EXODUS 14 - Bawm Common Language Bible Version

Tipi Sen Kanhnâk

¹ Churawhchun, LALPA nih Mosi sinah,

² “Israel tla chu kîr nawlh ding hen simh na le, Baal Zephon kiangah Migdol leh Tipi Sen karah mi Pi Hahirot ah mun khuar na seh.

³ Lalchem nih Israel tla chu ramkaro ah vâi hen a ruat na lai le,

⁴ a thinlung ka khungtir lai le, an ṭhâwl na lai, lalchem leh a kawrsen tla neh hen an um mi chu kei rangah chawnglawmhnâk asi lai, chu tikah Aigupta mi tla nih Kei LALPA kasi ti an theih lai,” a ti. Israel tla nih a sim mi hâwi hen an ti rawh.

⁵ Israel mi tla an suak ver rawh ti an simh rawh chun, amah leh a rianṭuantu tla chu thinlung dang an hawng put le, “Zei rangah me Israel tla chu kan suaktir êu? Kan sal tla chu kan thlâu ver na rawh!” an ti.

⁶ Lalchem chu a râltuknâk kari ah â chuan le, a kawrsen tla khawm anna tîm rawh.

⁷ A kari zawzawng leh a dang a ṭha chem mi zaruk hen, hotu tla nih thu an pêk le, an suak rawh.

⁸ LALPA nih lalchem thinlung chu a khungtir le, Israel tla nehtu kan si anna ti bâk mi chu a ṭhâwl na.

⁹ Aigupta kawrsen nih chun rang zawzawng leh kari tla leh khalhtu tla hen an ṭhâwl na le, Tipi Sen kiangah Pi Hahirot leh Baal Zephon ah, an umnâk ah chun an va phanh na.

¹⁰ Israel tla nih lalchem leh a kawrsen tla anmah do ding hen an hawng mi an muh na le, an lâu le, ṭangpi deih hen LALPA an auh.

¹¹ Mosi sinah, “Aigupta ram ah thlân a um lo ma? Ramkaro ah thi ding hen na kan kalpi mu? Aigupta ram thawk hen na kan suakpi mi hi zei asi zauhnik!

¹² Kan suak lân khawm ah hi hâwi a hawng um ding mi hi kan simh asi lo ma? Hawng kan mâk thlap ko, Aigupta sal kan si kumza ko lai kan ti khateh. Hi ramkaro ah thih ngâk chun sal ah um chu a ṭha dauh lai,” an ti.

¹³ Mosi nih a sâng na le, “Lâu rîlmâl lah u! Nan um mun ṭhial lo hen dîr ule, tusûn ah LALPA nih ruang an suah na ding mi nan muh lai; hi Aigupta minung tla hi turî rawh chun nan muh na awtlo rawh asi.

¹⁴ Nan rangah LALPA nih an do piak na awt, nannih nih zeikhawm nan ti ding a herh lo,” a ti.

¹⁵ LALPA nih Mosi sinah, “ṭangpi deih hen zei rangah nan âu? Zapi tla kha mâilei kal vima ding hen simh na.

¹⁶ Na ṭhianṭhunh kha tleih le, tipi tlûnah lirh; tî a hawng ṭhêk lai le, Israel mi tla chu tual châr tlûnah kal hen tipi an tan kho lai.

¹⁷ Aigupta mi tla chu an lung ka khungtir na lai le, ka ṭhâwl tir vima na lai, lalchem leh a kawrsen tla, a kari leh a khalhtu tla ka nehnâk chu keimah thangṭhatnâk ding asi.

¹⁸ Ka neh na tikah Aigupta mi tla nih Kei, LALPA kasi ti an theih lai rawh,” a ti.

¹⁹ Pathian vânmifial Israel kawrsen mâilei ah um mi chu an dunglei ah â ṭhial rawh.

²⁰ Sûm dîr khawm Israel dunglei ah Aigupta mi leh an kar lakah a um ving, sûm dîr nih chun Aigupta mi rangah mûi a pêk le, Israel mi tla rang chun chêu a pêk na. Churuangah kawrsen tla chu khuadei ver hen anna naih kho lo.

²¹ Mosi nih a kut chu tî tlûnah a phar le, LALPA nih saklei mi thli hen tipi tî chu a khirh. Zân khuadei ver hen thli a râng le, tipi chu tual châr ah â chang rawh. Tî chu a hawng a ṭhêk le,

²² Israel tla nih tipi chu tual châr tlûnah kal hen an tan, tî chu khatlei khatlei hen vâm hâwi hen â sawng dun.

²³ Aigupta mi tla nih an dunglei ah an ṭhâwl vima na le, an rang tla leh kari leh khalhtu tla zawzawng hen tî chu an tan bâk.

²⁴ Khuadei bâiah LALPA nih sûm leh mei thawk hen Aigupta kawrsen tla chu a chuanh na le, an thinlung a lâutir na rawh.

²⁵ An kari kê tla a tângtir piak na, churawhchun an kal a har rawh. Aigupta mi tla nih chun, “LALPA nih Israel mi tla a sanh na le, hawng kan do rawh asi. Hin ah mi hi kan suak lai!” an ti.

²⁶ LALPA nih Mosi sinah, “Tî tlûnah na kut kha phar le, Aigupta mi tla leh an kari leh a khalhtu tla a hawng nîm na lai,” a ti.

²⁷ Churawhchun, Mosi nih a kut chu tipi tlûnah a phar le, khua a hawng dei rawh chun tî chu a luang ziatê hen a luang. Aigupta mi tla chu tî lakah mi suak ding an tum le, sikhawmsele LALPA nih tipi lakah a lawnh ver na.

²⁸ Tî chu a hawng a let le, kari leh a khalhtu tla leh Aigupta kawrsen tla, Israel tla rangah tipi ah an dunglei hawng ṭhâwltu tla zawng chu a nîm dep na; pakhattê khawm an âk lo.

²⁹ Sikhawmsele Israel fa tla lam chu tî vâm hâwi â sawng mi karah tual châr tlûnah kal hen tipi an tan rawh.

³⁰ Chu ni ah chun LALPA nih Israel mi tla chu Aigupta mi tla lakah mi ruang a suah na rawh. Israel tla nih tipi kapah ruak a rîl phut mi chu an muh.

³¹ Israel tla nih thiltikhonâk fâk tak hen LALPA nih Aigupta mi tla a neh na mi chu an muh le, LALPA chu an ṭih rawh; LALPA leh a to-aw Mosi chu an zumh rawh.