HOSEA 7 - Bawm Common Language Bible Version

¹ “Ka mi Israel tla damh na ding leh an sul-le-lam tluangtir ka duh zâwn khawm ah an sualnâk leh an ṭhatlonâk zawzawng ka muh tâwn. Pakhat leh pakhat anna perpet; in tla an siat le thil an fîr, zâwllâi ah mi an rawk.

² Hi bang an sualnâk zawzawng hi ka theih ko ti an theih dahlo; sikhawmsele an sualnâk nih a kulh pang le, thuh pheh kho na ding an si lo,” a ti.

Lal In Ah Phiarnâk

³ LALPA nih, “Mi nih an thilsual an ruatnâk hen lal leh milian tla an perpet na.

⁴ An ektê hen mi zumhkâilo an si. Mi an huatnâk chu lungthû kâ ah mei a muat mi, sang emtu nih sang em ding hen a timhtuah zet hen a sêm lo rih mi hâwi asi.

⁵ Lal puai tuah ni ah lal leh a rianṭuantu tla chu â thlo hen uain an dinh na.

⁶ Asi, an thinlung ruatnâk hen lungthû kâ mi mei hâwi hen an duah na. Zân khuadei hen an thinthawknâk chu mei a muat mi hâwi hen zînglei ah chun a hawng alh.

⁷ “An thinthawknâk a sa dak mi hen an lâirêltu tla chu an thah na. An lal tla chu pakhat khat hen an thah na. Sikhawmsele pakhat khawm nih ka sinah ṭangpi deih hen thla an cham lo,” a ti.

Israel Mi Leh Phun Tla

⁸ LALPA nih, “Israel mi tla chu sang tlang a tanbawlawk em mi hâwi an si. An kiangkam mi phun tla an rinhsanh le,

⁹ phun dang tla lakah anna ngauh mi nih an chaknâk a veih ti an theih loh. An ni tla chu rêl hep asi le, sikhawmsele chu hâwi asi ti an theih lo nget rih.

¹⁰ Israel mi tla zumhnâk chu anmah zolanghtu asi. Chubang zawzawng thil a hawng tlung khawm ah kei, LALPA, an Pathian sinah an hawng kîr lo.

¹¹ Israel chu lâilêng zeikhawm theihlo hen a zuang mi hâwi asi le, a masa chem hen a mi tla nih Aigupta chu ṭangpi an deih le, churawhchun Asiria sinah an tek.

¹² Sikhawmsele an kal liauah lên ka zâr lai le, va hâwi hen ka tleih na lai. Thilsual an ti mi ruangah ka rêp na lai.

¹³ “An vânduai rawh! An ka nawng le, ka lakah an hel. An vei lai, hum na ding ka duh le, sikhawmsele an ka sawnh dân a diklo.

¹⁴ Zumhkâi tak hen ka sinah thla an cham lo, sikhawmsele, lunglo tla ti dân hâwi hen an tlû hen an lung anna fâktir. Uain leh fâng tla duh hen thla an cham liau khawm ah lunglo tla hâwi hen an taksa an ât.

¹⁵ Thungâi an hel le, kei chu anmah dirhtu leh chaktirtu sikhawmsele ka lakah ṭhatlo an rawt.

¹⁶ Ka lakah mi chu thiltikhonâk nei lo pathian leikângah an hawng ka pialtâk. Sâikûk zumhkâilo â kuai mi hâwi hen an um. Anmah ruitu tla chu puar tak hen an hawlh ruangah siatnâk lakah an thi lai le, Aigupta mi tla nih an nihsanh lai” a ti.