EXODUS 29 - Bawm Common Language Bible Version

Aron Leh A Fapa Tla Bâwlpu Rangah Birhtirnâk Leh Sîntîrnâk

¹ “Hi hi ka rianṭuantu bâwlpu tla siding hen Aron leh a fapa tla apnâk ding hen na tiding mi chu asi. Chawchal tuai pakhat leh dawrâ chal panih simsâwinâk umlo mi lâk rawh.

² Sangvut a ṭha chem mi mang le, thilnu telh lo mi, oliv sariak hen sang siam le, a zeimaw mi chu sariak tel lo mi, a zeimaw mi sariak buaih mi sang siam rawh.

³ Bâwm lakah khumh le, chawchal leh dawrâ chal panih hen bâwlnâk na hawng timhtuah tikah ka sinah hawng ap.

⁴ “Ka umnâk Puanin kawtkâ kiangah Aron leh a fapa tla hawngpi na le, dân hâwi hen tak khawlh ding hen simh na.

⁵ Churawhchun, Aron chu bâwlpu thuam hen thuamh, kawrdawh, ephod, ephod tlûnah mi kawrfual, ṭângbêk leh tâisâwm hen.

⁶ Upâwng pawnhtir le, ‘LALPA sinah ap mi’ ti rîn apnâk singsiahnâk thenhlimh kha a upâwng lakah sih.

⁷ Churawhchun, sariak thuh ding mi lâk le, a lû ah tawih le, chulh.

⁸ “A fapa tla hawngpi na le, kawrdawh ruk na;

⁹ an tâi ah tâisâwm hen sâwm na le, lukhuh khuh na. Chu chu Aron leh a fa tla na birhtir na ding mi dân chu asi. Anmah leh an thlâk le tla nih bâwlpu si hen ka rian an ṭuan kumza ding asi.

¹⁰ “Ka umnâk Puanin tualmâi ah chawchal hawng put le, Aron leh a fapa tla nih a lû tlûnah an kut thâng seh.

¹¹ Ka umnâk thenhlimh Puanin mâika ah chawchal thah.

¹² Chun, chawchal thisen chu na kutdawng hen tawh le, mâichâm kî fawng lakah nalh. Thisen a lei mi chu mâichâm bul ah bungh hep.

¹³ Churawhchun, a sungril thâu zawzawng lâk, a thin a ṭha chem mi lâk le, a kal panih a tuamtu thâu hen, mâichâm tlûnah duah le, ka sinah hawng ap.

¹⁴ Sikhawmsele, chawchal sâ, a vun, a ril chu dâivâu ah duah. Chu chu bâwlpu tla sual thiangnâk ding ah thil ap chu asi.

¹⁵ “Dawrâ chal pakhat lâk le, Aron leh a fapa tla nih a lû tlûnah an kut thâng na seh.

¹⁶ Chun, dawrâ chu thah le, a thî lâk le, mâichâm sîr ki li ah theh.

¹⁷ Dawrâ chal chu chan dip le, a kê leh a sungril chu ṭâwl le, a neknâwi tla hen a lû hen munkhat siah na.

¹⁸ Eiphung thil ap hâwi hen mâichâm tlûnah duah hep. Chu apnâk rim nih chun hawng ka lawmhtir asi.

¹⁹ “Dawrâ chal dang ap ding mi chu lâk le, Aron leh a fapa tla nih a lû tlûnah an kut thâng ding hen simh na.

²⁰ Thah le, a thî lâk le, Aron nakhaw sâr ah leh a fapa tla an vawrhlei kutpi tla leh an vawrhlei kepi tla ah buaih; a lei mi thî chu mâichâm ki li ah theh.

²¹ Mâichâm tlûnah mi thî tla leh sariak buaih mi tla lâk le, Aron leh a fapa tla nipuan lakah theh. Amah leh a fapa tla nipuan chu ka sinah ap mi asi lai rawh.

²² “Dawrâ chal thâu, a mei thâu, a sungril thâu, a thin ṭha chem sêu khat, a kal panih, a thâu, leh a êl vawrhlei kâng mi lep.

²³ Keimah an hawng ka apnâk pâi lakah mi chikip lakah mi sang tlang khat chiau: oliv sariak hen zêu mi tlang khat, sariak hen zêu lo mi tlang khat leh sang dang tlang khat lâk.

²⁴ Hi bang eiphung tla hi Aron leh a fapa tla kut lakah pêk na le, ka sinah a bîk hen thilpêk hawng ap ding hen simh na.

