EXODUS 7 - Bawm Common Language Bible Version

¹ LALPA nih, “Lalchem sinah Pathian hâwi hen ka nan siam awt, na unaupa Aron chu khuavâng hâwi hen lalchem sinah thusimtu asi lai.

² Thu ka nan pêk mi zawzawng Aron rangah simh ver, anih nih Israel tla a ram mi suaktir na ding hen lalchem rangah simh seh.

³ Sikhawmsele, lalchem chu a lung ka khungtir lai le, nan thu a ngâi dah lai loh; Aigupta ram ah thil ṭihnungkâi zeital ti khawmsele a siar lai loh.

⁴ Chu nûnah Aigupta ram ah rêpnâk fâk tak ka tlungtir lai le, ka mi le tla phun, chu ram ah mi chu ka suakpi na lai.

⁵ An tlûnah ka bân ka phar hen an ram ah mi Israel fa tla ka suakpi na tikah Aigupta mi tla nih Kei, LALPA chu kasi ti an ka theih lai rawh,” a ti.

⁶ Mosi leh Aron nih LALPA thupêk hâwi hen an ti rawh.

⁷ Lalchem sinah thu an sim liauah Mosi chu kum sâwmriat upa asi. Aron chu kum sâwmriat leh kum thum asi.

Aron Ṭhianṭhunh

⁸ Chun, LALPA nih Mosi leh Aron sinah,

⁹ “Lalchem nih thilchê ti hen an nik na chun, Aron chu a ṭhianṭhunh lâk hen lalchem mâika ah siah sele, rûl ah â chang lai,” a ti.

¹⁰ Churawhchun, Mosi leh Aron chu lalchem sinah an va kal le; LALPA nih thu a pêk na mi hâwi hen an ti rawh. Aron nih lalchem mâika ah leh hotu a siam mi tla mâika ah a ṭhianṭhunh a siah le, rûl ah â chang rawh.

¹¹ Churawhchun, lalchem nih mi fing leh dâwithiam tla a kawh na le, an dâwithiamnâk hen chu hâwitê hen an ti bâk.

¹² An ṭhianṭhunh tla an hawng puak bâk le, rûl ah â chang rawh. Sikhawmsele Aron ṭhianṭhunh nih an tâ chu a dawlh hep na.

¹³ Lalchem chu zei ti tal khawm hen lungkhung kumza hen a um le, LALPA nih a sim mi hâwitê hen Aron leh Mosi thusim chu a ngâi duh loh. Thisen

Vânduainâk Nih Aigupta Ram A Râwk

¹⁴ Churawhchun, LALPA nih Mosi sinah, “Lalchem chu thungâi a lung a khung le, mi tla chu a suaktir duh na lo.

¹⁵ Churuang chun, thâizing ah Nile va leiah a kal liauah va a tawng ding hen va kal rawh. Ṭhianṭhunh rûl ah â chang mi kha put le, amah chu tiva kap ah ngâk ko.

¹⁶ Churawhchun, lalchem sinah, ‘LALPA Hebrai Pathian nih ramkaro ah amah sawnh ding hen a mi tla chu na kaltir na ding hen nangmah simh ding hen hawng ka fial asi ti hen thu va simh. Sikhawmsele, chu tik tiang khawm ah na ngâi dahlo rih.

¹⁷ Tuah, Bâwipa, LALPA nih âu asi ti thil a ti ding mi chu na muh lai. Zauhnik, hi ṭhianṭhunh hen tî ka hawng vuak lai le, tî chu thisen ah a hawng a chang lai.

¹⁸ Ngâ tla an thi lai le, tiva chu a thu mi ruangah Aigupta mi tla nih an din kho lai loh,’ ” a ti.

¹⁹ LALPA nih Mosi sinah, “Aron kha a ṭhianṭhunh kha lâk hen tiva tla, tî lampi chawh tla, rilî tla, Aigupta ram ah mi tlûnah lirh ding hen simh. Tî chu thisen ah â chang lai le, ram pumpi ah thing kuang leh lungbêl ah mi tî khawm thisen ah â châng lai,” a ti.

²⁰ Mosi leh Aron nih LALPA thupêk hâwi hen an ti rawh. Lalchem leh a milian tla mâika ah Aron nih a ṭhianṭhunh a lirh le, tî chu a vuak le, tî zawzawng chu thisen ah â chang rawh.

²¹ Tiva mi ngâ tla an thi le, an thu rim ruang chun Aigupta mi nih tî an din kho lo rawh. Aigupta mun kip ah thisen â chang hep.

²² Churawhchun, lalchem dâwithiam tla nih an dâwi hen chu hâwitê hen an ti bâk le, lalchem chu a lân hâwi hen a lung a khung nget rih. LALPA nih a sim hâwi hen lalchem nih Aron leh Mosi thu chu a ngâi duh lo nget rih.

²³ Ngâi ding ngangâk hen a in leiah a tlung le, ngaih-lo-lêm a thlâk thlo na.

²⁴ Aigupta mi tla nih tiva kap tlâitluan hen tî din ding an chawh, tiva mi tî an din kho lo ruangah.

²⁵ LALPA nih tî a vuak mi chu ni sarih a luah asi.