EXODUS 13 - Bawm Common Language Bible Version

Fa tîr Apnâk

¹ LALPA nih Mosi sinah,

² “Fa tîr zawzawng ka sinah hawng ap u, Israel lakah mipa fa tîr leh ran lakah a mipa fa tîr zawzawng chu ka tâ an si,” a ti.

Sang Thilnu Telhlo Kût

³ Mosi nih mi zapi sinah, “Tusûn ah sal nan sinâk mun Aigupta ram nan kaltâk mi ni hi theihkumza u. Hi ni hi LALPA nih a thiltikhonâk hen a nan suakpi na mi ni chu asi. Thilnu telh mi sang rerêng ei ding asi lo,

⁴ Abib thla, thla masa chem tusûn ni ah hin Aigupta ram chu nan kaltâk rawh asi.

⁵ Kanaan mi, Hit mi, Amor mi, Hiv mi, leh Jebus mi tla umnâk ram chu LALPA nih a nan thlâk natu tla sinah pêk ding hen a tiamh ving na rawh. Chu ram neihnâk leh ram ningno ah a nan kalpi na tikah chun, kum siar hen hi a thla khatnâk kût hi nan ulh ding asi.

⁶ Ni sarih kar chu sang thilnu telhlo nan ei lai le, a ni sarihnâk ah LALPA zahnâk kût asi lai.

⁷ Ni sarih kar vial chu sang thilnu telh mi rerêng nan ei ding asi lo, nan ram sungah thilnu mawh thilnu telh mi rerêng nan siah ding asi lo.

⁸ Kût nanna dawmh tikah nan fapa tla chu Aigupta ram nan kaltâk liauah LALPA nih hi bang thil tla hi nan rangah a ti mi ruangah kan ti mi asi ti hen simh na u.

⁹ Hi ulhnâk hi nan kut lakah mawh nan chal ah mawh theihkumzanâk ding hen khimh mi hâwi hen theih u; LALPA nih a thiltikhonâk hen Aigupta ram ah mi a nan suakpi na ruangah LALPA dân chu theih nawlh ding hen nanna sîn hen nan sim kumza ding asi.

¹⁰ Kum siar hen a cham ah hi kût hi ulh vima u.

Fa tîr

¹¹ “LALPA nih Kanaan ram an thlâk natu leh nanmah rangah a tiamh mi ram ah an kalpi na awt. An pêk na tikah chun,

¹² fapa tîr vial chu LALPA sinah nan ap ding asi. Nan ran a ring masa chem mi a mipa chu LALPA tâ asi.

¹³ Sikhawmsele sanatung a ring tîr mi a mipa chu a ruangrûl ah dawrâ fa hen LALPA sinah bâwlnâk ah ap ding hen nan thleng kho lai, tlanh ding nan duh lo chun, a ngâwng khiak phak u. Nan fa tîr mipa fa zawzawng chu nan tlanh kho lai.

¹⁴ Mâilei ah nan fa tla nih, hi hi zei ulhnâk me si ti hen an deih na chun, ‘Sal ah kan umnâk Aigupta ram ah mi LALPA nih a thiltikhonâk rokual hen hawng kan suakpi mi ruangah asi’ ti hen nan sâng na ding asi.

¹⁵ Aigupta lalchem chu a lung a khung le, hawng kan suah ding a duh lo liauah LALPA nih Aigupta ram ah fa tîr mipa fa, ran leh minung lakah mi a thah hep na. Churuangah asi, LALPA sinah ran fa tîr bâwlnâk kan nei mi chu, sikhawmsele, kan fapa tîr tla chu kan tlanh nawlh.

¹⁶ Hi ulhnâk hi thil zeimawh theihkumzanâk ding hen kan kut leh chal ah khimh mi hâwi asi; LALPA nih a thiltikhonâk rokual hen Aigupta ram thawk hen hawng kan suakpi mi theih nawlh lemang nâk asi,” a ti.

Sûm Dîr Leh Meialh

¹⁷ Aigupta lalchem nih mi a suaktir na liauah, Pathian nih Philistia ram kalnâk lampi leiah a kalpi na lo, chu lei chu a nâi dauhnâk sikhawmsele, Pathian nih, “Israel tla chu râltuk ding an si awt ti anna theih ruangah Aigupta ram ah kîr nawlh ding thinlung an nei lebang lai,” ti a ruat.

¹⁸ Churuangah lam ngâwinâk leiah ramkaro pal hen Tipi Sen leikângah a kalpi na. Israel tla chu râltuk ding hen anna timhtuah rawh.

¹⁹ Josef nih Israel tla rangah thu a tiamhtir na mi hâwi hen, Mosi nih Josef ruak chu a put. Josef nih, “Hi mun ah mi Pathian nih an suakpi na tikah ka ruak nan put ding asi,” a ti ruangah.

²⁰ Israel tla nih Sukot mun chu an kaltâk le, ramkaro kiang Etham ah mun an khuar.

²¹ Sûn ah chun LALPA chu lam simhtu ah sûm dîr hâwi hen an mâilei ah a kal le, zân ah chun anmah cherh na ding hen meialh dîr hen an mâilei ah a kal, sûn leh zân hen an kal kho ding hen.

²² Sûn karah chun sûm dîr chu mi zapi mâilei ah a um kumza, zân ah lam chun meialh dîr hen an mâilei ah a um kumza.