GENESIS 49 - Bawm Common Language Bible Version

Jakob Thusim Madungchem

¹ Jakob nih a fapa tla a kawh na le, “Ka mâika ah hawng a pûm ver u, mâilei ah thil a hawng um ding mi kan simh na lai:

² “Jakob fa tla, hawng a pûm ule, Nan pa Israel thu ngâi u.

³ “Reuben, ka fa tîr, ka chaknâk leh minung Ka sinâk ah ka fapa tîr na si; Zumh chemnâk leh chak chemnâk Ka fapa dang tla ngâk hen na nei.

⁴ Nang chu tîlian hâu hâwi na si, Sikhawmsele, mi herh chem chu na si lai lo, Ka nupisûn na ihpi ruangah leh ka ihkhun na nawmh ruangah.

⁵ “Simeon leh Levi hi unau an si le, An riamnâm chu siat-le-râwk ding hen an mang.

⁶ A thup hen an thuruatnâk ah chun ka tel lai lo le, Anna to-hâwng nâk khawm ah telnâk ka nei lai loh, An thinrun hen mi tla an thah ruangah. Châwchal tla an pangpi hen khêng leh bei hen an siam.

⁷ An rât tuktarâi ruangah siat-le-rû um seh. An ṭhalo tuktarâi ruangah An tlûnah thinrunhnâk um seh. Israel ram lakah rekrâwi hen ka siam na lai. A mi le tla sinah ka thektham na lai.

⁸ “Juda nang chu na unau tla nih an sawr lai. Na leido tla chu an ngâwng lakah na tleih na. Na unau tla nih mâi an mûk lai.

⁹ Juda chu chakeibaknei hâwi asi, Sa a seh le, a pûk lakah a hawng kîr nawlh le, Â zangh le, a it. Âukhawm nih an tawngh ngam lo.

¹⁰ Juda nih lal ṭhianṭhunh â ting lai le, A thlâk tla khawm nih lâi an rêl kumza lai. Phun tla nih a sinah siah an pêk lai. Ê-aw ngâi tak hen a mâika ah an kûn lai.

¹¹ A sanatung fa chu grep zûn lakah a rêng le, Grep zûn ṭha chem mi lakah, A puan chu grep hâng thisen hen a suk lai.

¹² A mit chu sen kur hen uain a din ruangah a um. A hâ chu nûk hâng a dinnâk ah a ngo.

¹³ “Zebulun chu tipi kapah a um lai, A vakap chu lawng dinhnâk mun asi lai. A ramri chu Sidon tiang asi lai.

¹⁴ “Isakar hi sanatung a kêngphah karah a zangh hen, It mi ngâk hen ṭhat dauhnâk a nei lo.

¹⁵ Sikhawmsele, dinhnâk mun ṭha chu a tawng le, Ram chu nuam a ti. Thilrit phurh ding hen a kêng a niamh le, Sal hâwi hen rian an ṭuantir êu.

¹⁶ “Dan chu a mi tla lâirêltu asi lai. Israel dang tla hâwi ber hen an um lai.

¹⁷ Dan chu lamvâu mi rûl hâwi asi lai le, Rûl tûrnei lam sîrah mi hâwi hen, Rang kedil a chuk le, A tlûnah â chuan mi pa chu Tla ving a thing ding hen.

¹⁸ “LALPA, na ruangsuahnâk ka ngâk.

¹⁹ “Gad chu mifîr rual nih an do lai le, Sikhawmsele â her lai le, a ṭhâwl na lai.

²⁰ “Aser ram nih chun fâng neihnâk a suah lai. Lalchem ei tlâk ding mi buh a pêk lai.

²¹ “Naphtali chu thawsuak tak hen sazuk tek chak mi asi le, Sazuk fa lawmh thanuamkâi tak phurhtu asi.

²² “Josef chu tinungva mi ram sanatung hâwi asi le, Pangdâr ah ram sanatung fa hâwi hen.

²³ A leido tla nih râlṭha tak hen an do, An chanhtiang leh an lîthal zum hen an ṭhâwl.

²⁴ Sikhawmsele, a chanhtiang kûk chu a khauh kumza le, A bân tha chu chaktir hen a um, Jakob Pathian chak thiltikhonâk hen, Israel Vêngtu Dawrâpu chaknâk hen.

²⁵ A nan ṭangpitu chu na pa Pathian asi, Mal a nan sâwmtu Pathian chak chu Vân thawk hen malsâwmnâk ruah an pêktu, Tual tangah tî thûk tak siamtu, Ranrual tam tak leh ngâksia tla malsâwmtu,

²⁶ Fâng leh chawmpâr tla malsâwmtu, A lânah mi tlâng sâng tla malsâwmtu, Zungzâl tlâng thawk hen lâwmnâk thil tla chu Bâwngmal sâwmnâk chu Josef lû tlûnah um seh, A unau tla thawk hen tlâng dang pakhat tlûnah um seh.

²⁷ “Benjamin chu chingngia râng hâwi asi. Zîng leh zân hen a thah le, a veih na” a ti.

²⁸ Hi tla hi Israel phun leinih an si le, chun, hi hi an pa nih a fapa tla kip sinah thuchah duhkâi tak a simh na mi chu asi.

Jakob Thihnâk Leh Vûinâk

²⁹ Jakob nih a fapa tla thu a pêk na le, “Tu chun ka mi le tla hâwi hen ka thi bâk awt rawh le, Kanaan ram ah, Mamre saklei ah

³⁰ Makpela pûk ah Hit mi Ephron phâisen ah ka pa tla sinah hawng ka vûi bâk u, Abraham nih phûmnâk ding hen chu phâisen leh pûk chu Ephron sinah a châwk mi asi.

³¹ Chunah chun, Abraham leh a nupi Sari khawm an vûi; Isak leh a nupi Rebek khawm an vûi; kei khawm nih chunah Leah ka vûi.

³² Phâisen leh a pûk hen Hit mi thawk hen châwk mi asi, chunah chun hawng ka vûi u,” a ti na.

³³ Jakob chu a fa le tla sinah thu a simh na mi a lîm rawh chun, a zâu nawlh le, a thi rawh.