HOSEA 1 - Bawm Common Language Bible Version

¹ Hi hi Uziah, Jotham, Ahaz leh Hezekiah Juda lal ansi liau ah leh Jehoash fapa Jeroboam Israel lal asi liau ah Beri fapa Hosea sinah LALPA nih thu a chah mi chu asi.

Hosea Nupi Leh An Fa Tla

² LALPA nih Hosea mang hen Israel tla sinah thu a simtir liau ah Hosea sinah, “Kal le, nupi va nei le, na nupi chu mi zumhkâilo asi lai le, nan fa tla khawm amah hâwi an si lai. Chu hâwitê hen ka mi le tla nih an hawng ka mâk le, zumhkâilo hen an um, a ti.

³ Churawhchun, Hosea nih nunau a min Gomer Diblaim fanu a umpi rawh. Fapa tîr an nei nûnah,

⁴ LALPA nih Hosea sinah; “Israel lal chu amah thlâktu Jehu nih Jezreel ah mi a thah mi ruangah ka rêp awt mi a sâwt awtlo ruangah ‘Jezreel’ ti hen a min ah sak. Jehu lal sinâk chu ka dawngtir awt rawh.

⁵ Chu tikah chun Jezreel Vakuam ah Israel kawrsen thiltikhonâk chu ka veih lai,” a ti.

⁶ Gomer nih fa panihnâk a nei le, chu chu nunau asi, LALPA nih Hosea sinah, “Israel mi tla rangah ka dâwtnâk ka langh lo hen ka ngaihdam na awtlo rawh ruangah, a min ah ‘’Lo-ruhamai’’ (Dâwtlo) ti hen sak.

⁷ Sikhawmsele Juda mi tla rangah ka dâwtnâk ka langh lai. Kei, LALPA, an Pathian nih ka hum na lai le, râltuknâk nâmsâu mawh chanhtiang leh thalzum, mawh rang tla leh a tlûnah chuan mi hen mawh an lakah ka tlungtir lai lo,” a ti.

⁸ Gomer chu a fanu nûk a tlei nûnah a râi nawlh le, fapa dang a ring.

⁹ LALPA nih Hosea sinah, “Israel mi tla chu ka mi tla an si awtlo ruangah leh an Pathian kasi awtlo rawh ruangah ‘’Lo-ammia’’ (Ka mi tla an silo) ti hen min sak,” a ti.

Israel Chu Dirhnawlh Hen A Um Ding Asi

¹⁰ Israel mi tla chu tipi mi sep hâwi hen an tam lai le, rêl châwklo leh tah châwklo rê an si lai. Tuah Pathian nih an sinah, “Ka mi tla nan si lo,” Sikhawmsele “Pathian nung fa tla nan si” an ti na ding ni chu a hawng tlung lai.

¹¹ Juda mi leh Israel mi tla chu anna tlâi nawlh lai, an rangah ruitu pakhat an thîm lai le, an ram ah tluang tak hen an ṭhanglian nawlh lai. Jezreel ni chu ni rokual tak a hawng si lai!