HOSEA 11 - Bawm Common Language Bible Version

A Mi Tla Hel Mang Rangah Pathian Dâwtnâk

¹ LALPA nih, “Israel chu ngâksia asi liauah ka dâwt le, Aigupta ram ah mi chu ka fapa rangah ka kawh.

² Sikhawmsele ka kawh bilik leh a ka pialtâk dauh. Ka mi tla chu Baal sinah anna bâwl le; milem sinah rimthâw an duah.

³ Sikhawmsele kei chu, Israel rangah kal dân sîntirtu kasi. Ka bân hen ka mi tla chu ka ruai na le, keimah vêng hen an um mi an theih lo.

⁴ Zângfahnâk hen ka kawh na le, ka dâwt na. Ka châwi na le, ka ṭâng tlûnah ka pawm na le, anmah leiah ka kûn le, ka châwm na.

⁵ “Ka sinah kîr ding an duh lo, churuangah Aigupta leiah an kîr lai le, Asiria nih an tlûnah lâi a rêl lai.

⁶ Râltuknâk nih an khuapi a phiat dep lai le, an khuapi kulh kawtkâ tla chu a râwk dip lai. Thil an ti mi ṭha chem ah an ruat ruangah ka mi tla an râwk na.

⁷ Keimah thawk hen her ding an tum êu. An lakah phâisen nâwnnâk thâng hen a um ruangah an âu lai le, sikhawmsele âukhawm nih an thawh piak na lai lo.

⁸ “Israel, zeitin kan mâk kho na lai? Zeitin hen kan kaltâk kho na lai? Admah ka râwk mi hâwi hen kan râwk na hen Zeboim ka ti mi hâwi hen kan tikho na lai ma? hâwi ti ding hen ka thinlung ah a um lo. Ka nan dâwt na nâk a fâk tuktarâi:

⁹ Ka thinthawknâk hen kan rêp na lai lo; Israel chu ka veih lai lo rawh. Minung silo hen Pathian kasi dangâiah. Kei, mi thenhlimh chu nan sinah ka um. Thinrun bû hen nan sinah ka hawng lai lo.

¹⁰ “An mêlma tla lakah chakeibaknei hâwi hen ka hûk tikah chun ka mi tla nih an hawng ka zûl lai rawh. Thlanglei thawk hen khulrang hen ka sinah an hawng lai.

¹¹ Aigupta thawk hen va hâwi hen chak tak hen an hawng lai le, vaṭhu hâwi hen Asiria thawk hen an hawng lai. An in ah ka tlungtir nawlh na lai, kei LALPA nih ka sim mi asi,” a ti.

Israel Leh Juda Chu Mawh Hen An Um

¹² LALPA nih, “Israel nih an âwkrâwl thusim leh an perpetnâk nih an hawng ka kulh pang. Juda mi tla khawm nih, kei, mi zumhkâi leh Pathian thenhlimh tlûnah an hel kumza nget rih.