GENESIS 39 - Bawm Common Language Bible Version

Josef leh Potiphar Nupi

¹ Ismael murui nih Josef chu Aigupta ah an kalpi le, lal tangah mi hotu pakhat, lal umnâk mun vêngtu tla lakah hotu Potiphar sinah an zuar.

² LALPA chu Josef sinah a um le, a sul-le-lam tluang tak hen a siam. A hotupa Aigupta ram mi in ah a um le,

³ Josef sinah LALPA a um hen thilti zawzawngah dingchangnâk a pêk mi a muh.

⁴ Potiphar nih thungâi a lawmh le, amah nâwl zulhtu bîk ah a siam; churuangah a insungkhur ah a neih zawzawngah hotu ah a siam.

⁵ Chu thawk hen chun Josef ruangah LALPA nih Aigupta mi dâwngsung leh a thilneih zawzawng, phâisen mi leh in lei mi khawm mal a sâwm piak.

⁶ Potiphar nih thil zeizawng chu Josef zauhkhenh ding hen thu a neitir hep le, a buh ei ding cho lo chu amah nih zeikhawm thu a nei lo. Josef chu a dingdawng a ṭha hen a mêl khawm a ṭha.

⁷ A nehnûntê chun, a hotupa nupi nih Josef chu a mêldî le, munkhat it ding hen a sâwm.

⁸ Anih nih a êl le a sinah, “Zauhnik, ka pu nih a in sung khur mi a neih zeizawng zeikhawm theihnâk a nei loh, keimah a hawng ka rinh ver ruangah. A neih zawzawngah hotu ah hawng ka siam rawh.

⁹ Amah hen bang cho hen hi in ah hin thuneitu ah hawng ka siam, nangmah cho lo chu ka kut ah ap lo mi zeikhawm a um lo, zeitin kha bang hâwi thil diklo ti hen Pathian tlûnah thilsual ka ti kho lai?” a ti.

¹⁰ Nisiar hen Josef rangah a sâwm khawmsele, a ihpi duh rerêng lo.

¹¹ Nikhat chu Josef chu in sungah rianṭuan ding hen a va lût le, in ah chun to-aw âukhawm an um lo.

¹² A hotunu nih a puan aih lakah a tleih le, “Ka sinah hawng it,” a ti. Sikhawmsele, a tleih mi puan chu a siah thlap le, lênglei ah a tek ving.

¹³ A puan a mâk thlap le, a tek ving mi a muh rawh chun,

¹⁴ lênglei ah a va suak le, a in ah mi to-aw tla chu a kawh na le, an sinah, “Zauhnik u hi! Hi Hebrai mi ka pasal nih kan in ah a hawng put mi nih hawng kan siarlo zia hi, in kardang sungah a hawng lût le, tleihrêm ding hawng ka awt, a fâk kho rirî hen ka âu le;

¹⁵ ka âu hâu ah ka kiangah a puan a mâk thlap le, lênglei ah a suak ving,” a ti.

¹⁶ A hotunu nih a pasal in leiah a hawng lânlo chu puan chu a kil ko.

¹⁷ Churawhchun, chu thu chu a pasal a simh: “Hebrai sal hinah na siah mi kha in kardang sungah a hawng lût le, nehsawh ding hawng ka awt.

¹⁸ Ka hawng âu chiam rawh chun a tek le, lênglei ah a suak le a puan a mâk thlap,” a ti.

¹⁹ Josef hotupa chu thungâi a thinthawk le,

²⁰ Josef chu a tleih le, lal tla tângnâk rêngin ah a khumh le, chunah chun a um rawh.

²¹ LALPA chu Josef sinah a um le, mal a sâwm; churawhchun rêngtlâk vêngtu nih a lawmh thlo.

²² Josef chu rêngtlâk zawzawng hotu ah a siam le, rêngin ah thilti ding mi lakah hotu ah a siam.

²³ LALPA chu Josef sinah a um le, thil a ti mi zawzawng lakah dingchangnâk a pêk ruang chun rêngtlâk vêngtu khawm nih Josef rangah a rinh hep.