GENESIS 10 - Bawm Common Language Bible Version

Noa Fapa le Thlâk Tla

¹ Hi bang tla hi Noa fapa tla Sem, Ham leh Japhet thlâk tla an si. Hi pathum nih hin buanso a tlung nûnah fapa tla an nei.

² Japhet fapa tla chu-- Gomer, Magog Madai, Javan, Tubal, Mesek leh Tiras- hi tla hi thlâktu min puttu tla chu an si.

³ Gomer thlâk tla chu Askenaz, Riphath leh Togarmah mi tla an si.

⁴ Javan thlâk tla chu Elisah, Spain, Kupra leh Rodes;

⁵ chu tla chu tivakap leh tikulh ah um mi tla thlâktu tla an si. Hi bang tla hi Japhet thlâk tla an si, a phun phun leh a ram ram hen mah dang chiau hen an um le, murui kip ah mah hawlh chiau hen an hawlh.

⁶ Ham thlâk tla chu Kus, Aigupta, Libia leh Kanaan an si. Hi bang tla hi thlâktu min puttu tla an si.

⁷ Kus thlâk tla chu Seba, Havilah, Saptah, Ram leh Septeka an si. Ram thlâk tla chu Sheba leh Dedan an si.

⁸ Kus nih fapa a nei le, a min chu Nimrod asi. Laikulh ah nehtu rokual masa chem asi.

⁹ LALPA ṭangpi hen sa kah kho mi rokual tak asi. Churuangah chun asi, mi tla nih, “Nimrod hâwi hen sa kah kho mi rokual tak si hen LALPA nih a nan siam seh!” an ti phah tâwn mi chu.

¹⁰ A tîr chun a ram chu Babulon, Erek leh Akad, an pathum hen Babulon ram an si.

¹¹ Hi ram thawk hen Asiria ah a kal le, Ninevi, Rehobot Ir, Kalah

¹² leh Resen khuapi tla a tuah. Chu chu Ninevi leh Kalah khuapi rokual tak karah um mi asi.

¹³ Aigupta thlâk tla chu Lidia mi tla, Anam, Lehap, Naptuh,

¹⁴ Pathrus, Kasluh leh Kaptor; chu tla chu Philistia thlâktu tla an si.

¹⁵ Kanaan fa tla chu Sidon, fapa upachem mi leh Heth chu tla chu thlâktu min puttu tla an si.

¹⁶ Kanaan chu Jebus mi tla, Amor mi, Gergasit,

¹⁷ Hiv, Arkit, Sinit,

¹⁸ Arvadit, Zemarit leh Hamathit mi tla thlâktu asi. Kanaan phun dang dang tla chu an hawng zan vima le,

¹⁹ Sidon thawk hen Kanaan mi ramri tiang hen, simlei Gaza kiangah mi Gerar tiang hen, saklei kangah Sodom, Gomorah, Admah leh Lasa kiang mi Zeboim tiang asi.

²⁰ Hi bang hi Ham thlâk an si, ram dang dang ah a phun phun hen an um, mah murui chiau nih mah hawlh chiau hen an hawlh.

²¹ Sem chu Japhet ûpa asi, Hebrai zawzawng thlâktu asi.

²² Sem fapa tla chu: Elam, Asur, Arpaksad, Lud leh Aram an ti. Chu tla chu thlâktu min puttu tla chu an si.

²³ Aram thlâk tla chu Uz, Hul, Gether leh Mesek mi tla an si.

²⁴ Arpaksad chu Selah pa asi, Eber pa chu.

²⁵ Eber nih fapa panih a nei le, pakhat min chu Pelek, amah san ah laikulh minung chu ṭhen hen an um. Pakhat dang min chu Joktan asi.

²⁶ Joktan thlâk tla chu Almodad, Selep, Hazarmavet, Jerah,

²⁷ Hadoram, Uzal, Diklah,

²⁸ Obal, Abimael, Sheba,

²⁹ Ophir, Havilah leh Jobad mi tla an si. Chu zawng chu Joktan thlâk tla an si.

³⁰ An umnâk ram chu Mesa thawk hen saklei tlâng ram Sephar tiang asi.

³¹ Hi tla hi Sem thlâk tla an si, ram dang dang ah chi dang dang hen an um le, murui kip ah anmah hawlh chiau hen an hawlh.

³² Hi zawng minung hi Noa thlâk hep an si. A phun phun hen anmah thlâk dân vima hen, buanso a tlung nûnah tual ah mi phun zawzawng chu Noa fapa tla thlâk hep an si.