GENESIS 35 - Bawm Common Language Bible Version

Jakob chu Bethel ah Pathian nih Mal a sâwm

¹ Pathian nih Jakob sinah, “Bethel ah va kal sawm le, chunah chun va um rawh, na unaupa Esau thawk hen na tek liauah, na sinah Pathian â langhnâk mun ah mâichâm va siam rawh,” a ti.

² Churawhchun, Jakob nih a dâwngsung leh a sinah um mi tla zawzawng sinah chun, “Ramdang tla pathian nan nei mi kha lawnh u, nanmah kha a thenhlimh ule, ni le puan thiang a aih u.

³ Hi mun hi kan mâk awt rawh le, Bethel ah kan kal lai rawh; chu ni ah ka lawksawngnâk hawng ka ṭangpitu leh ka kalnâk zawng ah ka sinah um tâwn mi Pathian rangah mâichâm ka siam awt,” a ti.

⁴ Churawhchun, ramdang pathian an nei mi zawzawng leh an nabeh anna beh mi tla Jakob sinah an pêk hep le, Sekem kiang mi Oak thing tangah a phûm rawh.

⁵ Jakob leh a fapa tla anna thawh awt liau chirah, an kiangkam mi khua lakah um mi tla tlûnah thil ningṭihkâi a hawng tlung le, Jakob leh a fa le tla chu an ṭhâwl na lo rawh.

⁶ Chun Jakob chu a minung tla hen Luz khua, Bethel an ti mi ah chun an tlung rawh, chu chu Kanaan ram asi.

⁷ Chunah chun mâichâm a siam le, “El-Bethel’’ (Bethel Pathian) ti hen min a sak, a unaupa thawk hen a hawng tek liauah chunah amah Pathian tak â langh ruangah.

⁸ Rebek umhtu Deborah chu a thi le, Bethel simlei ah Oak thing tangah an vûi rawh. Churuangah a min ah “Allon-bakuth’’ (Ṭahnâk Oak Thing) ti asi.

⁹ Jakob chu Mesopotamia ram ah mi a hawng kîr liauah, Pathian a sinah a hawng a langh nawlh le, mal a sâwm.

¹⁰ Pathian nih a sinah, “Na min chu Jakob asi le, sikhawmsele, tu thawk hen Israel ti asi lai rawh,” a ti. Churawhchun, Pathian nih ‘Israel’ ti hen a sak rawh.

¹¹ Chun, Pathian nih a sinah, “Kei, Pathian chak zeizawng tikho kasi. Fa tam tak nei le, phun tla chu nangmah thawk hen thlâk mi si seh, nang chu lal tla thlâktu na si lai.

¹² Abraham leh Isak ka pêk mi ram hi ka nan pêk lai le, na nehnûnah na thlâk le tla rang khawm ka pêk lai,” a ti.

¹³ Churawhchun, Pathian nih a kaltâk rawh.

¹⁴ Pathian hen anna sâwnnâk mun ah theihkumzanâk lung Jakob nih a phun le, uain leh oliv sariak a tawih le, a ap rawh.

¹⁵ Chu mun chu a min ah Bethel a ti.

Rakel Thih Thu

¹⁶ Jakob leh a dâwngsung tla nih Bethel chu an kaltâk le, Efrat thawk hen tâwm an kal le, Rakel chu nâu a neih tik a tlung rawh, a nâu neih a har thlo.

¹⁷ A nganfâk chu a zual dadauh le, nâu dawmhtu nih a sinah, “Rakel, lâu lah, fapa dang na ring awt ma hi a,” a ti.

¹⁸ Sikhawmsele, a chelh lo vima le, a thi awt ko rawh, a fapa min chu Benoni a sak ta, a pa lam nih chun Benjamin ti hen a sak.

¹⁹ Rakel chu a thi rawh chun Efrat, tûliau ah Bethlehem an ti mi lam vâu ah an vûi.

²⁰ Jakob nih theihkumzanâk ding hen lung a phun le, tûtiang hen Rakel thlân ti singsiahnâk a um.

²¹ Jakob chu â ṭhial vima le, Eder insâng khatlei varâl ah um mun a siam.

Jakob Fapa Tla

²² Jakob chu chu ram ah a um liau chun, Reuben nih a pa nupisûn Bilhah chu a ihpi le, Jakob nih a theih le, thungâi a thinthawk. Jakob nih fapa leinih a nei.

²³ Leah fa tla chu, Reuben, (Jakob fapa upachem), Simeon, Levi, Juda, Isakar, leh Jebulun.

²⁴ Rakel fa tla chu Josef leh Benjamin.

²⁵ Rakel to-awnu Bilhah fa tla chu Dan leh Naphtali.

²⁶ Leah to-awnu Zilpah fapa tla chu Gad leh Aser. Hi bang fapa tla hi Mesopotamia ram ah suak mi tla an si.

Isak Thihnâk

²⁷ Jakob chu a pa Isak, Hebron kiangah Mamre ah a um mi leiah a va kal le, chu chu Abraham leh Isak umnâk asi.

²⁸ Isak chu kum zâ leh kum sâwmriat upa asi, tar khen hen a thi;

²⁹ a fapa Esau leh Jakob nih an vûi.