GENESIS 25 - Bawm Common Language Bible Version

Abraham Thlâk Dang Tla

¹ Abraham nih nupi dang a umpi nawlh le, a min chu Keturah asi.

² Anih nih, Zimran, Joksan, Medan, Midian, Isbak leh Suah tla a ring na.

³ Joksan fa tla chu, Sheba leh Dedan an si; Dedan thlâk chu Asurim, Letusim, leh Leummim an si.

⁴ Midian fa tla chu Ephah, Epher, Hanok, Abida leh Eldah. Hi bang zawzawng hi Keturah thlâk tla an si.

⁵ Abraham nih Isak chu thil zawzawng tlûnah thu a neihtir.

⁶ Sikhawmsele, a dam liauah a nupi dang fa tla sin khawm ah thil tla a pêk na bâk. Hi bang a fapa tla hi saklei ram ah, a fapa Isak thawk hen ram lât takah a fial ving na.

Abraham Thihnâk leh Vûinâk

^7-8 Abraham chu kum zâ leh sâwmsarih leh panga a tling ah, tarkhên hen a thi rawh.

⁹ A fapa Isak leh Ismael nih, Hit mi Zohar fapa Ephron tâ Mamre saklei mi phâisen ah, Makpela pûk ah an vûi rawh.

¹⁰ Chu phâisen chu Abraham nih Hit mi tla thawk hen a châwk mi asi. Abraham leh a nupi Sari chu chunah an panih hen an vûi na.

¹¹ Abraham thih nûnah Pathian nih ‘Beer-lahai-roi’ (Hawng ka Muhtu a Nung mi Tikhurchawh) ti mi kiangah um mi a fapa Isak rangah mal a sâwm.

Ismael Thlâk Tla

¹² Ismael, Aigupta ram ah Sari to-awnu Hagar nih, Abraham rangah a ring piak mi fapa tla chu,

¹³ hi a tangah hin a sang sang hen an suak dân hen rîn asi: Nebaioth, Kedar, Adbeel, Mibsam,

¹⁴ Misma, Dumah, Masa,

¹⁵ Hadad, Tema, Jetur, Naphis, leh Kedemah an si.

¹⁶ Phun leinih thlâktu tla chu an si, an min chu an khua leh an umnâk mun suangkhâng hen an sak.

¹⁷ Ismael chu a thih liauah kum zâ leh sâwmthum pasarih upa hen a thi.

¹⁸ Ismael thlâk tla chu Aigupta saklei, Asiria lampi Ravilah leh Sur anna rînâk ah an um. Abraham thlâk dang tla lakah a dangtê hen an um.

Esau leh Jakob Suaknâk Thu

¹⁹ Hi hi Abraham fapa Isak thu chu asi.

²⁰ Isak chu kum sâwmli a tling ah Rebek a umpi, Rebek chu Laban farnu (Aramean mi Mesopotamia ram mi) Bethuel fanu asi.

²¹ Rebek nih fa a nei lo ruangah Isak nih LALPA sinah thla a cham piak le, a thlachamnâk chu LALPA nih a sâng le, Rebek chu pumlâwng lo hen a um rawh.

²² Faphîr a pâwi le, an suak lânah a nu paw sungah anna rem lo ving rawh. Rebek nih “Zei rangah ka lakah hi hâwi thil hi a hawng um aw?” a ti le, hawng sâng ding hen LALPA rangah a deih.

²³ LALPA nih a sinah, “Na paw sungah phun nih an um; Anna leido mi panih na ring lai, Pakhat chu a pakhat dang ngâk hen a chak dauh lai; A upa dauh mi nih a ngâksia dauh mi nâwl a zulh lai,” a ti.

²⁴ A fa ring tik chu a tlung rawh le, fapa phîr a ring.

²⁵ A suak masa mi chu a sen le, a vun a mul thûr, churuangah a min chu Esau ti hen an sak.

²⁶ A panihnâk chu Esau kedil tleih thlir bû hen a hawng suak, churuangah a min ah Jakob an sak. An suak liauah Isak chu kum sâwmruk mi asi.

Esau Nih A Fatîr Sinâk A Zuar Mi

²⁷ Ngâksia tla chu an hawng lian dadauh le, Esau chu sakah leikâng mi, ram suak duh mi minung asi. Jakob chu in sungkhur ah um ziar mi minung asi.

²⁸ Isak nih, Esau rangah a sunhsak dauh le, Esau nih ramsa a kah mi a ei tâwn ruangah. Sikhawmsele Rebek nih chun Jakob a sunhsak dauh.

²⁹ Ni khat chu Jakob nih bâilep a suang liauah, Esau mâng ah a tâwi mi a hawng lût le, a sung a vâng le,

³⁰ Jakob sinah, “Buh ei lo hen ka um asi; kha zei lo sen chiar mi kha hawng ka pêk,” a ti. (Churuangah asi a min ah Edom an ti san chu.)

³¹ Jakob nih a sâng le, “Na fa tîr sinâk kha na ka pêk chun ka nan pêk lai,” ti hen a sâng.

³² Esau nih, “Si ko seh! ka thi awt thlo rawh; fa tîr sinâk zei me a ṭhatnâk a um?” a ti.

³³ Jakob nih, “Kan pêk lai, ti hen a masa hen siatsirh tâ rih,” a ti. Esau nih siatsirh hen a fa tîr sinâk Jakob sinah a pêk rawh.

³⁴ Churawhchun, Jakob nih sang leh a zei lo suang chu a pêk rawh. A ei hen a din le, a thawk le, a kal ving. Chu chu Esau nih fa tîr a sinâk, zeikhawm a rêl lonâk chu asi.