EXODUS 8 - Bawm Common Language Bible Version

¹ Chun, LALPA nih Mosi sinah “Lalchem sinah kal le, LALPA nih ka mi tla chu hawng ka sawnh ding hen kaltir na.

² Na kaltir na lo chun na ram hi chu-uh khat zat hen ka rêp awt.

³ Nile va chu chu-uh hen a khat lai le, chunah mi chu na umnâk mun, na ihkhun sung, na ihkhun tla, na rianṭuantu tla in leh na minung leh na tappi khur tla, rêunâk khêng tla lakah an hawng khat phak lai.

⁴ Na tak lakah leh na mi tla tak lakah, na rianṭuantu tla tak lakah an per sup lai ti hen simh,” a ti.

⁵ LALPA nih Mosi sinah, “Aron nih a ṭhianṭhunh lâk sele, Aigupta ram ah mi tiva tla, tî lampi chawh tla, rilî tla lakah mi chu-uh tla hawng suak hen Aigupta ram khat dil ding hen a ṭhianṭhunh lirh ding hen simh,” a ti.

⁶ Churawhchun, Aron nih a ṭhianṭhunh chu tî zawzawng tlûnah a lirh le, chu-uh tla an hawng suak le, ram an khat dil.

⁷ Sikhawmsele, dâwithiam tla nih an dâwi an mang le, annih khawm nih chu-uh chu an suaktir le, ram lakah an umtir bâk.

⁸ Lalchem nih Aron leh Mosi chu a kawh na le, “Chu-uh tla kiangtir ding hen LALPA sinah thlacham ule, nan mi tla chu LALPA sinah bâwlnâk ap ding hen ka suaktir na lai,” a ti.

⁹ Mosi nih a sâng le, “Na rangah thla an cham piak ding ka duh thlo. Nang leh na rianṭuantu tla, na mi tla rangah thla ka cham ding tik ruat rawh; churawhchun chu-uh tla chu Nile tiva cho lo ah chun anna kiang ver lai,” a ti.

¹⁰ Lalchem nih a sâng le, “Thâi ah thla hawng ka cham piak,” a ti. Mosi nih, “Na ka deih hâwi hen ka ti lai le, LALPA, kan Pathian hâwi hi pathian dang âukhawm a um lo ti na theih lai rawh.

¹¹ Nang, na rianṭuantu tla, na mi le tla lakah mi chu-uh chu an reh hep lai le, Nile tiva ah cho an um lai,” a ti.

¹² Churawhchun, Aron leh Mosi nih lalchem chu an kaltâk rawh. Churawhchun, lalchem sinah mi chu-uh tla kiangtir ding hen LALPA sinah Mosi nih a deih rawh.

¹³ LALPA nih Mosi deih hâwi hen a ti le, chu-uh, in ah mi tla, kawttipûm lakah mi tla, phâisen ah mi tla an thi hep.

¹⁴ Aigupta mi tla nih tlûn tung an pawng le, a ram chu thu rim hen a khat dil.

¹⁵ Lalchem nih chu-uh tla a thi ver mi a muh rawh chun, a lîlâ hen a lung a khung fâwn, LALPA nih a sim ziatê hen Aron leh Mosi thu chu zeikhawm a siar lo.

Marhsâng Tla

¹⁶ LALPA nih Mosi sinah, “Aron kha a ṭhianṭhunh hen tual vuak ding hen simh le, Aigupta ram ah valeidip chu marhsâng ah a hawng a chang lai,” a ti.

¹⁷ Churawhchun, Aron nih a ṭhianṭhunh hen tual chu a vuak le, Aigupta ram ah valeidip chu marhsâng ah â chang le, chu nih chun ram leh minung tla chu a tuam pang na.

¹⁸ Dâwithiam tla nih an dâwithiamnâk hen marhsâng hawng um ding anna ṭang bâk le, sikhawmsele an ti kho lo. Mun kip ah marhsâng a khat ver,

¹⁹ churawhchun dâwithiam tla nih lalchem sinah, “Hi hi chu Pathian thilti asi,” an ti. Sikhawmsele, lalchem chu LALPA nih a sim rawh hâwi hen a lung a khung le, Aron leh Mosi thu chu a ngâi piak duh na lo.

Thovâi Tla

²⁰ Chun, LALPA nih Mosi sinah, “Zîngtê hen thâi ah lalchem tiva ah a kal mi hen va a tawng ding hen kal le, ‘Ka mi tla kaltir na, an hawng ka sawnh kho ding hen,’ a nan ti.

²¹ Na êl chun thovâi ka hawng fial lai le, na rianṭuantu leh na minung tla hen kan rêp na awt, Aigupta ram in zawzawng chu thovâi hen a khat lai le, tual zawzawng a khat lai.

²² Ka mi le tla umnâk Gosen ram lam chu ka zuah lai, chunah chun thovâi rerêng a um lai loh. Hi ram ah hin chu thilti chu Kei LALPA nih ka ṭuan mi asi ti na theih lai.

²³ Na mi leh ka mi le tla chu ka thliar na lai. Chu thilchê chu thâi ah a hawng um lai,” a ti.

²⁴ LALPA nih thovâi hutumpî chu lalchem leh a rianṭuantu tla in ah a fial rawh. Aigupta ram pumpi chu thovâi nih a râwk rawh.

²⁵ Chun, lalchem nih Mosi leh Aron chu a kawh na le, “Kal ule, hi ram an hin nan Pathian sinah bâwlnâk va ap u,” a ti.

²⁶ Mosi nih, “Chu hâwi hen ti ding a dik lai loh, LALPA sinah kanna bâwlnâk ran nih Aigupta mi tla lung a sitir lo awt ruangah. Aigupta mi tla mitmuh ah hi bang ran tla mang hen kanna bâwlnâk nih an lung kan sitir na lo chun lung hen thi thlap hawng kan seh lai.

²⁷ LALPA nih thu hawng kan pêk mi hâwi hen ramkaro ni thum kal ah a sinah bâwlnâk kan pêk ding asi,” a ti.

²⁸ Lalchem nih “Ramkaro ah LALPA nan Pathian sinah bâwl ding hen kan kaltir na lai, lât tuktarâi nan kal awtlo chun, thla hawng ka cham piak ko,” a ti.

²⁹ Mosi nih a sinah, “Ka suak chun, thâi ah LALPA sinah thla ka cham lai le, thovâi tla nih chun nang leh na rianṭuantu tla leh na mi tla an kaltâk na lai rawh. Sikhawmsele, hawng kan perpet lah rawh le, LALPA sinah bâwl ding an kal mi mipi tla khawm khap lah na rawh,” a ti.

³⁰ Mosi nih lalchem chu a kaltâk rawh le, LALPA sinah thla a cham le,

³¹ LALPA nih Mosi deih mi hâwi hen a ti rawh. Thovâi nih lalchem leh a rianṭuantu tla leh a mi le tla chu an ṭiantâk rawh, thovâi pakhat khawm a um lo rawh.

³² Sikhawmsele, hi tan khawm ah lalchem chu a lung a khung fâwn le, mi le tla kal ding a siang na lo fâwn.