EXODUS 40 - Bawm Common Language Bible Version

LALPA Puanin Dirhnâk leh Apnâk

¹ LALPA nih Mosi sinah,

² “A thla khatnâk a ni khat ni ah LALPA umnâk Puanin chu dirh;

³ LALPA Thudântuk Bâwm Thupêk Parâ umnâk chu a sungah siah le, a mâilei ah puanzâr siah.

⁴ Dawhkân chu a sungah luh le, a thuamthil tla chu a tlûnah siah. Meichêu chu a sungah luh le, a tlûnah a chêunâk toh.

⁵ Rimthâw duahnâk ngûn mâichâm chu Thudântuk Bâwm mâika ah siah le, Puanin mâilei ah puanzâr chu thlaih.

⁶ Duah mi thil ap rang ding ah mâichâm chu Puanin mâilei ah siah.

⁷ Ṭâwlnâk mâihûm chu Puanin leh mâichâm karah siah le, tî tleng.

⁸ A kulhnâk puanzâr chu kulh dak hen zâr le, a tualmâi leikâng puanzâr chu thlâi.

⁹ “Churawhchun, Puanin leh a thuamthil zawzawng chu sariak thenhlimh buaih hen ap le, a hawng thenhlimh lai rawh.

¹⁰ Chu nûnah chun mâichâm leh a thuamthil zawzawng a thenhlimh lai rawh.

¹¹ Chu hâwi ber hen ṭâwlnâk mâihûm leh a tohnâk khawm chu ap.

¹² “Aron leh a fapa tla chu Puanin tualmâi ah kalpi na le, dân hâwi hen tak khawlh ding hen simh na.

¹³ Aron chu Bâwlpu thuam hen thuamh le, sariak thuh le, hi hâwi hen zarh thil ah siam, bâwlpu ah ka rian a ṭuan khonâk ding hen.

¹⁴ A fapa tla hawngpi na le, kawrdawh ruktir na.

¹⁵ An pa hâwi hen sariak thuh na le, ka sinah bâwlpu rian an ṭuan khonâk ding hen. Hi nûnthâi ah zeiliau khawm ah hi sariak thuhnâk nih bâwlpu ah a siam na rawh asi,” a ti.

¹⁶ Mosi nih chun LALPA nih thu a pêk mi hâwitê hen a ti rawh.

¹⁷ Aigupta ram an suaktâk nûnah a kum nihnâk a thla khatnâk a ni khat ni ah LALPA umnâk Puanin chu an dirh rawh.

¹⁸ Mosi nih a tohnâk a toh le, kâwpmi tung tla a toh, a khuahkhang a kâwp, a tung tla a phun.

¹⁹ Puanin chu a tlûn khuh a pharh le, a tlûnah mi khuhnâk hen a khuh, LALPA nih thu a pêk mi hâwitê hen.

²⁰ Lungtlêp panih chu a lâk le, Thudântuk Bâwm ah a siah. Thing tluan chu bâwm a nâ kual tla lakah a sawh le a sinh.

²¹ Churawhchun, bâwm chu Puanin ah a siah le, a kar dangnâk puan a zâr. Chu hâwi hen LALPA nih thu a pêk mi hâwi hen Thudântuk Bâwm chu a kilkâwi.

²² Dawhkân chu Puanin sungah a siah le, puanzâr lênglei marlei kângah,

²³ LALPA nih thu a pêk mi hâwi hen LALPA sinah ap mi sang chu dawhkân tlûnah a siah.

²⁴ LALPA nih thu a pêk mi hâwi hen dawhkân zâwnah simlei kâng sîrah meichêu chu Puanin sungah a siah le,

²⁵ LALPA nih thu a pêk hâwi hen LALPA umnâk ah meichêu a kaih.

²⁶ LALPA nih thu a pêk mi hâwi hen ngûn mâichâm chu Puanin sungah puanzâr mâika ah a siah le,

²⁷ rimthâw a duah.

²⁸ Puanin tualmâi ah puanzâr chu a thlâi le,

²⁹ chu puanzâr mâika ah chun thil ap duahnâk mâichâm a siah. LALPA nih thu a pêk hâwi hen chu tlûnah chun duahphung apnâk, eiphung apnâk hen bâwlnâk a pêk.

³⁰ Ṭâwlnâk mâihûm chu Puanin leh mâichâm karah a siah le, tî a tleng.

³¹ Mosi, Aron leh a fapa tla nih chunah chun an kut leh an kê tla an ṭâwl.

³² LALPA thupêk hâwi hen Puanin ah mawh mâichâm ah an kal tik zawng ah anna ṭâwl.

³³ Mosi nih Puanin leh mâichâm kulhnâk ding puanzâr a zâr le, a kulh tualmâi khawm ah puanzâr a thlaih. Churawhchun, rianṭuan zawzawng chu a lîm rawh.

LALPA Umnâk Puanin Tlûnah Mi Sûm

³⁴ LALPA Puanin chu sûm nih a hawng khuh le, mit ser rê hen chêu nih chun LALPA umnâk chu a khattir rawh.

³⁵ Churuangah chun Mosi chu Puanin ah a lût kho lo rawh.

³⁶ Puanin ah mi sûm chu â ṭhial tik cho ah Israel tla chu an riakmun ah mi chu anna ṭhial.

³⁷ Chu sûm chu a um kar zawng chu an mun chu âukhawm anna ṭhial lo.

³⁸ An kal kar zawng chu sûn ah chun LALPA umnâk Puanin tlûnah sûm muh kho hen a um, zân ah chun Puanin tlûnah meialh hâwi hen an muh.