EXODUS 23 - Bawm Common Language Bible Version

Diknâk Leh Ṭhatnâk

¹ “Thu vâivuan diklo chu zanh lah, thu diklo sim hen misual ṭangpi lah.

² An tam ruang ko ah perpet hen thilsual titu murui chu zûl lah na.

³ Mipâm khawm a thunawk lakah ṭanh khun lah.

⁴ “Na mêlma chawpê mawh sanatung mawh â sût hen a suak mi na muh chun a sinah kalpi nawlh.

⁵ A sanatung a thilphurh nih a denh chun, kaltâk lo hen thawh le, ṭangpi rawh.

⁶ “Mipâm chu lâirêlnâk ah diklo hen lâirêl piak lah.

⁷ Diklo tak hen mi phiar lah, sual lo thlo hen mi thah lah; sual thil titu tla chu âuzawng keimah nih ka mawhtir awt ruangah.

⁸ Nawhnâk duh lah, mi tla chu nawhnâk nih an mit a châwtir na le, diknâk an ruat kho lo, chu nawhnâk nih chun mawh lo hâwi hen a siam na ruangah.

⁹ “Ramdang mi chu nehsawh lah, Aigupta ram ah ramdang mi na va si rawh ruangah ramdang mi umzia na theih rawh.

Kum Sarihnâk Leh Ni Sarihnâk

¹⁰ “Kum ruk sungah nan phâisen tuah ule, a hawng suak mi vial chu pumh u.

¹¹ Sikhawmsele, a kum sarihnâk ah lam chun dinhtâk ding rawh asi, chu lakah a kho mi chu zeikhawm lâk lah u. Chunah a kho mi chu mipâm tla cho nih an ei kho lai le, ram sa tla khawm nih mâk mi tla chu an ei kho lai. Chu hâwi hen nan grep dûm leh oliv kûng tla khawm ti u.

¹² “Zarhkar khat ah ni ruk kar rianṭuan ule, sikhawmsele, a ni sarih ni ah chun ṭuan lah u. Chu tikah nan sal tla leh ramdang mi tla rian an ṭuan piak natu leh nan ran tla anna dîn kho lai.

¹³ “Kei, LALPA nih nan sinah ka sim mi zawzawng chu ngâi u, pathian dang tla sinah thlacham lah ule, an min khawm sim lah u.

Kûtpî Pathum

¹⁴ “Kum khat ah kût pathum nan ka sawrnâk ding hen nei u.

¹⁵ Abib thla, Aigupta thawk hen nan suaknâk thla ah thu ka nan pêk na mi hâwi hen Sâng Thilnu telhlo Kût ulh u. Kût liauah ni sarih kar chu sang thilnu telh mi rerêng nan ei ding asi lo, thil ap ding put lo hen nan ka sawnh ding hen nan hawng ding asi lo.

¹⁶ “Fângzûn nanna dawmh awt chun Fângzûn Kût ulh u. “Nan dûm lakah mi grep rah tla leh theirah dang tla khawk ule, Pâwltlâk Kût ulh u.

¹⁷ Kum khat ah hi kût pathum sungah hin Kei, LALPA nan Pathian sawnh ding hen hawng ver u.

¹⁸ “Ran hen ka sinah bâwlnâk nan hawng pêk tikah thilnu telh mi sang nan mang ding asi lo. Ka sinah nanna bâwlnâk ran thâu chu hi kût sungah a thâituan tiang hen nan siah ding asi lo.

¹⁹ “Kum siar hen LALPA, nan Pathian in ah rah masa nan kawih mi nan hawng put ding asi. “Dawrâ fa mawh kêl fa mawh a nu nûk hâng hen nan suang ding asi lo.

Thutiamnâk Leh Sîntirnâk

²⁰ “Nan mâilei ah nan kal liauah an vêng natu ding hen vânmifial ka hawng fial lai le, ka timhtuah mi mun ah a nan kalpi na lai.

²¹ A thu ngâi ule, zûl u. A lakah hel lah u, keimah fial mi asi, hel mang chu a ngaihdam awtlo.

²² Sikhawmsele, a thu nan ngâi hen thu ka pêk mi zawzawng nan zûl chun, nan mêlma zawzawng keimah nih ka do lai.

²³ Ka vânmifial nan mâilei ah a kal lai le, Amor leh Hit mi tla, Periz leh Kanaan mi tla, Hiv mi leh Jebus mi tla umnâk ram ah a nan kalpi na lai le, annih tla chu ka veih dep na lai.

²⁴ An pathian tla sinah kûn lah ule, sawnh lah u, an phung tla zûl lah u. An pathian tla râwk ule, an lungphun tla khiak u.

²⁵ Kei, LALPA nan Pathian, nan hawng ka sawnh lam chun, ti leh râwl hen mal kan sâwm na lai le, nan nganfâknâk zawzawng ka lâk peng lai.

²⁶ Nan ram sungah nunau nausiat leh ching mi rêng a um lai lo. San sâunâk kan pêk na lai.

²⁷ “A nan do natu chu keimah hawng ka ṭih ding hen ka siam na lai; nan leido tla lakah nawknâk ka siam lai le, nan mêlma tla chu ka khirh na lai le, ka tek tir hep na lai.

²⁸ Nan mêlma tla chu ningṭihnâk ka pêk na lai le, nan kalnâk zawng ah Hiv mi leh Kanaan mi leh Hit mi tla chu ka nar phin lai.

²⁹ Kum khat sung ko chun ka nar hep na lai loh, ka nar ver na chun ram a lâwng tuktarâi lai le, nan rangah ram sâ a tam tuk lai.

³⁰ Chu ngâk hen tâwm tâwm ka nar na lai le, nanmah nih a ram mi neih nan duh tâwk nan lâk kho tiang hen.

³¹ Nan ram chu Agaba likâwlneng thawk hen Eufretis tiva tiang leh Mediteranian Tipi thawk hen ramkaro tiang ka kauh lai. Chu mi ram ah um mi tla tlûnah thiltikhonâk kan pêk na lai le, nan kalnâk zawng ah nan nar vima na lai.

³² Anmah tla hen mawh an pathian hen mawh remnâk siam lah u.

³³ Nan ram ah chu minung tla chu nan umtir na ding asi lo, nan umtir na chun ka lakah thilsual an titir na lai. An pathian tla nan sawnh chun nan rangah thihnâk thang asi lai.