EXODUS 31 - Bawm Common Language Bible Version

LALPA Puanin Saktu Mi Zungthiam

¹ LALPA nih Mosi sinah

² “Juda phun lakah mi, Bezalel, Uri fapa, Hur tupa ka thîm.

³ Anih chu Ka thiltikhonâk hen ka khattir rawh. Theihthiamnâk, zungthiamnâk, rian kip ṭuan thiamnâk ka pêk.

⁴ A timhtuah dân leh a ṭuan dân thiam tak hen, ngûn, tangkasa, dâr;

⁵ lungmantam tenh ding hen nektir dân, thing ker dân leh rian dang chikip ṭuannâk ka pêk.

⁶ Dan phun ah mi Ahisamak fapa Oholiab chu a sinah ṭuan bâk ding hen ka thîm. Mi zungthiam dang tla sin khawm ah tikhonâk rokual tak ka pêk na bâk, siam ding hen thu ka pêk na mi zawng an tikho ding hen.

⁷ Ka umnâk Puanin, Thudântuk Bâwm leh a sinh, Puanin thilthuam zawzawng,

⁸ dawhkân leh a thuamthil, meichêu ngûn thenhlimh hen siam mi a thuamthil zawzawng, rimthâw duahnâk mâichâm,

⁹ bâwlnâk duahnâk mâichâm leh a thuamthil tla, ṭâwlnâk mâihûm leh a tohnâk,

¹⁰ bâwlpu thuam rokual tak Aron leh a fapa tla nih bâwlpu rianṭuannâk ah mang ding mi tla.

¹¹ Thuh ding mi sariak, Mun Thenhlimh rangah rimthâw tla. Hi bang thil siam ding hen thu ka nan pêk na mi zawzawng hi, thu kan pêk na mi hâwitê hen nan ti ding asi,” a ti.

Sabbath Dinhni

¹² LALPA nih Mosi chu Israel tla simh ding hen thu a pêk le;

¹³ “Sabbath ka dinhni hi ulh u. Nannih leh keimah karah hi nûnthâi zawzawng khawm ah, Kei, LALPA nih keimah minung ah ka nan siam na mi ti zauhtirnâk asi.

¹⁴ A thenhlimh ruangah dinhni chu nan ulh ding asi. Âuzawng nih chu ni chu ulh lo hen rian a ṭuan chun thah ding asi.

¹⁵ Nan rianṭuannâk ding ah ni ruk nan nei, a ni sarih ni lam chu dinhnâk ni rangah ka sinah apnâk ni asi. Chu ni ah rianṭuantu zawng chu thah ding asi lai.

¹⁶ Israel mi tla nih hi ni hi thudântuk singsiahnâk ding ah an ulh ding asi.

¹⁷ Hi hi Israel mi zapi leh keimah karah singsiahnâk um kumza ding mi chu asi. Kei, LALPA nih tual leh vân ni ruk sungah ka siam le, a ni sarihnâk ah ka rianṭuan chu Ka dinhtâk ruangah,” a ti.

¹⁸ Pathian nih Sinai Tlângah Mosi sinah thu a sim mi chu â lîm rawh chun, amah Pathian ngelchel nih a rîn mi lungtlêp panih lakah thupêk rîn mi tla chu Mosi sinah a pêk rawh.