EXODUS 9 - Bawm Common Language Bible Version

Ran Tla Thihnâk

¹ LALPA nih Mosi sinah, “Lalchem sinah va kal le, LALPA Hebrai Pathian nih, ‘Hawng ka sawnh ding hen ka mi le tla kaltir na seh;

² kaltir ding na siang lo fâwn chun,

³ râi ṭihnungkâi tak ka hawng fial lai le, na ran zawzawng, na rang tla, na sanatung tla, sangâwngsâu tla, na ranrual tla dawrâ leh kêl tla lakah a hawng um lai.

⁴ Israel tla ran leh Aigupta ran tla chu ka thliar na lai. Israel ran vial chu an thi lai loh.

⁵ Kei, LALPA nih a tik ka ruat mi thâituan ah ka ti awt a ti,’ ti hen simh,” a ti.

⁶ A thâituan ah chun LALPA nih a sim mi hâwi hen a ti rawh. Aigupta ran zawzawng chu an thi le, Israel ran tla lam chu pakhat khawm a thi lo.

⁷ Lalchem nih thil a hawng umdân tla a deih na le, Israel ran tla chu pakhat khawm a thi lo ti hen an simh. Sikhawmsele a lung a khung le, mi tla chu a suaktir na fâwn lo.

Khuailumâ

⁸ Chun, LALPA nih Mosi leh Aron sinah, “Mei lakah mi vachâm lâk sele; lalchem mâika ah Mosi nih tlûnlei ah vawrh seh.

⁹ Valeidip ṭha hâwi hen Aigupta ram pumpi ah â rek lai le, chu nih chun mun kip ah minung leh ran lakah khuailumâ a hawng suah lai le, mâ pipî ah a hawng a siam lai,” a ti.

¹⁰ Churawhchun, vachâm tâwm an ṭhuam le, lalchem mâika ah an va dîr rawh. Mosi nih tlûnlei kângah a vawrh le, chu nih chun khuailumâ a hawng suah le, minung leh ran lakah mâ pipî lir a suah.

¹¹ Dâwithiam tla chu Mosi mâika ah an hawng lang kho lo rawh, Aigupta ram mi zawzawng tla hâwi hen annih khawm khuailumâ nih a tuam pang na ruangah.

¹² Sikhawmsele, LALPA nih lalchem chu a thinlung a khungtir le, LALPA nih a sim hâwi hen khan Mosi leh Aron thu chu ngaih-lo-lêm a thlâk.

Rial

¹³ LALPA nih Mosi sinah, “Thâizîng zîngtê ah lalchem hen va a tawng ule, LALPA Hebrai tla Pathian nih chun, ‘Hawng ka sawnh ding hen mi tla kaltir na seh.

¹⁴ Tutan mi chu na rianṭuantu leh na minung tla lâwng ka rêp awtlo le, nangmah khawm kan rêp awt, chu tikah kei hâwi hi âukhawm laikulh ah an um lo ti na theih lai.

¹⁵ Râi hen nang leh na mi tla rêp ding hen ka kut ka phar chun na vei dep lai.

¹⁶ Ka thiltikho zia ka nan muhtir khonâk ding leh laikulh pumpi ah ka min a thangnâk ding hen na nungnâk lam chu ka zuah lai.

¹⁷ Chu khawm ah na siar lo nget rih le, ka minung tla na suah duh na loh.

¹⁸ Thâituan tu tik ding ah rial tlang lian tak Aigupta ram nih a theih dahlo mi ka hawng tlâktir awt.

¹⁹ Tuah na ranrual zawzawng lênglei mi tla a himnâk ding mun ah siah ding hen thu pêk na. Minung leh ran lênglei mi kilkâwi lo mi lakah a hawng tlâ lai le, an thi ver lai a ti, ti hen simh,” a ti.

²⁰ Lalchem rianṭuantu tla a zeimaw mi nih LALPA thusim chu an ṭih le, an to-aw leh an ran tla him ding hen in sungah an siah na.

²¹ Midang tla, zei siarlo hen LALPA ningṭih phaihnâk ngâi duhlotu tla nih an sal le an ran tla chu lênglei ah an siah thlap na.

²² Chun, LALPA nih Mosi sinah, “Na kut vân leikângah phar rawh, Aigupta ram pumpi ah minung tla, ran tla, phâisen ah mi thlâi zawzawng tla tlûnah rial a hawng tlâ lai,” a ti.

²³ Churawhchun, Mosi nih vân leiah a ṭhianṭhunh a zangh le, LALPA nih khuarît leh rial a hawng fial le, ṭêk tla tual ah a tlâ.

²⁴ LALPA nih rial chawp tak leh mîmthlalek tla chat lo hen a umtir. Aigupta ram mi nih an thil theih zawzawngah a fâk chem mi asi.

²⁵ Aigupta ram pumpi ah lênglei mi thil zeizawng minung leh ran khawm rial nih a tlâk nawh dep. Phâisen mi thlâi keuh zawzawng leh thing tla kiak dip hen a tlâk nawh.

²⁶ Israel tla umnâk Gosen ram lâwng rial a tlâ lo.

²⁷ Lalchem, nih Mosi leh Aron a kawhtir na le, an sinah, “Tutan lam chu ka sual ngâk; LALPA chu a dik asi, ka minung leh kei kan diklo.

²⁸ LALPA sinah thla hawng kan cham piak u; Rial leh khuarît kan tuar tuk rawh! An suah na ding hen thu ka tiam asi; hinah tam nan um lai lo rawh,” a ti.

²⁹ Mosi nih a sinah, “Hi khuapi ka suaktâk kâ hen, bân phar hen LALPA sinah thla ka cham lai le, khuarît a bâng lai le, rial khawm a tlâ lai lo rawh; chu tikah tual hi LALPA tâ asi ti na theih lai.

³⁰ Sikhawmsele, na rianṭuantu tla leh nang hi LALPA nan ṭih lo ti ka theih,” a ti.

³¹ La leh fâng tla a râwk hep, fâng chu a min liau chir asi, la chu a lep liau asi.

³² Wheat fâng chu a râwk lo, a min lo rih ruangah.

³³ Mosi nih lalchem chu a kaltâk rawh chun, khuapi a suaktâk le, bân phar bû hen LALPA sinah thla a cham rawh; khuarît, rial, ruah zawzawng a bâng hep.

³⁴ Lalchem nih thil hawng um mi tla zawng chu a muh le, khawmsele a sual nawlh fâwn. Amah leh a rianṭuantu tla chu a lân hâwitê hen an lung a khung nget rih.

³⁵ LALPA nih Mosi sinah a simhkan rawh mi hâwitê hen lalchem nih Israel tla chu a suaktir duh na lo.