GENESIS 30 - Bawm Common Language Bible Version

¹ Jakob rangah Rakel nih fa a ring piak lo. Churawhchun, a unu rangah a nahsuah le, Jakob sinah, “Fa hawng ka pêk, chu hâwi asi lo chun ka thi ving awt,” a ti.

² Jakob chu Rakel tlûnah a thin thawk le, “Pathian lêm kasi lo, Pathian nih an neihtir lo mi ma kha,” a ti.

³ Rakel nih, “Hi ka to-awnu Bilhah a um ko hi teh, ihpi le, ka rangah fa hawng ka nei piak ding hen. Amah thawk hen anih nu kasi kho lai,” a ti.

⁴ Churawhchun, Bilhah chu a pasal sinah a kalpi le, anih nih a ihpi rawh.

⁵ Bilhah chu a hawng râi le, Jakob rangah fa a ring piak.

⁶ Rakel nih, “Pathian nih sunhsak tak hen lâi hawng ka rêl piak, ka thlachamnâk a theih le, fapa hawng ka pêk,” a ti. Churawhchun, a min ah Dan a sak.

⁷ Bilhah chu a râi fâwn le, fapa panihnâk Jakob rangah a ring piak.

⁸ Rakel nih, “Ka unu rangah ka zuam le, ka neh rawh,” a ti. Churawhchun, a min ah Naphtali a sak.

⁹ Leah nih fa a ring awtlo rawh ti a theih le, a to-awnu Zilpah chu Jakob sinah a nupi siding hen a pêk.

¹⁰ Churawhchun, Zilpah nih Jakob rangah fapa a ring piak.

¹¹ Leah nih, “Thungâi ka vân a ṭha,” a ti. Churuangah a min ah Gad a sak.

¹² Zilpah nih Jakob rangah fapa dang a ring piak nawlh.

¹³ Leah nih, ‘Tu chun thungâi ka lâwm; nunau dang tla nih â lâwm mi nu an ka ti lai,” a ti. Churawhchun, a min ah Aser a sak.

¹⁴ Fângzûn liauah Reuben chu phâisen ah a va kal le, âidî a va tawng le, a nu Leah sinah a hawng put. Rakel nih Leah sinah, “Na fapa âidî zângfahtê hen tâwm hen hawng ka pêk bâk,” a ti.

¹⁵ Leah nih, “Ka pasal na ka suh ving mi kha tâwk na ti lo mu? Tuah ka fapa âidî tiangmâng suh ding na awt,” a ti. Rakel nih a thawh le, “Na fapa âidî na hawng ka pêk chun, tuzân ah Jakob sinah na it kho lai,” a ti.

¹⁶ Jakob chu zânleibâi ah phâisen thawk hen a hawng tlung le, va dawng ding hen Leah chu a suak le, a sinah, “Tuzân ah ka sinah na it ding asi, ka fapa âidî chu na rang ding ah Rakel rangah ka pêk rawh,” a ti. Churawhchun, chu zân ah chun a ihpi.

¹⁷ Pathian nih Leah thlachamnâk a sâng le, a râi le, Jakob rangah fapa panganâk a ring piak.

¹⁸ Leah nih, “Pathian nih lâwmman a hawng ka pêk, ka pasal sinah ka to-awnu ka pêk ruangah,” a ti. Churawhchun, a fapa chu a min ah Isakar a sak.

¹⁹ Leah chu a râi nawlh le, Jakob rangah fapa paruknâk a ring piak.

²⁰ “Pathian nih lâwmman ṭha tak hawng ka pêk rawh, fapa paruk ka ring piak rawh ruangah ka pasal khawm nih hawng ka duh lai rawh,” a ti. Churawhchun, a min ah Zebulun a sak.

²¹ A nehnûnah fanu Dinah a ring.

²² Churawhchun, Pathian nih Rakel chu a theihkumza le; a thlachamnâk a sâng le, fa ring kho ding hen a siam.

²³ A râi le, fapa a ring, “Pathian nih ka ningzak phenhtu ah fapa hawng ka pêk.

