GENESIS 1 - Bawm Common Language Bible Version

Thilsiam Thâwngthâng

¹ A tîrah Pathian nih laikulh a siam liauah chun,

² tual chu zeikhawm silo leh a karo hen a um. Tisumsumriat tlingtlawk nih thil zeizawng a khuh hep mi chu a pum hen a mûi pang le, Pathian thiltikhonâk chu tî tlûnah â vel lemang.

³ Churawhchun, Pathian nih, “Chêu hawng um rawh,” ti hen thu a pêk le, chêu chu a hawng um rawh.

⁴ Pathian nih a zauh le, thungâi â lâwm. Churawhchun, chêu leh mûi chu a ṭhen phawk.

⁵ Chun chêu chu “Sûn” ti hen min a sak le, mûi chu “Zân” a ti. Zân chu a vei le, zînglei a hawng um rawh. Chu chu a ni khatnâk asi.

^6-7 “Tî ṭhentu ding hen boruak kâu tak hawng um sele, mun nih ah a dangtê hen um ding hen,” ti hen Pathian nih thu a pêk le, chu hâwi hen a hawng um rawh. Churawhchun, Pathian nih boruak a siam le, chu nih chun a tangah mi tî chu a tlûnah mi tî thawk hen a ṭhen rawh.

⁸ Boruak min chu “Vân” ti hen min a phuah. Zân chu a vei le, zînglei a hawng um. Chu chu a ni nihnâk asi.

⁹ Churawhchun, Pathian nih, “Vândum tangah tî tla chu a pûm hep na seh, chun tlâng hawng lang seh,” ti hen thu a pêk le, chu hâwi hen a hawng um.

¹⁰ Tlâng chu “Tual” a ti le, tî â pûm mi min chu “Tisumsumriat” a ti. Pathian nih a zauh le, thungâi â lâwm.

¹¹ Churawhchun, Pathian nih, “A kho mi chî kip a chî hen mi leh a rah hen suah mi tla chu tual nih suah seh,” ti hen thu a pêk le, chu hâwi hen a hawng um rawh.

¹² Churawhchun, a kho mi chî kip tla chu tual nih a hawng suah le, Pathian nih a zauh le, thungâi â lâwm.

¹³ Zânlei a vei le, zînglei a hawng um. Chu chu a ni thumnâk asi.

¹⁴ Churawhchun, Pathian nih, “Zân leh sûn ṭhentu ding ah vândum ah khin chêu hawng um seh; tik-le-ri, kum tla leh sakhua puai ni tla dawmh hen;

¹⁵ vândum thawk hen tual hi hawng cherh seh,” ti hen thu a pêk le-- chu hâwi hen a hawng um.

¹⁶ Chun, Pathian nih a chêu khun mi panih a siam, nî chu sûn lâirêltu ah, thlâ chu zân lâirêltu rang ding ah; ârfi tla khawm a siam na.

¹⁷ Tual hawng cherh ding hen vândum ah khin chêu a siah le,

¹⁸ sûn leh zân lâirêltu ding hen, mûi leh chêu dangtirtu ding ah. Chun, Pathian nih a zauh le, thungâi â lâwm.

¹⁹ Zânlei a vei le, zînglei a hawng um. Chu chu a ni linâk asi.

²⁰ Chun, Pathian nih, “Tî chu thil nung chi kip hen khat sele, boruak khawm vâ tla hen khat na seh,” ti hen thu a pêk.

²¹ Churawhchun, Pathian nih tî sungah thil nung lian tatak chi kip a siam le, vâ chi kip tla khawm a siam. Pathian nih a zauh le, thungâi â lâwm.

²² Chubang zawzawng chu mal a sâwm na le, chun tî lakah thil nung um mi tla chu tisumsumriat khat ding leh vâ tla chu pua ding hen thu a pêk na.

²³ Zânlei a vei le, zînglei a hawng um. Chu chu a ni ngânâk asi.

²⁴ Churawhchun, Pathian nih, “Ramsa nungnâk nei zawzawng, ran vulh mi leh ramsa, a lian a mê tual nih suah seh,” ti hen thu a pêk le; chu hâwi hen a hawng um.

²⁵ Chun, Pathian nih chubang zawzawng chu a siam le, a zauh le, thungâi â lâwm.

²⁶ Chun, Pathian nih, “Tuah kanmah bang cho hen minung tla kan siam lai; kanmah bang leh kanmah hâwi hen. Ngâ leh vâ tla, ran zawzawng vulh mi leh ramsa, a lian a mê tlûnah thunei na seh,” a ti.

²⁷ Churawhchun, Pathian nih amah tak bangh ding hen minung tla a siam na rawh. Mipa leh nunau A siam na le,

²⁸ mal a sâwm na le, churawhchun, “Fa tam tak nei ule, nan thlâk tla nih tual tlûn zawzawng luah hen anmah thuneihnâk tangah siah na seh,” a ti. “Ngâ, vâ tla leh ramsa zawzawng tlûnah thuneitu ah ka nan siam.

²⁹ Thlâi chi kip leh rah chi kip ei ding ka nan pêk;

³⁰ ramsa leh vâ tla rangah chun belh leh nah nei thing tla an râwl rangah ka pêk na,” a ti le, chun chu hâwi hen a hawng um rawh.

³¹ Pathian nih a siam mi zawzawng tla a zauh le, thungâi thlâk hen â lâwm. Zânlei a vei le, zînglei a hawng um, chu chu a ni ruknâk asi.