HOSEA 5 - Bawm Common Language Bible Version

¹ “Nannih bâwlpu tla, hi hi ngâi u! Israel mi tla, ngâi u! Nannih lal dâwngsung si mi tla, ngâi u! Dik tak hen lâi nan rêl ding asi. Nan tlûnah lâirêlnâk a hawng tlung lai. Mizpah ah chun thang nan si le, Tabor tlâng tlûnah lên zâr mi nan si,

² Akasia khuapi ah chun khur thûk tak nan si, nan ektê hen kan rêp na awt.

³ Israel nih zei a bangh, ka theih ko. Ka lakah mi â thup kho ding asi lo, zumh a kâi lo, a mi tla chu kei hawng ka sawnh ding hen a tlâklo,” a ti.

Hosea Nih Ṭângdang Pâwm Thu Ah Simhfâinâk

⁴ Pathian sinah an hawng kîr ding mi an thilsual ti nih a kham pang. Milem an sawnhnâk a zual tuktarâi le, LALPA an theih phah lo rê.

⁵ Israel mi tla zumhnâk chu an tlûnah a âu. An sualnâk nih a bah hen a tlûktir na le, Juda mi tla khawm an sinah an tlû bâk.

⁶ LALPA sinah bâwlnâk ah an dawrâ leh an ranrual tla an put le, sikhawmsele an rangah zeikhawm a ṭhatnâk a um lo. A kaltâk na rawh ruangah amah chu an tawng kho lo rawh.

⁷ LALPA lakah zumh an kâi lo le; an fa tla khawm anih tâ an si lo. Churuangah tuah anmah leh an ram chu a vei sawm lai.

Israel Leh Juda Donâk

⁸ Gebeah ah râltuknâk tâwtawrâwt tum u! Ramah ah râltuknâk hâu suah u! Bethel ah râltuknâk phuang u! Râltuk u!

⁹ Rêpnâk ni a hawng tlung rawh, Israel chu siat leh râwk hen a um lai. Israel mi tla, hi hi a hawng tlung ngelchel lai!

¹⁰ LALPA nih, “Juda ruitu tla nih Israel ram an rûn le, a ram an fîr piak mi thungâi ka thin a run. Churuangah tîlian tlung mi hâwi hen an tlûnah rêpnâk ka tawih awt.

¹¹ Israel chu nehsawhnâk a tuar le, a bîk hen a tâ asi mi ram chu a thlâu rawh, a san chu pêk ding nei lo mi tla rangah kal hen va ṭangpi na ding a êng ruangah.

¹² Israel tla tlûnah râwknâk ka tlungtir lai le, Juda tlûnah khawm râwknâk ka tlungtir lai.

¹³ “Israel nih a damlonâk a muh hen Juda nih â liam asi ti a muh tikah chun, Israel chu Siria lal rokual tak ṭangpi deih hen a kal lai le, sikhawmsele anih nih a ṭhattir na hen an mâ tla a damh kho na ding asi lo.

¹⁴ Chakeibaknei hâwi hen Israel leh Juda tla chu ka do na awt. Keimah tak nih ka sâm dip na lai le, ka siah thlap na awt. Ka nûk ving na tik chun âukhawm nih an sanh kho na ding asi lo.

¹⁵ “Ka mi tla chu an sual ruangah fâk ual an tuar hen an ka hâwl rê tiang hen ka kaltâk na awt. An tuar ruangah an hawng ka hâwl lai mawh,” a ti.