HOSEA 10 - Bawm Common Language Bible Version

¹ Israel mi tla chu grep zûn rah tak mi hâwi an si, an sul-le-lam tluang hen an um dadauh le, an mâichâm siam khawm a tam dadauh. An ram ah thil suak a tam dadauh le, an sawnh mi lungphun thenhlimh dawh tak an siam mi sawnh ding hen a tam dadauh.

² An thinlung ah perpet mang mi chu tuah an tuar ding asi. Pathian nih an mâichâm tla leh an lungphun thenhlimh tla chu a râwk lai.

³ Hi bang minung tla nih hin, “LALPA kan ṭih lo ruangah lal kan nei lo mi asi rawh. Sikhawmsele lal nih kan rangah a ti kho mi a um awt?” an ti sawm teh lai.

⁴ Thu salam an sim le, âwkrâwl hen thu an tiamh le, zeikhawm silo mi remnâk an siam. Diknâk chu diklonâk ah a hawng a chang le, phâisen nâwn mi lakah belh tûrnei a kho mi hâwi an si.

⁵ Samaria khuapi ah um mi tla chu an lâu lai le, Bethel ah an ngûn chawchal lem an thlâu mi ruangah lungfâknâk an nei lai. Anmah leh milem sawnhtu bâwlpu tla nih an ṭappi lai. An ngûn milem rokual chu a vei tikah thungâi an lungfâkpi lai.

⁶ Chu milem chu Asiria leiah an kalpi lai le, tlawmhnâk rangah lal sinah an pêk lai.

⁷ ‘Thing hâwng tî tlûnah mi hâwi hen an lal chu an kalpi ving lai.

⁸ Aven tlâng tlûnah Israel mi tla nih milem an sawnhnâk mun khawm râwk asi lai. An mâichâm chu bualingnei leh belh nih a khuh dep lai. Mi tla nih tlâng sâng tla sinah, “Hawng kan thuh! ” an ti lai le, tlâng tênâu sinah, “Hawng kan khuh!” an ti lai.

LALPA Nih Israel Tlûnah Lâirêlnâk A Phuang

⁹ LALPA nih, “Israel mi tla nih Gibeah ah thilsual an tinâk thawk hen bâng duh lo hen an sual vima nget rih. Gibeah râltuknâk ah tleih hen an um lai.

¹⁰ Hi misual tla hi ka do lai le, ka rêp na awt. Phun tla chu an lakah thu anna rual lai le, an sual tam tak ruangah rêp hen an um lai.

¹¹ “Israel mi tla chu veikhat rang chun chawlâ fâng chîl ding hen zawngtir zet mi hâwi asi. Sikhawmsele a ngâwng dawh tak lakah phâisen nâwnnâk ngul bah hen rianṭuan har dauh pêk ding hen thuamh ka tum. Juda chu phâisen nâwnnâk ngul ka nûktir lai le, Israel chu phâisen nâwnnâk thîr zum ka nûktir lai.

¹² Nan rangah ‘Tual thar nâwn ule, rêpnâk phun hen malsâwmnâk ât ule, ka sinah nanna pumpêknâk a lang lai. Kei, nan LALPA sinah nan hawng ding hen a tik a tlung rawh le, a hawng lai le, nan tlûnah malsâwmnâk ka nan tawih lai,’ ka ti.

¹³ Sikhawmsele, chu hâwi ti ngâk hen sualnâk nan phun le, a rah nan kawih, nan âwkrâwl thusim nih a rah a hawng suah mi chu nan ei. “Nan kari leh kawrsen a tam mi nanna rinhsan ruangah, nan mi tla lakah râltuknâk a hawng tlung lai le, nan kulh zawzawng a râwk hep lai.

¹⁴ Lal Salman um liauah Betharbel khuapi râltuknâk ah a râwk dep le, nu leh an fa tla a thah ver na liau mi hâwi asi lai.

¹⁵ Nannih Bethel khua mi tla, thil ṭihnungkâi nan ti mi ruangah chu hâwi chu nan lakah a hawng tlung awt. Tuknâk â dawmh kâ hen Israel lal chu a thi sawm lai a ti.