GENESIS 47 - Bawm Common Language Bible Version

¹ Josef chu a unau panga hen lalchem sinah an va kal rawh. Anih nih, “Ka pa leh ka unau tla an ranrual leh an dawrâ rual hen, an neih zawzawng hen an hawng. Tuah Gosen ram ah an um,” a ti.

² Lalchem mâika ah a unau tla chu a langh na.

³ Lalchem nih thu a deih na, “Nan rianṭuan tak zei?” a ti. Annih nih an sâng le, “A lânah hawng kan thlâktu hâwi hen dawrâ vulhtu tla kan si,” an ti.

⁴ Annih nih, “Kanaan ram ah pâm a fâk tuktarâi le, kan ran tla rang khawm ah ram a ningno lo, churuangah hi ram ah kan hawng kal mi asi. Churuangah zângfahtê hen Gosen ram ah um kho ding hen hawng kan siang piak le kan duh,” an ti.

⁵ Lalchem nih Josef sinah, “Tuah na pa leh na unau tla chu an hawng tleng le,

⁶ Aigupta ram chu an ram asi rawh. Ram ṭha chemnâk Gosen ram ah umtir na. Chun, an lakah mi thiltikho dauh an um châng chun, keimah ranrual tlûnah hotu ah siam na,” a ti.

⁷ Josef nih a pa chu lalchem mâika ah a va langh bâk, Jakob nih lal chu mal a sâwm rawh.

⁸ Chun, lalchem nih a sinah, “Kum zeizat me na si rawh,” a ti.

⁹ Jakob nih a sâng le, “Ka khualtlawng kum chu kum zâ leh sâwmthum ka tling rawh, ka khualtlawng kum chu a tam chiam lo, hi sung hin hamh tak hen ka um le, hawng ka thlâktu tla hâwi tluk hen lam chun upa mi kasi lo,” a ti.

¹⁰ Jakob nih lalchem chu a dawnghnâk ah mal a sâwm le, a kal rawh.

¹¹ Josef nih lalchem nih thu a pêk hâwi hen, a pa leh a unau tla chu Ramases khuapi kiangah Aigupta ram sungah a umtir na le, a ram ah mi thil ṭha tla a pêk na.

¹² Josef nih, a pa leh a unau tla, a pa dâwngsung a lian a mê rang ding hen buh a pêk na.

Pâmnâk

¹³ Pâm chu a zual dadauh le, zei mun khawm ah buh a um lo rawh. Kanaan ram leh Aigupta ram sungah mi chu sungvâng hen an uai ver rawh.

¹⁴ Fâng an zuar mi man chu a khawlh le, lal sinah a pêk vima.

¹⁵ Kanaan ram leh Aigupta ram ah mi tangka a dih hep rawh chun, Aigupta ram mi tla chu Josef sinah an hawng le, a sinah, “Buh hawng kan pêk; hawng kan thihtir lah. Thil rang khat tal hawng kan ti piak! Kan tangka khawm a dih ver rawh,” an ti.

¹⁶ Josef nih an sinah, “Nan ran neih tla hawng put ule, tangka nan nei lo rawh asi chun buh hen kan thleng piak na lai,” a ti.

¹⁷ Churawhchun, an ran zawzawng fâng thlengnâk ding hen Josef sinah an kalpi le, an dawrâ tla, rang tla, kêl tla, ranrual leh sanatung tla hen fâng a thleng piak na. Chu kum ah chun an ran neih tla zawzawng hen fâng a thleng piak na le, a pêk na.

¹⁸ A kum nawlh ah a sinah an hawng le, “Pu, na sinah sim lo kho kan si lo, kan tangka zawzawng leh kan neih zawzawng nangmah kan pêk hep rawh. Zeikhawm an pêk ding kan nei lo rawh, kan tak pum leh kan ram cho lo chu.

¹⁹ Hawng kan thihtir rîlmâl lah le, kan rangah zeimawh hawng kan ti piak râu rawh, kan phâisen tla a karo hen umtir lah, kan ram leh kan mah hi fâng hen hawng kan châwk dâidua, lalchem sal kan si lai le, kan ram hi â ting lai rawh. Kan nungnâk ding hen fâng lam hawng kan pêk le, fachî kan phâisen ah chîng ding mi hen,” an ti.

²⁰ Josef nih lalchem rangah Aigupta ram zawzawng chu a châwk. Aigupta mi tla chu an mun tla zuar ding hen thu an pêk le, pâm thungâi a zual ruangah; chun, mun zawzawng tla chu lalchem tâ asi ver rawh.

²¹ Josef nih mipi tla chu Aigupta khatlei ram thawk hen a dawngh tiang hen sal ah a siam hep na.

²² Ram a châwklo mi chu bâwlpu mun cho asi, mun zuar ding khawm an nei lo rawh, lalchem nih an nungnâk ding hen lawh leikâng hen a pêk na rawh.

²³ Josef nih mi le tla sinah, “Tuah lalchem rangah nan mun hen kan châwk ver na rawh; nan phâisen ah nan tuh ding hen hinah fâng chi a um.

²⁴ Fâng zûn tikah anrang nga ṭhen hen anrang khat chu lal sinah nan pêk ding asi. A dang vial chu fachî rang leh nan dâwngsungkhur rangah si seh,” a ti.

²⁵ Annih nih an sâng le, “Kan nungnâk na hum le, thungâi na ṭha pu, lalchem sal tla ah kan um ko lai,” an ti.

²⁶ Churuangah, Josef nih an fâng neih zat anrang nga ṭhen hen anrang khat lalchem sinah pêk ding hen dân a siam piak na rawh. Hi dân hi tûtiang hen bir tak hen an nei kumza. Bâwlpû mun cho lalchem tâ asi lo.

Jakob Ngiarnâk Madungchem

²⁷ Israel fa tla chu Aigupta ram sung Gosen ram ah an um le, chunah chun thungâi an nei le, fa tam tak an nei rawh.

²⁸ Jakob chu Aigupta ram ah kum leisarih tiang a um le, kumza sâwmli leh kum sarih a tling tiang hen a um.

²⁹ A thihnâk ni a nâi rawh le, a fapa Josef chu a kawh le, a sinah, “Na kut kha ka êl karah hawng siah le, Aigupta ram ah hawng ka vûi lo ding hen thu hawng ka tiamh.

³⁰ Ka pa le vûinâk ah hawng ka vûi le ka duh; Aigupta ram thawk hen hawng ka zawnh ving ule, anmah vûinâk ah hawng ka vûi u,” a ti. Josef nih a sâng le; “Na sim mi hâwi hen ka ti lai ma kha a,” a ti.

³¹ Jakob nih, “Na ti ngelchel ding hen thu a tiam,” a ti. Josef nih thu â tiam le, Jakob nih a ihkhun tlûnah lâwmthu a sim.