GENESIS 40 - Bawm Common Language Bible Version

Josef nih Rêngtlâk Mi tla Mang A Simhfiang Mi

¹ A nehnûn chun Aigupta lalchem uain pêktu leh sang pêktu chu lalchem lakah thilsual an ti le,

² hi rianṭuantu panih tlûnah lalchem chu a thinthawk le,

³ Josef an siahnâk rêngin ah munkhat hen rêngtlâk vêngtu hotu in ah an siah na.

⁴ Rêngin ah hun sâwt tak an um le, hotu nih Josef chu anmah zauhkhenhtu ah a siam.

⁵ Zân khat chu rêngin ah uain pêktu leh sang pêktu mang an nei veve le, an mang chu â dang veve.

⁶ Josef chu zînglei ah an sinah a va kal le, an zûr thlo mi a muh na le,

⁷ a deih na, “Tusûn chu nan zûr chiam e!” a ti na.

⁸ Annih nih, “Kan panih hen mang kan nei veve le, chu mang chu hawng kan simhfiangtu pakhat khawm an um lo ruangah,” an ti. Josef nih, “Mang simhfiangnâk pêk khotu chu Pathian asi, nan mang chu hawng ka simh ko u me,” a ti.

⁹ Churawhchun, uain pêktu nih, “Ka mang leiah grep zûn,

¹⁰ ṭeng pathum nei mi ka mâika ah a um. A nah chu mawhsareh hen a hawng chawrh sawm le, a hawng pâr le, a rah chu a hawng min rawh.

¹¹ Lalchem hâi chu ka put le, grep rah chu ka lâk le, ka sûr le, lalchem ka pêk,” a ti.

¹² Josef nih, “Chu umzia chu hi hi asi: Ṭeng thum chu ni thum asi.

¹³ Ni thum nûnah lalchem nih an suah lai le, a nan ngaihdam lai le, na rianṭuannâk muntê an luahtir nawlh lai. A lânah uain pêktu na si hâwi ber hen lalchem rangah uain hâi na pêk lai.

¹⁴ Zângfahtê hen thil zeizawng ah na sul-le-lam a tluang tikah hawng ka theihkumza bâk le, rêngin ah mi hi suak ding hen hawng ka ṭangpi le, lalchem sinah hawng ka sim piak rawh.

¹⁵ A lân khawm ah Hebrai ram thawk hen a thup hen fîr hen ka um le, hi Aigupta ram khawm hin rêngtlâk phah rê ding hen zeikhawm ka ti lo,” a ti.

¹⁶ Sang pêktu pa nih uain pêktu mang Josef nih sunhsak tak hen a simhfiang piak mi chu a muh le, Josef sinah, “Kei khawm mang ka nei bâk; ka lû ah kho pathum ka chuanh.

¹⁷ A sungah lalchem tî-le-râwl chi kip a um le, chu chu vâ nih an ei,” a ti.

¹⁸ Josef nih, “Hi hi a umzia asi: Kho pathum kha ni thum asi.

¹⁹ Ni thum ni ah lalchem nih an suah lai le, na lû an tan phak lai! Na ruak chu thing pâr ah an thlâi lai le, na sa tla chu vâ nih an ei lai,” a ti.

²⁰ A ni thumnâk ah, Pharo suak cham puai lakah rianṭuantu zawzawng a sâwm na le, uain pêktu leh sang pêktu tla hotu chu rêngin ah mi chu a suah na le, a milian tla mâika ah chun a kawh na.

²¹ Josef nih an mang a simhfiang piak na mi hâwi hen, uain pêktu chu amah rianṭuan muntê a luah nawlh le,

²² sang pêktu hotu lam chu an thlâi rawh.

²³ Sikhawmsele uain pêktu nih chun Josef chu a theih phanh lo rawh le, a philh ving.