²⁵ Chun, an sinah thawk hen thil an hawng ap mi chu lâk le, bâwlnâk mâichâm tlûnah ka sinah eiphung apnâk hâwi hen mâichâm tlûnah duah. Chu thil ap rim nih chun hawng ka lawmhtir asi.

²⁶ “Dawrâ î-âwm chu lâk le, a bîk hen thilpêk siding hen ka sinah hawng ap. Hi anrang lam chu nangmah vo asi lai.

²⁷ “Bâwlpu birhtir tikah dawrâ î-âwm leh a êl, birhtirnâk ah mang mi tla chu a bîk hen thilpêk siding hen ka sinah ap ding asi. Chu chu bâwlpu tla rangah siah.

²⁸ Bâwlpu vo, ran a êl leh a î-âwm ka mi le tla nih a tlâinâk ding hen thil ap an siam mi chu ka thuthlûk lêt kho lo mi asi. Hi hi mi zapi tla nih, Kei, LALPA sinah an thilpêk chu asi.

²⁹ “Aron Bâwlpu thuam tla chu a thih nûnah a fapa tla sinah pêk ding asi, birhtir an si tikah anna ruk ding hen.

³⁰ Aron fapa amah bâwlpu sinâk luahtu ka umnâk Puanin Mun Thenhlimh ah ka rianṭuan ding hen lûttu nih ni sarih kar hi nipuan tla hen a thuam ding asi.

³¹ “Dawrâ chal sâ Aron leh a fapa tla birhtirnâk ah mang mi chu mun thenhlimh ah suang.

³² Ka umnâk Puanin tualmâi ah pâi lakah sang siah mi hen an ei ding asi.

³³ Anmah birhtirnâk ding ah ngaihdamnâk dân ah mang mi chu an ei ding asi. Hi hi thil thenhlimh asi ruangah bâwlpu tla cho nih an ei ding asi.

³⁴ Meh mawh sang mawh zînglei tiang hen a leifuan a um mi chu thil thenhlimh asi ruangah ei ding asi lo, duah hep ding asi.

³⁵ “Aron leh a fapa tla rangah thu ka nan pêk mi hâwi hen birhtirnâk dân chu ni sarih siding hen siam.

³⁶ Nisiar hen chawchal hen bâwlnâk na ap ding asi, sual tla ngaihdam asi khonâk ding hen. Hi nih hin mâichâm a thiangtir lai. Oliv sariak hen buaih mi chu a thenhlimhtir lai.

³⁷ Hi ni sarih karah hin nisiar hen ti. Churawhchun, mâichâm chu a hawng thenhlimh ver lai le, âutal nih mawh zeital nih mawh a tawnghtu chu â thenhlimhnâk thiltikhonâk nih nganfâk a pêk lai.

Nisiar Thil Ap

³⁸ “Nisiar hen tik a hawng tlung ding mi rang zawng khawm ah kum khat mi dawrâ fa panih mâichâm tlûnah bâwlnâk a um ding asi.

³⁹ Dawrâ pakhat chu zînglei ah, a dang chu zânlei ah ap.

⁴⁰ Dawrâ fa masa chu sangvut kilogramme khat leh oliv sariak litre khat hen chawmh hen ap. Uain litre khat chu apnâk ding ah tawih.

⁴¹ Dawrâ fa panihnâk chu zânlei bâwlnâk ah mang le, oliv sariak leh sangvut khawm a tîr mi zat hen mang le, uain khawm zînglei mi zat hen. Hi hi Kei, LALPA sinah eiphung ap mi chu asi le, a rim nih hawng Ka lawmhtir asi.

⁴² Zeiliau zawng ah hi duah mi thil ap hi Ka umnâk Puanin tualmâi ah nan hawng ap ding asi. Chunah chun ka mi tla hen kanna tawng lai le, nan sinah thu Ka sim lai.

⁴³ Chunah chun Israel mi tla hen kanna tawng lai le, Ka chêu mit ser rê mi nih chun mun chu a thenhlimhtir lai.

⁴⁴ Puanin leh mâichâm chu Ka thenhlimhtir lai le, Aron leh a fapa tla chu ka rianṭuan ding hen bâwlpu ah ka thlei na lai.

⁴⁵ Israel mi tla lakah ka um lai le, Kei, an Pathian kasi lai.

⁴⁶ Kei LALPA, an Pathian Aigupta ram ah mi suakpi natu Ka si ti an theih lai, churawhchun Kei an sinah Ka um lai. Kei, LALPA an Pathian chu kasi.