EXODUS 2 - Bawm Common Language Bible Version

Mosi Suaknâk Thu

¹ Hi liauah hin minung pakhat Levi phun nih amah phun lakah mi ber nunau a umpi le,

² fapa a ring. A nu nih fa mêlṭha tak asi ruangah thla thum a thuh.

³ Sikhawmsele, a thuh châwklo rawh le, lâiluang hen bâwm a siam le, tî a lût lonâk ding hen lâwngthlîng hen a châr. Tiva kap bua nâwngah nausêm chu a siah.

⁴ Nausêm chu a unu nih a râltlâng hen a vêng le, a ngâk.

⁵ Lalchem fanu chu tak khawlh ding hen tiva ah a hawng le, a to-aw tla chu vakap ah an hawng. Bua nâwngah bâwm chu a muh le, mawhsareh hen a to-awnu a va lâktir.

⁶ Lalchem fanu nih bâwm chu a awng le, mipa ngâksiatê a muh mi chu a ṭap le, lalchem fanu nih thungâi a zângfah. “Hi hi Hebrai fa ma hi,” a ti.

⁷ Churawhchun, a unu nih lalchem fanu sinah, “A umhtu ding Hebrai nunau kan kawh piak lai ma?” a ti.

⁸ “Kawh ko me,” a ti. Churawhchun, nunau ngâksia nih a nu ngelchel chu a va kawh rawh.

⁹ Lalchem fanu nih, “Hi nausêm hi lâk le, hawng ka zauhkhenh piak, a man kan pêk lai,” a ti. Churawhchun, nausêm chu a lâk le, a zauhkhenh rawh.

¹⁰ Chu nûnah chun ngâksia chu a hawng lian tâwk ual rawh le, lalchem fanu sinah a kalpi, anih nih amah fa rangah a nei rawh. A thinlung hen, “Tî lakah mi ka lâk ruangah a min ah Mosi ti hen ka sak lai,” a ti.

Mosi Midian Ram Ah a Tek

¹¹ Mosi chu a hawng lian vima le, a mi Hebrai mi tla va zauh na ding hen a suak le, rian hamh tak an ṭuantir na mi a muh rawh. Aigupta mi nih amah mi Hebrai minung a thah mi a muh rawh.

¹² Mosi nih a kiangkam â hâwi le, pakhat khawm minung an um lo ti a muh le, Aigupta minung chu a thah le, a ruak chu phildip ah a phûm ving.

¹³ A thâituan ah a kîr leiah Hebrai minung panih anna sual mi a muh na. A diklo dauh mi sinah, “Zei rangah Hebrai minung vevê nanna sual?” a ti.

¹⁴ Chu minung nih a sâng le, “Kan lakah lâirêltu leh hotu ding hen âunih an siah? Aigupta minung na thah mi hâwi hen thah ding na ka tum na maw?” a ti. Mosi chu a lâu le, a thinlung hen, “Mi nih ka thilti an theih ma hi,” a ti.

^15-16 Lalchem nih thil umdân a theih rawh chun, Mosi chu thah a tum le, khawmsele Mosi chu Midian ram ah um ding hen a tek ving. Ni khat chu Mosi chu tikhurchawh kiangah a to liauah, Jethro, Midian bâwlpu fanu pasarih an pa dawrâ leh kêl tla rangah tî than an hawng le, ran tî dinnâk kuang ah tî an tleng.

¹⁷ Dawrâpu tla an hawng le, Jethro fanu tla chu an kiangtir rang na. Churawhchun, Mosi nih a sanh na le, an ran tla chu tak a khawlh piak na.

¹⁸ An pa sinah an va tlung rawh chun, “Tusûn chu nan hawng tlung tuan chiam e,” a ti na.

¹⁹ Annih nih, “Aigupta mi nih dawrâpu lakah mi hawng kan sanh le, tî hawng kan than piak le, kan ran tla tak a khawlh na,” ti hen an sâng.

²⁰ “Chu minung chu zeiah a um? Zei rangah nan mâk thlap? Kan sinah buh ei ding hen va kawh u,” ti hen a simh na.

²¹ Churawhchun, Mosi khawm nih chunah um ding chu rem a ti le, Jethro nih a fanu Zipporah hen a umhtir na le,

²² fapa an ring. Mosi nih a thinlung hen, “Kei chu ramdang mi hi ram ah um mi kasi,” a ti le, a min ah Gersom a sak.

²³ Kum tam tak nûnah Aigupta lalchem chu a thi le, sikhawmsele Israel tla chu an sal sinâk ruangah rûm leh âi hen an um le, ṭangpi deih hen an âu. An âu hâu chu Pathian sinah a tleng rawh.

²⁴ An rûm leh âi hâu theihtu Pathian nih chun Abraham, Isak leh Jakob sinah thu a tiamh mi chu a theihkumza.

²⁵ Israel tla sal an si mi chu a muh le, a siherh na.