HOSEA 13 - Bawm Common Language Bible Version

Israel Tlûnah Lâirêl Lîmnâk

¹ A lânah Efraim phun tla nih thu an sim liauah Israel phun dang tla an lâu le, Efraim tla rangah an zah na. Sikhawmsele mi nih Baal an sawnh mi ruangah an thi lai.

² Thîr milem tla leh tangka milem tla, minung thinlung ruatnâk leh kut hen siam mi sawnh hen an sual vima nget rih, “An sinah bâwlnâk pêk u,” ti hen thu an sim. Zeitin minung nih chawchal lem a bangh mi an châwchawk kho zia!

³ Churuangah hi bang minung tla hi zînglei ah mi dâmtî a vei ving mi hâwi an si lai. Fâng khâwngnâk ah fapawn thli nih a ranh mi hâwi leh palang lakah mi meikhû a suak mi hâwi an si lai.

⁴ LALPA nih, “Kei, LALPA, Aigupta thawk hen an suakpi natu chu kasi. Keimah lo chu Pathian nan nei lo. Keimah lâwng hi ruang an suah natu kasi.

⁵ Ramkaro châr ah ka nan kilkâwi na mi nan si.

⁶ Sikhawmsele, ram ṭha ah nan lût le, nan paw a khawp le, nan duh mi a tling rawh, churawhchun nanna zûm le, nan ka philh rawh.

⁷ Churuangah chakeibaknei hâwi hen ka nan do lai, keitê hâwi hen na lampi ah ka nan bawh awt.

⁸ Vawm a fa a thlâu mi hâwi hen ka nan do lai le, ka nan thlêk ver lai. Na um mun ah chakeibaknei hâwi hen ka nan veih lai le, ramsa hâwi hen ka nan sâm dip lai.

⁹ “Israel mi tla, ka nan veih na awt! Âunih a nan ṭangpi na lai rawh ne?

¹⁰ Lal leh ruitu tla nan ngiar na, sikhawmsele annih nih zeitin phun an hum kho awt?

¹¹ Ka thinrun bû hen lal tla ka nan pêk na le, ka thinthawknâk hen ka lâk ving na awt.

¹² “Israel tla sualnâk chu singsiah asi, chu an singsiah mi chu him tak hen kil asi.

¹³ Israel nih chun nung ding hen tik a nei le, sikhawmsele ngâksia a suak ding mi a nu pawsung ah a suak duh lo mi hâwi hen ti ding hen a â tuktarâi.

¹⁴ Hi minung tla hi laikulh thihnâk lakah mi leh thihnâk thiltikhonâk lakah mi ka hum na awtlo. Laikulh thihnâk, siat leh râwknâk hi bang minung tla tlûnah hin hawng tlungtir khawm le, pawi ka ti awtlo.

¹⁵ Israel tla chu belh hâwi hen ningno khawmsele ramkaro lei thawk hen thli lum ka hawngtir lai le, an tinungva leh an tikhurchawh tla a kang hep lai. Thilsung zawzawng a lâk hep lai.

¹⁶ Samaria chu ka lakah a hel ruangah rêp asi lai. A mi tla chu râltuknâk ah an thi lai le, fasêm tla chu tual ah lawnh an si lai. Nunau a râi mi paw chu an khei lai,” a ti.