GENESIS 7 - Bawm Common Language Bible Version

Buanso Thu

¹ LALPA nih Noa sinah, “Na dâwngsung tla hen lawng ah lût ule, nangmah pakhat cho hi laikulh pumpi ah thil dik titu na si ti ka nan theih.

² Sawnhnâk ding ah sa thenhlimh bawp sarih chiau siah le, sa thianglo lakah mi khawm bawp khat chiau siah na.

³ Vâ chi kip lakah mi bawp sarih siah rawh. Hi tual tlûnah ramsa leh vâ tla chi kip an nung hen an zan nawlh khonâk ding hen.

⁴ Tu thawk hen ni sarihnâk ah thil nung ka siam mi zawng veih ding hen ni sâwmli leh zân sâwmli ruah ka sûrtir awt,” a ti.

⁵ Chun, Noa chu LALPA nih thu a pêk mi zawng chu a ti rawh.

⁶ Buanso laikulh ah a tlung liauah Noa chu kum zaruk asi.

⁷ Buanso thawk hen him ding hen amah leh a nupi leh a fa tla leh an nupi tla hen lawng sungah an lût rawh.

⁸ Pathian nih thu a pêk hâwi hen ramsa chi kip a nunau leh a mipa, ran leh vâ, a thiang mi khawm a thianglo mi khawm,

⁹ Noa sinah lawng sungah an lût rawh.

¹⁰ A ni sarih nûnah chun buanso chu a tlung rawh.

¹¹ Noa chu kum zaruk a tling kum ah a thla nihnâk ni leisarih ni ah tual tangah mi tî zawzawng chu a hawng lang le, vân ah mi kawtkâ zawzawng chu â awng le,

¹² ruah chu ni sâwmli leh zân sâwmli tual tlûnah a hawng sûr rawh.

¹³ Chu ni ah chun Noa leh a nupi leh a fapa pathum- Sem, Ham, Japhet leh an nupi tla hen chun lawng ah an lût rawh.

¹⁴ An sinah chun ramsa chi kip vulh mi leh mâng ah mi a lian a mê, vâ chi kip an lût bâk.

¹⁵ Pathian nih thu a pêk mi hâwi hen thil nung chi kip,

¹⁶ a nunau leh a mipa chu Noa sinah lawng ah an lût bâk rawh. Churawhchun, LALPA nih Noa dunglei ah kawtkâ chu a khâr rawh.

¹⁷ Tî chu a hawng sâng vima le, ni sâwmli tiang hen lawng puanh rê hen tî chu a thûk rawh.

¹⁸ Tî chu a hawng thûk dadauh le, lawng chu a tlûn leiah â puan ko.

¹⁹ Tlâng sâng chem tla nîm ver hen a thûk rawh.

²⁰ Tlâng sâng tlûnah feet 25 lanh tiang hen a sâng.

²¹ Tual ah mi thil nung zawzawng, vâ tla, ramsa tla leh minung zawzawng an thi hep.

²² Tual tlûnah an thâw an suah mi zawzawng an thi hep.

²³ LALPA nih tual tlûnah thil nung zawzawng, minung zawzawng, ramsa tla leh vâ tla a veih hep na rawh. Noa leh a sinah an um mi tla cho an him.

²⁴ Ni zâ leh sâwmnga ding chu tî â zûk lo thlo.