EXODUS 25 - Bawm Common Language Bible Version

Mun Thenhlimh Rangah Thil Ap

¹ LALPA nih Mosi sinah,

² “Israel fa tla chu ka sinah thil ap ding hen simh na. Thinlung thawk tak hen hawng pêktu vial chu lâk piak u.

³ Chubang pêk ding mi tla chu: ngûn, tangkasa, dâr,

⁴ puan mangṭhia, a dumpâwl, sendâng, samul lasen, kêl mul hen tah mi puan,

⁵ dawrâ chal vun rawng sen suang mi, savun ṭha mi zât, thingrî thing,

⁶ meichêu hâng, thuh ding mi sariak rimthâw, rimthâw nimh ding mi,

⁷ karnelian leh lung sung Bâwlpu Lalchem ir lakah bêk mi ephod rangah siam ding mi tla.

⁸ Mi zapi nih ka rangah puanin thenhlimh an siam ding, anmah tla sinah ka um khonâk ding hen.

⁹ A ruakhâu ka ruat mi ka nan zauhtir mi hâwitê hen na siam ding asi.

Thudântuk Bâwm

¹⁰ “Thingrî thing tawbalâ siam le, a dung dâwng nih leh a tan, a vâng chu dâwng khat leh a tan, a sâng lei chu dâwng khat leh a tan si seh.

¹¹ A sung a lêng chu ngûn karo hen luanh ding, a sîr tla khawm ngûn hen luanh ding.

¹² A putnâk ding hen a nâ ngûn hen siam ding asi, a kê pali siam ding, a sîr kip ah a nâ panih vima ding.

¹³ A zawnhnâk ding hen thingrî tluan siam le, ngûn hen luanh mi bâwm,

¹⁴ khatlei khatlei sîr vevê ah mi a nâ lakah lan dak hen sawh.

¹⁵ Chu thing tlûan a nâ lakah sawh mi chu bunh kumza ding asi, phâwi ding asi lo rawh.

¹⁶ Churawhchun, bâwm sungah chun lungtlêp panih dân rînnâk ka nan pêk mi siah rawh.

¹⁷ “Ngûn karo hen a sinh siam le, a sâu lei dâwng nih leh a tan, a lianh lei dawng khat leh a tan si seh.

¹⁸ Thilsiam (cherabim) tla a thla panih ngûn dêng hen siam le,

¹⁹ a sinh khatlei dawng vevê ah a sinh hen tâwk thap ding hen siam.

²⁰ Thilsiam (cherabim) thla nei tla chu mâitawnh hen a sinh lakah an um ding asi, an thla nih mâichâm a zarh ding asi.

²¹ Lungtlêp panih chu bâwm sungah siah le, a tlûnah sinh.

²² Chunah ka nan tawng lai le, Thilsiam (cherabim) panih thla panih karah mi a sinh tlûnlei thawk hen ka dân zawzawng tla Israel mi tla rangah ka nan pêk lai.

Pathian Rangah Ap Mi Sang Siahnâk Dawhkân

²³ “Thingrî thing hen dawhkân siam le, a dung dâwng nih, a vâng dâwng khat, a sâng lei dâwng khat leh a tan hen si seh.

²⁴ Ngûn hen luanh le, a sîr tla khawm ngûn hen luanh.

²⁵ A kâwm chu zabawk tia si seh, a kâwmnâk sîr chu ngûn hen na luanh ding asi.

²⁶ A zawnhnâk ding ah ngûn hen a nâ pali siam le, a kî pali zâwn kip ah mi a kê tla ah bunh rawh.

²⁷ Dawhkân zawnhnâk tlûan a nâ chu a tlâng sîr leiah bunh ding asi.

²⁸ Thingrî tluan chu siam le, ngûn hen luanh.

²⁹ Khêng tla, hâi tla, tî sâwknâk tla, khêngkûm tla, uain apnâk ding ah siam rawh. Chubang zawzawng chu ngûn karo hen siam ding asi.

³⁰ Dawhkân chu Thudântuk Bâwm mâika ah siah ding asi. Chu dawhkân tlûnah chun ka sinah ap ding mi sang thenhlimh siah kumza ding asi.

Meichêu Tohnâk

³¹ “Meichêu tohnâk ngûn karo hen siam le, a tohnâk leh a tung chu ngûn hen siam ding asi; a thuamhnâk chawmpâr tla, a kukulul leh chawmpâr chu a tlâi ver ding asi.

³² A ṭeng chu paruk ding asi, khatlei sîrah pathum, khatlei sîrah pathum.

³³ A ṭeng paruk kip ah a thuamhnâk chawmpâr pathum almon pâr a kukulul leh a pâr hâwi mi a um ding asi.

³⁴ Meichêu tung nih chun a thuamhnâk chawmpâr pali, almon pâr a kukulul hen a pâr hâwi mi a nei ding asi.

³⁵ A ṭeng bawp thum tang kip ah a kukulul pakhat a um ding asi.

³⁶ A kukulul tla, a ṭeng tla, a meichêu chu ngûn karo hen sa khat hep an siding asi.

³⁷ Meichêu lakah chun meichêu pasarih siam le, mâilei a cherh kho ding hen.

³⁸ Châicheh leh vachâm siahnâk khêng chu ngûn karo hen siam.

³⁹ Meichêu leh a ruakhâu siamnâk rangah ngûn kilogramme 35 na mang ding asi.

⁴⁰ Tlângah siam dân ka nan zauhtir mi hâwitê hen siam ding hen a thiamthih rawh.