²⁴ LALPA nih fapa dang hawng ka pêk nawlh seh,” a ti le, a min ah Josef

Jakob leh Laban Thutiamnâk

²⁵ Josef a suak nûnah Jakob nih Laban sinah, “In leiah tlung ding hen hawng ka kaltir rawh.

²⁶ Ka nupi tla, ka fa tla na rianṭuan piak hen ka lawh mi chu hawng ka pêk le, ka kal lai rawh. Ṭhadektê hen na rian kan ṭuan piak zia tla khawm na theih,” a ti.

²⁷ Laban nih a sinah, “Zângfahtê hen thu kâ khat ka sim lai rih; Nangmah ruangah chamchawh hen LALPA nih mal hawng ka sâwm zia ka theih.

²⁸ Na rianṭuan tla sim le, a man kan pêk lai,” a ti.

²⁹ Jakob nih a sâng le, “Na rangah rian ka ṭuan mi tla leh keimah zauhkhenh ruangah na ranrual a zan mi tla na theih.

³⁰ A lânah ka hawng liau chun tâwmtê na nei le, tu chun ka kalnâk kip ah cherkhet LALPA nih mal an sâwm, tu lam chun keimah thu thu hen um ding asi rawh,” a ti.

³¹ Laban nih, “Zei zei ka nan pêk lai?” a ti. Jakob nih a sâng le, “Zei rianṭuan man khawm ka duh loh, hi thu hi rem na ti chun, na ranrual khawm ka zauh vima lai.

³² Tusûn ah na ranrual nâwngah hawng ka kaltir le, dawrâ dum tla, kêl ṭial leh a ngo mi ka lâk lai, chubang zawng chu ka vo si sele.

³³ Hi nûnah zumh ka kâi zia awl tak hen na theih kho lai. Ka tha ni lawh na hawng zauhfiang tikah kêl lakah a ṭial mi, a râng mi, dawrâ lakah a dum mi silo mi ka tâ lakah a um chun ka fîr mi ti na theih lai,” a ti.

³⁴ Laban nih a sâng le, “Rem ka ti, na sim mi hâwi hen kan ti ko lai ma chu,” a ti.

³⁵ Chu ni chun Laban nih kêl a mipa a ṭial mi tla, a râng rukrak mi tla, a nunau a ṭial mi leh a râng rukrak mi leh a ngo mi tla, dawrâ a dum mi zawzawng tla a thlei na, a fapa tla chu zauhdiktu ah a siah.

³⁶ Churawhchun, Laban chu Jakob thawk hen ni thum kal ah a ranrual hen an va kal, Laban ranrual dang tla chu Jakob nih a zauhkhenh.

³⁷ Jakob nih poplar, almon phâi thing ṭeng tla chu a lâk le, ṭial ren hen a hâwng a kheh, thing ṭeng chu ṭial ṭhuk ṭhak ding hen.

³⁸ Ran tla tî din an kalnâk ah thing ṭeng tla chu a khâng piak na le, ran tla chu tî din an hawng chun an hawng a bawp vima khonâk ding hen.

³⁹ Churawhchun, thing ṭeng zâwnah a hawng mi vial nih a ṭial hen a râng mi an ring.

⁴⁰ Chun, Jakob nih kêl leh dawrâ tla chu a thlei le, Laban ranrual a dum mi leikângah a hawitir na. Hi hâwi hen Laban ranrual lakah mi chu, amah tâ rang ding ah a siam.

⁴¹ Ran cholawm dauh tla chu thing ṭeng siah mi mun ah an va tleng mi zawng râi vima ding hen an tî dinnâk lampi ah a siah piak na.

⁴² Sikhawmsele, ran a ṭia lo mi tla rang chun a siah piak na lo. Churawhchun, Laban nih a ṭia lo mi vial â ting le, a cholawm mi vial Jakob nih â ting.

⁴³ Hi hâwi hen Jakob chu minei a hawng si rawh. Ranrual tam tak, sal tla, sangâwngsâu tla leh sanatung tla a nei rawh.