EXODUS 30 - Bawm Common Language Bible Version

Rimthâw Duahnâk Mâichâm

¹ “Rimthâw duahnâk ding hen thingrî hen mâichâm siam.

² Kî li hen a dung dâwng khat, a vâng dâwng khat hen, a sâng lei dâwng nih hen siam. A kî pali kip ah a kî tuah, sa khat hen siam ding asi.

³ A tlûn, a sîr pali leh a kî tla chu ngûn hen luanh ding asi, a tlâng sîr hêl dak hen ngûn hen luanh.

⁴ A putnâk ding hen ngûn hen a bing panih siam le, a tlâng sîr panih tanglei ah thlaih, a zawnhnâk thingtluan sawhnâk ding hen.

⁵ Hi thingtluan a zawnhnâk khawm hi thingrî ngûn hen luanh mi ding asi.

⁶ Chu mâichâm chu Thudântuk Bâwm mâilei kiangah puanzâr thlâi mi lênglei ah siah. Chu chu kanna tawngnâk ding mun asi lai.

⁷ Zînglei kip ah Aron a hawng tikah meichêu chu timhtuah zet hen a um ding asi, chu lakah chun rimthâw a duah ding hen.

⁸ Zânlei ah mei a kaih tikah chu hâwi hen a ti ding asi. Chu rimthâw ap mi chu zeiliau zawng ah nawktir lo hen ti vima ding asi.

⁹ Hi mâichâm tlûnah hin khap mi rimthâw zeikhawm ap lah, ran ap mi khawm, ei mi apnâk khawm, a tlûnah uain ap mi khawm tawih lah.

¹⁰ Kum khat ah veikhat Aron nih mâichâm thenhlimhtir ding hen dân a siam ding asi; sual rangah ran hen bâwlnâk thisen chu mâichâm kî pali a chulh ding asi. Hi hi zeiliau zawng ah kum siar hen nan ti ding asi. Kei, LALPA sinah mâichâm nan hawng ap mi chu a thenhlimh ver ding asi,” a ti.

LALPA Umnâk Puanin Siah Rang Ding Mi

¹¹ LALPA nih Mosi sinah,

¹² “Israel tla minung nan rêl tikah, an nungnâk rangah mikip nih a man an hawng ka pêk ding asi, a rêl liauah siat leh râwknâk a lakah a tlung lonâk ding hen.

¹³ Minung rêlnâk lakah telh mi tla zawng nih chun a man an khiah mi zat chu an pêk ding asi. Mun thenhlimh tahnâk dân hâwi hen an ruat mi rih zat Shekel khingkhuai vima hen. Mikip nih ka sinah an hawng ap mi hawi hen an pêk ding asi.

¹⁴ Rêlnâk ah telh mi tla, kum kul mawh chu ngâk hen upa dauh mawh nih zat ver an hawng ka pêk ding asi.

¹⁵ Minei nih tam dauh a pêk ding asi lo, mipâm khawm nih tâwm dauh a pêk ding asi lêm lo, chu hâwi hen a nungnâk ding man an pêk ding asi.

¹⁶ Chu tangka chu Israel mi tla lakah khawlh le, ka umnâk puanin zauhkhenhnâk rang ding ah mang rawh. Hi siah hi an nungnâk rang ding ah man pêk mi chu asi le, anmah zauhkhenh na ding hen Ka theihkumza lai,” a ti.

Dâr Mâihûm

¹⁷ LALPA nih Mosi sinah,

¹⁸ “Dâr mâihûm, a tohnâk dâr hen siam rawh. Puanin leh mâichâm karah siah le, tî tleng.

¹⁹ Aron leh a fapa tla nih Puanin ah mawh mâichâm ah mawh eiphung ap ding hen

²⁰ an kal lânah an kut leh kê ṭâwlnâk ding hen. Churawhchun, thah hen an um lai lo.

²¹ An thi lonâk ding hen an kut leh an kezaphah ṭâwl na seh. Hi dân hi anmah leh an thlâk tla nih an zûl kumza ding asi,” a ti.

Thuh Ding Sariak

²² LALPA nih Mosi sinah,

²³ “Rimthâw, mura hâng kilogramme ruk, cinnamon rimthâw kilogramme thum, cane rimthâw kilogramme thum,

²⁴ cassia kilogramme ruk, (tah dân rih zat) oliv sariak litre li telh.

²⁵ Chun, thuh ding mi sariak thenhlimh siam, rimthâw hâwi hen chawmh.

²⁶ Thudântuk Bâwm leh ka umnâk Puanin,

²⁷ dawhkân leh a thuamthil, meichêu leh a thuamthil, rimthâw duahnâk mâichâm,

²⁸ duahphung apnâk mâichâm, a thuamthil zawzawng tla hen leh ṭâwlnâk mâihûm leh a tohnâk tla chulhnâk ah mang.

²⁹ Hi hâwi hen hi bang thil tla hi ap le; thenhlimh ver an si lai. Âuzawng nih mawh zeital nih a tawngh chun â thenhlimhnâk thiltikhonâk nih nganfâk a pêk lai.

³⁰ Aron leh a fapa tla chu sariak thuh na le, ka rianṭuan ding hen bâwlpu ah birhtir na.

³¹ Israel mi tla sinah, ‘Hi sariak thuhnâk thenhlimh hi ka rianṭuannâk ah zeiliau zawng ah mang kumza ding hen simh na.

³² Mi rarâu rangah nan thuh ding asi lo. Zei thil tal a banghpi ding hen chawmh mi na mang ding asi lo, â thenhlimh ruangah thenhlimh tak hen na ti ding asi.

³³ Âuzawng nih a banghpi a siam hen mawh, bâwlpu silo mi lakah an mang chun keimah minung ah ngaih an si lai lo,”’ a ti.

Rimthâw

³⁴ LALPA nih Mosi sinah, “Hi bang rimthâw tla stacte, onycha, galbanum leh rimthâw karo zat chiau hen lâk.

³⁵ Rimthâw ah chawmh le siam, tliang tak leh thenhlimh tak a kil ding hen chitê telh.

³⁶ A khing chu dip bit hen dêng le, ka umnâk Puanin ah put le, Thudântuk Bâwm mâika ah theh. Hi rimthâw hi thenhlimh tak hen ti rawh.

³⁷ A banghpi mi zei rimthâw khawm nan rangah na siam ding asi lo. Ka sinah thil thenhlimh ap mi asi hâwi hen ruat.

³⁸ Âuzawng nih amah banghpi mi rimthâw a siam hen a mang chun ka minung ah ngaih asi lai loh,” a ti.