EXODUS 26 - Bawm Common Language Bible Version

LALPA Umnâk Puanin

¹ “Ka umnâk Puanin sunglei kâng chu puan mangṭhia, dumpâwl, senduk, samul lasen hen tah mi parâ hen siam. Thilsiam tla thla lem hen na thuamh ding asi.

² Puanzâr chu anna tia rang ding asi, a dung dâwng kul leh dâwng riat, a vâng dâwng li ding asi.

³ Puanzâr pangâ chu zûn khat ah peh hep ding, puanzâr dang khawm chu hâwi hen peh hep ding asi.

⁴ Puanzâr zûn khat sâr ah puansa pâwl hen a nâ tla na siam seng ding asi.

⁵ Puanzâr zûn masa lakah a nâ sâwmngâ na siam lai le, puanzâr panihnâk khawm a tîr mi puanzâr nâ zâwn char hen a nâ sâwmngâ na siam ding asi.

⁶ Chu puanzâr zûn nih chu anna pehnâk ding hen ngûn hen banhnâk sâwmngâ na siam ding asi, zûn khat an si kho ding hen.

⁷ “Chu Puanin khuhnâk ding hen kêl mul puan leikhat siam.

⁸ Chu puan tla chu a tia rang hen siam le, puanzâr chu a sâu leikâng dâwng sâwmthum, a vâng chu dâwng li asi ding asi.

⁹ Chu lakah puan zûn ngâ chu zûn khat ah ṭhît le, paruk khawm chu zûn khat ah ṭhît. Puanzâr paruknâk chu Puanin mâilei a khuh ding asi.

¹⁰ Puanzâr ṭhît mi pakhat tlâng lakah a nâ sâwmngâ na siam ding asi, puanzâr dang pakhat ṭhît mi tlâng lak khawm a nâ sâwmngâ na siam ding asi.

¹¹ Dâr hen banhnâk â kuai mi sâwmngâ siam ding hen puan zûn nih chu a peh ding hen a nâ lakah bunh.

¹² Puanzâr khingkhuai a lei mi chu Puanin dunglei ah â thlâi ding asi.

¹³ Puanin khuhnâk puanzâr a vâng leiah mi khatlei khatlei dâwng khat a fawng mi chu â thlâi ding asi.

¹⁴ “Khuhnâk ding panih siam le, pakhat chu dawrâ chal vun rawng sen ah thlâk mi leh a dang savun ṭha tak mi a lênglei khuhnâk ding hen.

¹⁵ “Thingrî hen Puanin kâwpmi tung ding ziar hen siam.

¹⁶ A kâwpmi tung sâu lei chu dâwng râ, a khang chu dâwng khat leh a tan.

¹⁷ A kê panih leh a kâwpmi tung tla anna tlâi ver kho ding hen a kâwpmi tung tla zawzawng nih hi bang a kê tla hi an nei ver ding asi.

¹⁸ Simlei kâng sîrah a kâwpmi tung kul siam le,

¹⁹ tangkasa hen a tung tohnâk sâwmli siam le, kâwpmi tung kip rangah tohnâk panih vima, kâwpmi tung pakhat lakah kê panih dirhkalhtu ding hen a tawbâ chu na kuartir ding asi.

²⁰ Chu Puanin marlei kap rang ding ah kâwpmi tung kul siam le, tangkasa

²¹ tohnâk sâwmli kâwpmi tung kip tohnâk panih vima ding hen.

²² Puanin dunglei, thlanglei kâng rangah kâwpmi tung ruk,

²³ a kî rangah kâwpmi tung nih.

²⁴ Hi a kî mi kâwpmi tung tla chu a taw lei hen a tlâi ding asi, a tlûnlei tiang anna peh ver ding asi. Kâwpmi tung panih a kî ah mi tla chu hi hâwi siam ding asi.

²⁵ Churawhchun, tangkasa a tohnâk leiruk chu, kâwpmi tung pariat tohnâk chiau a hawng si lai, kâwpmi tung kip ah panih vima hen.

²⁶ “Thingrî hen a khuahkhang leingâ siam le,

²⁷ khatlei pat rangah pangâ khatlei pat rangah pangâ, thlanglei kâng taw lei rangah pangâ.

²⁸ A lâi mi khuahkhang hen Puanin khatlei dawng thawk hen khatlei dawng tiang thul dak ding asi.

²⁹ Chu kâwpmi tung tla chu ngûn hen luanh ding asi, a lâi mi khuahkhang hen anna tlâi ding hen a nâ ngûn hen siam ding, chu khawm chu ngûn hen luanh ding asi.

³⁰ puanin chu tlângah kan zauhtir mi hâwitê hen siam rawh.

³¹ “Puanzâr chu puan mangṭhia, dumpâwl, senduk leh samul lasen tah mi hen na siam ding asi. Thilsiam (cherabim) tla thla lem hen na thuamh ding asi.

³² Thingrî thing tung pali, ngûn hen luanh mi lakah a banhnâk hen thlâi le, a tung tla chu tangkasa a tohnâk pali lakah na toh ding asi.

³³ Chu puanzâr chu Puanin tlûnlei ah a tlar hen banhnâk an siam mi lakah bah hen zâr ding asi. Thudântuk Bâwm, lungtlêp panih umnâk chu puanzâr pîn leiah siah. Chu puanzâr chu Mun Thenhlimh leh Mun Thenhlimh Chem dangnâk asi.

³⁴ Thudântuk Bâwm chu a sinhnâk hen sinh.

³⁵ Mun Thenhlimh Chem lênglei ah Puanin marlei kângah dawhkân, simlei kângah meichêu siah ding.

³⁶ “Puanin tual mâilei rangah chun- puanzâr, puan mangṭhia dumpâwl, senduk leh samul lasen hen tah mi, dawh tak hen chawih mi siam.

³⁷ Hi puanzâr thlâinâk ding hen thingrî thing tung ngûn hen an tuam mi pangâ, a banhnâk ngûn hen; a tung tohnâk dâr pangâ siam.