HOSEA 14 - Bawm Common Language Bible Version

Hosea Nih Israel A Ngiarnâk

¹ Israel mi tla, LALPA nan Pathian sinah kîr u. Nan sualnâk nih an bahtir na le an tlûktir na.

² LALPA sinah kîr ule, nan thlachamnâk chu hi hi si seh, “Kan sual zawzawng hawng kan ngaihdam le, kan thlachamnâk hawng kan ngâi piak, kan tiamh mi hâwi hen kan sawr lai.

³ Asiria nih hawng kan hum kho dah ding asi lo, râltuknâk rang tla khawm nih hawng kan hum kho lai lo, kan milem tla sinah kan pathian na si kan ti lai lo rawh. LALPA âu sin khawm pial lotu tla sinah khua na ruat,” a ti.

LALPA Nih Israel Mi Rangah Nunchan Thar A Tiamh Na

⁴ LALPA nih, “Ka sinah ka mi tla chu ka kawh nawlh lai. Ka thinlung zawzawng hen ka dâwt na lai le, an lakah ka thin a run lai lo rawh.

⁵ Israel mi tla sinah, ram châr lakah ruah sûr mi hâwi kasi lai. Chawmpâr hâwi hen an ên lai, Lebanon ah thing tla hâwi hen ram bir tak an thlâk lai.

⁶ Chawrh thar hen an nung lai le, oliv thing tla hâwi hen anna dawh lai. Lebanon tlângah sidar thing hâwi hen an rimthâw lai.

⁷ Keimah zauhkhenhnâk tangah veikhat chu an um nawlh lai. Dûm ah thil ningno hâwi hen an um lai le, grep zûn hâwi hen an rah lai le, Lebanon tlângah mi uain hâwi hen an min a thang lai.

⁸ Israel mi tla chu milem hen tlâinâk an nei lai lo rawh; An thlachamnâk ka sâng lai le, keimah nih ka zauhkhenh lai; Thing a ring kumza mi hâwi hen ka dawrtir na lai le, Kei chu an rangah malsâwmnâk bul kasi lai,” a ti.

Thu Dawnghnâk

⁹ Hinah rîn mi tla hi fing tak hen theihthiam mi nih chun thinlung ah kil na seh. LALPA lampi tla chu a dik le, mirep tla nih chu chu an zûl le, an nung. Sikhawinsele misual tla nih an siarlo ruangah an bah le, an tlû.