EXODUS 39 - Bawm Common Language Bible Version

Bâwlpu Tla Rangah Nipuan Siamnâk

¹ Bâwlpu tla nih Mun Thenhlimh ah LALPA rian an ṭuan tikah anna ruk ding hen, thuam rokual tak, dumpâwl, senduk leh samul lasen hen an siam. Bâwlpu thuam chu LALPA nih Mosi sinah thu a pêk mi hâwi hen Aron rangah siam asi.

² Ephod chu puan mangṭhia, dumpâwl, senduk, samul lasen leh ngûn lazâi hen an siam.

³ Ngûn chu an dêng le, an sêu le, pan der hen a zâi ṭhia dîk hen an siam le, dumpâwl, senduk leh samul lasen ah an siam.

⁴ Ephod rangah liangbah panih an siam, khatlei sîr vevê ah an sih, â sih khonâk ding hen.

⁵ Puan mangṭhia tah mi tâisâwm a ruakhâu bang cho hen siam mi chu sa khat siding hen ephod lakah LALPA nih Mosi sinah thu a pêk mi hâwi hen an bêk.

⁶ Karnelian chu an timhtuah le, ngûn lakah an chawnh le, thiam tak hen Jakob fa tla leinih min an rîn.

⁷ LALPA nih Mosi sinah thu a pêk mi hâwi hen bâwlpu ephod liangbah lakah Israel phun leinih zauhtirnâk ah an thlaih.

ṬângBêk Siamnâk

⁸ Ephod lakah mi hâwitê hen a ruakhâu leh a thuamh dân bang cho hen ṭang bêk an siam.

⁹ Kî li thuang nih hen an siam, a dung khâp khat, a vâng khâp khat.

¹⁰ Lungmantam tlar li hen an chawnh, a tlar masa chem chu ruby, topaz, garnet,

¹¹ a tlar nihnâk chu emerald, sapphire, diamond,

¹² a tlar thumnâk chu turquoise, agate, amethyst;

¹³ a tlar linâk chu beryl, karnelian leh Jasper. Hi tla hi ngûn lakah chawmh mi hep asi.

¹⁴ Lung leinih chu Israel phun leinih zauhtirnâk asi le, chu lung pakhat lakah Jakob fapa pakhat vima min rîn asi.

¹⁵ Chun, ṭângbêk rangah ngûn chikchîn rirual an siam.

¹⁶ Ngûn zâi phiar mi panih leh ngûn kual panih an siam, chu ngûn kual panih chu ṭângbêk a tlûnlei kâng kî ah an thlaih.

¹⁷ Ngûn rî panih chu ngûn kual panih lakah an sih.

¹⁸ Chu rirual panih dawng chu ephod liangbahnâk mâilei kâng rirual ah an sih.

¹⁹ Ngûn kual panih chu ṭângbêk tanglei kâng kî ah, ephod sangah a sunglei sâr ah an thlaih.

²⁰ A dang panih ngûn kual an siam le, ephod liangbah mâilei tangah dawh tak mi tâisâwm tlûn a zung ṭhîtnâk kiangah an thlaih.

²¹ LALPA nih Mosi sinah thu a pêk mi hâwi hen ṭângbêk lakah mi ngûn kual chu ephod ngûn kual lakah a dumpâwl mi rî hen an sih, ṭângbêk chu tâisâwm tlûnah um thlir hen â sût lonâk ding hen.

Bâwlpu Thuam Dang Siamnâk

²² Ephod tlûnah mi kawrfual chu samul dumpâwl hen siam mi asi.

²³ Lû luhnâk a ngâwng chu tlêk lo ding hen tah mi puan hen kâwm asi.

^24-26 A tang lei sâr ah hêl dak hen pomegranate, dumpâwl, senduk, samul lasen leh ngûn khi-îng tla chu lakṭhelh vima hen LALPA nih Mosi sinah thu a pêk mi hâwi hen an thlaih.

²⁷ Aron leh a fapa tla rangah kawrdawh an siam le,

²⁸ upâwng tla, lukhuh tla, kekawr puan mangṭhia,

²⁹ puan mangṭhia tâisâwm, a dumpâwl, senduk leh samul lasen hen thuamh mi chu LALPA nih Mosi sinah thu a pêk mi hâwi hen an siam.

³⁰ Apnâk thenhlimh singsiahnâk thuam ngûn hen an siam le, “LALPA sinah ap mi” ti hen an rîn.

³¹ LALPA nih Mosi sinah thu a pêk mi hâwi hen upâwng mâilei ah rirual dumpâwl hen an thlaih.

Rianṭuan Lîmnâk

³² LALPA umnâk Puanin chu a dawnghnâk ah lîm asi rawh. Israel tla nih, Mosi sinah Pathian nih thu a pêk hâwi vima hen thil zeizawng an siam.

³³ Puanin leh a thuamthil zawzawng, a thîr kuaih tla, kâwpmi tung tla, a khuahkhang tla, a tung tla, a tohnâk tla;

³⁴ dawrâ chal vun rawng sen ah thlâk mi, a khuhnâk savun nêm, a kulhnâk puanzâr;

³⁵ Thudântuk Bâwm, a sungah lungtlêp tla, a zawnhnâk thingtluan, a sinh;

³⁶ dawhkân leh a thuamthil zawzawng, Pathian sinah ap mi sang;

³⁷ ngûn meichêu, a mei leh a thuamthil, meichêu hâng chu;

³⁸ ngûn mâichâm, thuh ding mi sariak, rimthâw, Puanin tualmâi puanzâr;

³⁹ dâr mâichâm leh a dâr lên, a thingtluan leh a thuamthil zawzawng, ṭâwlnâk mâihûm leh a tohnâk;

⁴⁰ a kulhnâk ding puanzâr leh a tung leh a tohnâk; puanzâr tualmâi kulhnâk ding leh rirual; Puanin kilhnâk, Puanin ah mang ding mi a thuamthil zawzawng;

⁴¹ Mun Thenhlimh ah bâwlpu nih a ruk ding mi puan rokual, puan thenhlimh Aron leh a fapa tla nih anna ruk ding mi chu Mosi sinah an hawng put.

⁴² Israel mi tla nih chun LALPA nih Mosi sinah thu a pêk mi hâwi hen an ti rawh.

⁴³ Mosi nih chubang thil zawzawng tla chu LALPA thupêk hâwi hen an siam mi a muh le, mal a sâwm na.