GENESIS 29 - Bawm Common Language Bible Version

Jakob Laban In ah a Tlung mi

¹ Jakob chu saklei ram ah a kal vima le,

² phâisen ah tikhurchawh kiangkam ah dawrâ rual thum an bawk nguainâk ram ah a va tleng chawlh rawh. Hi tikhurchawh lakah ran tla chu tak anna khawlh tâwn le, chu tikhurchawh nih chun lungphêng lian tak sinh a nei.

³ Zeiliau zawng ah ranrual tla an va kal chun, an dâwngpu tla nih lung chu an ṭhial le, tî an tawih na; chun an sinh nawlh tâwn.

⁴ Jakob nih dawrâ vêngtu tla rangah, “Hâwi le tla, zei lei mi me nan si?” ti hen, a deih na. “Haran lei mi kan si,” ti hen, an sâng.

⁵ “Nahor fapa Laban nan theih ma?” ti hen, a deih na. Annih nih, “Theih ta a,” ti hen an sâng.

⁶ Jakob nih, “A dam bei?” ti hen, a deih na. “A dam rih, zauhnik a fanu Rakel khawm a pa ranrual hinah a hawngpi ko hi” ti hen, an sâng.

⁷ Jakob nih, “Zei rangah tak nan khawlh tâ hen râwl nan tlattir na lo rih, nî a sâng thlo rih, ran tlungpi tik asi lo rih hi teh,?” a ti.

⁸ “Hinah ranrual tla pumh ver na hen lung ṭhial asi lânlo chu ranrual tî kan tawih kho na lai lo,” an ti.

⁹ Jakob nih a sawnh na liau chun Rakel khawm ranrual hen a hawng tleng bâk.

¹⁰ Jakob nih Rakel chu, a pa ranrual tla hen a muh na le; tikhurchawh leiah a va kal le, lung chu a ṭhial le, dawrâ rual chu tî a tawih na.

¹¹ Churawhchun, a châwchawk le, â lâwm tuk le, a ṭap.

¹² “Kei chu na pa taksa tlâi, Rebek fapa kasi,” ti hen a simh. A pa va simh ding hen Rakel chu a tek phêt.

¹³ Laban nih a tupa Jakob thâwngthâng a theih rawh chun a tawng ding hen a va tek le, a kuah le a châwchawk, chun in ah a lûtpi rawh. Jakob nih Laban chu thil zeizawng chu a simh ver le,

¹⁴ Laban nih, “Asi ma chu, ka taksa leh keimah thisen tak na si,” a ti. Jakob chu chunah thla khat bir a um.

Rakel leh Leah Ruangah Jakob nih Laban Rian a Ṭuan Piak

¹⁵ Laban nih Jakob sinah, “Ka taksa tlâi na si ruangah, ka rangah zei rian khawm na ka ṭuan piak ding asi lo. Lawh zeizat an pêk sele na duh?” a ti.

¹⁶ Laban nih fanu panih a nei le, a upa dauh mi min chu Leah asi, a ngâksia dauh mi chu Rakel asi.

¹⁷ Leah chu dâwt mêl a put le, Rakel chu a chuang dek, a mêl khawm a ṭha.

¹⁸ Jakob nih Rakel a duh le, “Rakel umpi ding hen na ka pêk chun kum sarih na rian ka ṭuan lai,” a ti.

¹⁹ Laban nih a sâng le, “Nangmah rang lo chu âu rang khawm ka pêk awtlo, hinah ka sinah um ko,” a ti.

²⁰ Jakob nih Rakel tawng ding ko hen kum sarih tiang a ṭuan, a duh ruang chun chu bang chu ni tâwmtê tluk cho hen a ngaih.”

²¹ Churawhchun, Jakob nih Laban sinah, “A ni a tling rawh, na fanu hawng ka umpitir rawh,” a ti.

²² Laban nih lâwinâk puai a tuah le, mikip a sâwm na.

²³ Sikhawmsele, chu zân chun, Rakel silo hen Leah chu Jakob rangah a pêk. Jakob nih chun a ihpi rawh.

²⁴ (Laban nih a fanu Leah rangah a to-awnu rang ding ah Zilpah a pêk.)

²⁵ A thâizîng khua a dei lânlo chu Jakob nih Leah asi ti a theih lo thlo. Laban sinah a va kal le, “Zei rangah hi hâwi hen na ka ti zia? Rakel tawng ding hen rian ka ṭuan mi lakah zei rangah na ka perpet?” a ti.

²⁶ Laban nih a sâng le, “A naunu nih a unu lânah pasal neih hi, hi ram dân asi lo,” a ti.

²⁷ Hi umhnâk dinhni kar khat hi lîm ding ngâk rih. Kum sarih dang ka rian na ka ṭuan piak asi chun Rakel khawm kan pêk lai,” a ti.

²⁸ Jakob nih rem a ti le, anna umhnâk zarhkar khat a lîm rawh chun, Laban nih Rakel chu a nupi siding hen a pêk rawh.

²⁹ (Laban nih a fanu Rakel rangah a to-awnu ding hen Bilhah a pêk.)

³⁰ Jakob nih a nupi Rakel chu a ihpi le, Leah ngâk hen a duh dauh. Laban rangah kum sarih rian a ṭuan piak nawlh.

Jakob nih a Ring mi Fa Tla

³¹ LALPA nih Leah ngâk hen Rakel a duh dauh mi a muh le, Rakel chu fa ring lo hen a siam le, fa nei lo hen a um.

³² Leah chu a râi le, fapa a ring le, “LALPA nih chun ka lawksawng zia a muh, tu chun ka pasal nih hawng ka dâwt dauh lai rawh,” a ti le; churuang chun a min ah Reuben a sak.

³³ A râi le, fapa dang a ring nawlh. “LALPA nih fapa a hawng ka pêk nawlh khawmsele, dâwt ka tawng lo nget rih” ti a theih; churuangah a min ah Simeon a sak.

³⁴ A râi nawlh le, fapa dang a ring nawlh, “Ka pasal rangah fapa pathum ka ring piak rawh ruangah kanna umhnâk a bir khun lai rawh,” a ti le; a min ah Levi a sak.

³⁵ A râi nawlh le, fapa dang a ring nawlh. “Tutan chu LALPA ka sawr lai rawh,” a ti le, a min ah Juda a sak. Churawhchun, a fa neih a dawng rawh.