GENESIS 2 - Bawm Common Language Bible Version

¹ Churawhchun, laikulh pumpi chu siam dih asi rawh.

² Chun, Pathian nih a thilsiam chu a lîm rawh ruangah ni sarih ni ah chun a dinhtâk rawh.

³ A ni sarihnâk ni chu mal a sâwm le, chu ni ah chun a thilsiam chu a lîm rawh ruangah leh rianṭuan a dinhtâk ruangah a bîk hâwi hen a dangtê hen a thlei rawh.

⁴ Chu chu laikulh siam dân chu asi. LALPA Pathian nih laikulh a siam liauah,

Eden Dûm

⁵ tual tlûnah zei keuh khawm a um lo, zei thlâi chî khawm a um lo, ruah a sûrtir lo ruangah, chun âukhawm nih phâisen a nâwn lo.

⁶ Sikhawmsele tanglei thawk hen sûm tlûnlei ah a kâi le, tual chu a nâwngtir.

⁷ Chun, LALPA Pathian nih tual ah mi valei tâwm a lâk le, mipa a siam; chun a nârkua lakah nungnâk pêktu thâw a khumh le, chu minung chu a nung rawh.

⁸ Chun, LALPA Pathian nih sak leiah, Eden ah, dûm a siam le, chunah chun minung a siam mi chu a siah.

⁹ Chunah chun thing dawh tak zât kip rah suah mi a khotir. Dûm lâi chirah chun nungnâk thing leh sia leh ṭha theihnâk thing a um.

¹⁰ Eden ah tiva a luang le, chu nih dûm chu a nâwngtir. Eden lanh leiah chun tiva chu pali hen a suah.

¹¹ Tiva masa chem chu Pison asi; chu chu Havilah ram ah a luang.

¹² (Chunah chun ngûn a tliang mi leh rimthâw a um êu lo mi lung a sung mi tla an tawng.)

¹³ Tiva panihnâk chu Gihon asi; Kus ram ah a luang.

¹⁴ Tiva pathumnâk chu Tigris asi; Asiria saklei ram ah a luang. Tiva palinâk chu Eufretis asi.

¹⁵ Chun, LALPA Pathian nih minung chu Eden Dûm ah nâwn ding leh vêng ding hen a siah.

^16-17 Anih nih chun a sinah, “Sia leh ṭha theihnâk thing tilo chu dûm lakah mi thing rah zeital na ei kho lai. Chu thing rah chu na ei salam ding asi lo; na ei chun, na ei ni ah na thi lai,” a ti.

¹⁸ Churawhchun, LALPA Pathian nih, “Minung chu amah lâwng hen um a ṭhalo. Amah ṭangpitu ding hen bawptu ṭha tak ka siam lai,” a ti.

¹⁹ Churawhchun, Pathian nih tual ah mi valei tâwm a lâk le, ramsa tla leh vâ zawzawng tla a siam na. Chun, an min ah zei se a sak awt ti zauhtir ding hen a siam mi minung sinah a kalpi na-- chu chu mah min chiau an neihnâk chu asi.

²⁰ Churawhchun, minung nih chun ramsa leh vâ tla chu an min a phuah na; sikhawmsele amah ṭangpi ding hen pakhat khawm hâwikawmh ṭha an si lo.

²¹ Churawhchun, LALPA Pathian nih minung chu thâw tak hen a ittir le, a it karah a nâkruh pakhat chu a lâk le, sâ hen a tuam.

²² A nâkruh hen nunau a siam le, a sinah a kalpi.

²³ Chun minung nih chun, “A dawnghchem ah, hinah keimah hâwitê -- ka ruh leh taksa thawk hen siam mi a um. Mipa thawk hen siam mi asi ruangah a min chu ‘Nunau’ asi,” a ti.

²⁴ Churuangah asi mipa nih a nu leh a pa a kaltâk le, a nupi hen anna sihawh le, pumkhat an hawng si.

²⁵ Mipa leh nunau chu takkaro hen an um vevê le, sikhawmsele pawi tinâk an nei lo.