeibaknei fa chu munkhat hen râwl an ei lai, ngâksia tetê tla nih an vêng na lai.

⁷ Chawpinu leh vawm tla munkhat hen râwl an ei lai le, an fa tla rem tak hen an bawk lai. Ranrual tla hâwi hen chakeibaknei tla nih fapawn an ei lai.

⁸ Rûl tûrnei kiangah ngâksia tla an pang mi khawm a chuk na lai lo.

⁹ Pathian tlâng thenhlimh, Zion tlûnah chun nganfâk pêk leh thilsual zeikhawm a um lai lo. Tipi tla chu tî hen a khat mi hâwi hen, ram chu LALPA theihnâk hen a khat lai.

Sal Tâng Tla An Kîr Lai

¹⁰ Phun tla zauhtirnâk ding ah David lal chi lakah mi lalchem thar a hawng um ding mi a nâi rawh. Lal khuapi ah anna pûm lai le, amah chu an zah lai.

¹¹ Chu ni a hawng tlung tikah chun Lalpa nih Asiria ram ah leh Aigupta ram ah um rih mi tla, Pathros, Sudan, Elam, Babulon, Hamat ram ah um mi leh tiva kapah um mi leh tikulh lakah um mi tla, kîrpi nawlh na ding hen a thiltikhonâk veikhat a mang nawlh lai.

¹² LALPA nih phun tla theihtirnâk ding puanzâr, Juda leh Israel anna rekrâwi mi tla, tual kil li thawk hen a pumh nawlh na awt ti theihnâk a thlâi awt.

¹³ Israel lalram chu Juda nih a nahsuah lai lo rawh le, Juda khawm Israel mêlma asi lai lo rawh.

¹⁴ Thurual hen thlanglei mi Philistia tla an do na lai le, saklei ah um mi tla khawm an rûn na lai. Edom leh Moab mi tla chu an neh na lai le, Amon mi tla nih an thu an ngâi piak lai rawh.

¹⁵ LALPA nih Suez Likâwlneng chu a kangtir lai le, Eufretis tiva kangtir ding hen thli lum a lêngtir lai le, mi âuzawng nih tan kho ding hen tivatê pasarih cho a siah lai.

¹⁶ Asiria ram thawk hen lam lian Israel mi thibang tla rangah a hawng um lai, Aigupta an kaltâk liauah an thlâktu tla rangah a um mi hâwi hen.